Yesu Timo Honni Madongo Kapernaum

Yesu oa luongo jopuonjrene ang’wen, ma gin Petro, Andrea, Jakobo, kod Johana, mondo gibed jolupo mag ji. Koro en chieng’ Sabato kendo giduto gidhi e sunagogi man Kapernaum. Yesu puonjo e sunagogino, to ji hum kendo nikech yo ma opuonjogo. Opuonjogi kaka ng’at ma wechene oa kuom Nyasaye to ok kaka jondiko.

E Sabatoni, ng’at moro ma nigi jachien bende obiro. Ng’atno kok gi dwol maduong’ e i sunagogi kanyo niya: “En wach mane ma in-go kodwa, Yesu Ja-Nazareth? Ibiro mondo ikethwa, koso? Ang’eyi malong’o, ni in e Ng’at Maler mar Nyasaye!” Yesu kwero jachien man kuom ng’atno niya: “Ling’, kendo wuog ia kuome!”​—Mariko 1:24, 25.

Gikanyono, jachiendno goyo ng’atno piny kendo omiyo ng’atno gwecho matek koywak gi dwol maduong’. Kata kamano, jachiendno wuok kuom ng’atno “ma ok ohinye.” (Luka 4:35) Joma nie sunagogi wuoro ahinya! Omiyo, gipenjore kama: ‘Ma to ang’o? Otiyo gi teko e chiko kata mana jochiende to giwinje.’ (Mariko 1:27) Ok en gima kawowa gi wuoro ni wach motimoreno landore e alwora mar Galili duto.

Yesu kod jopuonjrene wuok e sunagogi kendo gidhi e dala Simon, ma bende iluongo ni Petro. Giyudo ka min chi Petro tuo ahinya gi tuo mar midhusi. Gisayo Yesu mondo ochange. Omiyo, Yesu dhi ire, kae to omako lwete kendo ochunge malo. Min chi Petro chango gikanyono, kendo ochako tiyo ne Yesu kod jopuonjre man kode, kendo nyalo bedo ni oikonegi chiemo.

Ka chieng’ chiegni podho, ji mowuok kuonde mopogore opogore kelo joggi matuo e od Petro. Mapiyo, chalo mana ka gima joma odak e taondno duto obiro mochokore e dhood Petro. Nikech ang’o? Gidwaro ni ochanggi. Adier en ni ‘ji duto ma ne nigi joma tuore nikech tuoche mopogore opogore kelogi ire. Kae to ochangogi koketo lwete e wi moro ka moro kuomgi.’ (Luka 4:40) Kuom adier, kata bed ni jogo nigi tuoche mage, Yesu changogi mana kaka ne okor. (Isaiah 53:4) Kata mana joma nigi jochiende bende ogolonegi. Sama jochiendego wuok kuom ji, gikok niya: “In e Wuod Nyasaye.” (Luka 4:41) Kata kamano, Yesu kwerogi kendo ok oyienegi gimed wuoyo. Jochiendego ong’eyo ni Yesu e Kristo kendo ni ok odwar ni giwuondre ka gima gitiyo ne Nyasaye madier.