Gitony e Lwet Jatelo Marach

Josef chiewo Maria mondo onyise wach moro ma dwarore ni otim mapiyo. Malaika mar Jehova oa fwenyore ne Josef e lek mowachone niya: “A malo, ikaw nyathi matinno gi min mare uring udhi Misri kendo ubed kuno nyaka chop amiu wach, nimar Herode chiegni manyo nyathino mondo onege.”​—Mathayo 2:13.

Gikanyono, Josef, Maria, gi wuodgi ringo gotieno mondo gitony. Gitimo kamano e kinde mowinjore nimar Herode osefwenyo ni jokor wachka owuonde. Nosewachonegi ni gidog ire mondo giterne wach. Kar mano, gin to ne gia ma ok gitimo kamano. Herode pong’ gi mirima. Pod oramo ni nyaka oneg Yesu, omiyo ochiko ni mondo oneg nyithindo duto ma yawuowi ma johigni ariyo ka dok chien monyuol Bethlehem kod alwora mare. Nochiko kamano bang’ goyo kwano ka luwore gi weche ma jokor wach ma ne oa yo Wuok-Chieng’ nosenyise motelo.

Nego yawuowi duto kamano en gima lit ahinya! Ok wanyal ng’eyo kwan mar yawuowi ma ne oneg, kata kamano nduru gi ywagruok malit ma mine nyithindogo nogoyo en gima chopo wach ma Jeremia janabi mar Nyasaye nokoro.​—Yeremia 31:15.

Mago duto yudo ka Josef gi joode oseringo nyaka Misri, kendo pod gidak kuno. E otieno moro, malaika mar Jehova fwenyore e lek ne Josef kendo. Malaikano wachone kama: “A malo, kaw nyathi matinno gi min mare mondo idog e piny Israel nikech joma ne dwaro ngima nyathino osetho.” (Mathayo 2:20) Omiyo, Josef koro ng’ado ni joode nyalo dok e pinygi. Kuom timo kamano, gichopo wach machielo ma Muma nokoro ni, Wuod Nyasaye ne idhi luong owuog Misri.​—Hosea 11:1.

Nenore ni Josef dwaro ni joode odhi odag Judea, ma nyalo bedo ni chiegni gi Bethlehem kama ne gidakie chon ka pok giringo gidhi Misri. Kata kamano, ofwenyo ni wuod Herode miluongo ni Akelao ma en ng’at marach e ma sani en ruodh Judea. E lek machielo, Nyasaye siemo Josef e wi wachno. Omiyo, Josef kod joode mako wuoth ma medo terogi nyandwat kendo gidak e taon mar Nazareth e alwora mar Galili, mabor gi Jerusalem kama weche mag lamo mar Jo-Yahudi itimoega. Yesu dongo e kind Jo-Nazareth, kendo mano chopo wach machielo ma ne okor niya: “Enoluonge ni Ja-Nazareth.”​—Mathayo 2:23.