Kaka Nyithindo Kelo Lokruok e Kend

Sama onyuol nyathi, mano kelo ne joma okendore mor ka bende omedonegi ting’. Kaka joma eka ohango yudo nyathi, ubiro wuoro ni koro utiyo gi thuolo kod tekou mang’eny e rito nyathiu. Fuwo nindo kod lokruok ma betie nyalo kelo ywaruok e kend maru. Biro dwarore ni uduto utim lokruok moko mondo urit nyathiu kod kend maru. Ere kaka puonj mag Muma nyalo konyou kedo gi lokruogego?

1. TEMURU NG’EYO KAKA NYATHI NYALO KELO LOKRUOK E NGIMAU

GIMA MUMA WACHO: “Hera hore mos kendo ong’won.” Bende, “ok omany mana gik ma kelone ber owuon, iye ok wang’ piyo.” (1 Jo-Korintho 13:4, 5) Kaka miyo ma eka ohango nyuol, en adier ni ibiro keto pachi duto kuom nyathinino. Kata kamano, chwori nyalo chako neno ni ijwang’e. Omiyo, kik wiyi wil ni en bende onego ichop dwaro mage. Ka ihori mos kendo ing’won, inyalo miyo chwori one ni igene kendo ni en bende en gi kare e pidho nyathiu.

“Un chwo, dhiuru nyime dak gi mondeu ka un gi ng’eyo malong’o.” (1 Petro 3:7) Ng’e ni chiegi koro biro tiyo gi tekone mang’eny e rito nyathiu. Koro en gi ting’ manyien kendo nitie gik ma nyalo joge, ole, to kata mana kelone parruok. Seche moko onyalo kata mana sin kodi. Kata kamano, tem ihori mos nikech “ng’a matero mirima mos ober moloyo thuon.” (Ngeche 16:32) Nyis rieko kendo tem ahinya riwe lwedo kuonde ma dwarore.—Ngeche 14:29.

GIK MUNYALO TIMO:

• Wuone: Konyuru mondeu rito nyathiu kata man gotieno. Ti gi thuolo momedore e konyo chiegi gi nyathini moloyo mitiyogo e gik mamoko

• Mine: Sama chwori ochiwore mar konyi e rito nyathiu, kik itamri. Kapo ni ok otime e yo maber kaka dwarore, kik ilwere. Kar mano, puonje e yo mang’won kaka onyalo time

2. TEGURU KEND MARU

GIMA MUMA WACHO: “Ginibedi ringruok achiel.” (Chakruok 2:24) Kata obedo ni un gi ng’at manyien e odu, ng’euru ni in kaachiel gi jaodi pod un “ringruok achiel.” Timuru duto munyalo mondo umi kend maru osik kotegno.

Un mon, beduru mamor gi kony ma chwou miyou. Tiyo gi weche mag pwoch ‘kelo ngima.’ (Ngeche 12:18) Un chwo, tiuru gi weche ma nyiso ni uhero mondeu ahinya kendo ugenogi. Pwo chiegi nikech yo motiyogo e rito joot.—Ngeche 31:10, 28.

“Ng’ato ka ng’ato mondo odwar, ok mana gik ma kelone ber en owuon, to ma kelo ber ne ng’at machielo.” (1 Jo-Korintho 10:24) Kinde duto tim gik ma kelo ber ne jaodi. Kaka joma okendore, manyuru thuolo mag wuoyo gi nyawadu, pwoye, kendo chikone iti. Kik idwar mana ber mari kendi kodok korka weche mag nindruok. Ket e paro dwaro mag jaodi. Muma wacho kama: “Kik utuonru, mak mana ka uwinjoru e kindu mar tuonruok.” (1 Jo-Korintho 7:3-5) Omiyo, wuouru kuom wachni ayanga ma ok uluor gimoro. Horuok maru kendo nyiso chuny mar rieko biro tego kend maru.

GIK MUNYALO TIMO:

• Ng’euru ni ber mondo umany thuolo mag bedo kanyachiel mana kendu jariyo

• Tim gik ma tindotindo ma biro miyo jaodi one ni ihere, kaka orone ote moro machuok kata ng’iewone mich moro

3. KAKA UNYALO TIEGO NYATHIU

GIMA MUMA WACHO: “Chakre kane in nyathi matin ahinya, isebedo king’eyo ndiko maler ma nyalo miyo ibed mariek mondo iyud warruok.” (2 Timotheo 3:15) Chanuru gik munyalo timo mondo upuonj nyathiu. Nyathi nigi nyalo makende mar puonjruok kata ka pok onyuole. Ka pod en e ich, nyathi nyalo fwenyo dwond wuon gi min mare, kod mor kata lit ma min mare nigo. Somneuru buge ka pod otin ahinya. Kata obedo ni ok obi ng’eyo tiend gik musomone, timo mano nyalo konye hero somo kosedongo.

Kata ka nyathini pod tin ahinya, onyalo winji kiwuoyo e wi Nyasaye. We mondo owinji kiwuoyo gi Jehova e lamo. (Rapar mar Chik 11:19) Kata mana sama utugo kode, wuouru kuom gik ma Nyasaye nochueyo. (Zaburi 78:3, 4) Kaka nyathiu medo dongo, obiro fwenyo ni uhero Jehova kendo en bende obiro here.

GIK MUNYALO TIMO:

• Kwauru Nyasaye mondo omiu rieko mar tiego nyathiu

• Nwoneuru weche mudwaro ni ong’e mondo ochak ng’eyogi ka pod otin