Gimomiyo Weyo ne Ji Richo Dwarore

Petro oa winjo ka Yesu chiwo puonj e wi gima owete ma nigi ywaruok e kindgi onego otim. Yesu nojiwogi ni gitem tieko ywaruok ma gin-go e kindgi ji ariyo mondi. Kata kamano, nenore ni Petro diher ng’eyo ni ng’ato onego otim kinda mar loso ywaruok ma kamano nyadidi.

Petro penjo Yesu kama: “Ruoth, owadwa onego otimna richo nyadidi to aweyone aweya? Nyadibiriyo, koso?” Moko kuom jotend din puonjo ji ni ng’ato onego owe ne nyawadgi richo nyadidek. Omiyo, nyalo bedo ni Petro paro ni onyalo timo maber moloyo ka oweyo ne nyawadgi “nyadibiriyo.”​—Mathayo 18:21.

Kata kamano, Yesu ok puonj ni ng’ato onego okwan ndalo ma nyawadgi okethonee. Omiyo, orieyo Petro kama: “Awachoni ni, ok nyadibiriyo, to nyadi 77.” (Mathayo 18:22) Tiend wechego en ni onge giko mar timo kamano. Kuom mano, Petro ok onego ool weyo ne wadgi richo, nimar timo kamano onge gi giko.

Kae to Yesu goyo ngero ma konyo Petro kod jomamoko ng’eyo gimomiyo nyaka giwe ne ji richogi. Ngerono en mar misumba moro ma ok luw ranyisi mar ruodhe ma nigi kido mar kecho ji. Ruodhno dwaro nono kwan pesa gi wasumbnine. Ikelone misumba moro ma nigi gope maduong’ ma romo talanta 10,000 [dinari 60,000,000]. Misumbano onge nyalo mar chulo gowino. Omiyo, ruodhno chiko ni ous misumbano, gi chiege, kod nyithinde, eka oyud pesa michulogo gowino. Gikanyono, misumbano podho e tiend ruodhe kosaye kama: “Hori ahoya koda, abiro chuli duto.”​—Mathayo 18:26.

Ruodh misumbano keche kendo timone ng’wono kuom weyone gowi maduong’no. Mapiyo ka ruodhno osetimo kamano, misumbano wuok kanyo kendo oyudo misumba wadgi ma nigi gope ma romo dinari 100. Omako misumba wadgino kendo ochako deye kowachone niya: “Chula gopa duto.” To misumba ma nigi gopeno podho piny e tiende ka saye kama: “Hori ahoya koda, abiro chuli.” (Mathayo 18:28, 29) Kata kamano, misumba ma ruodhe noweyone gopecha ok luw ranyisi mar ruodheno. Omiyo, misumba wadgi ma nigi gope matin ahinya iwito e jela nyaka chieng’ ochul gowi ma en-go.

Kae to Yesu medo wacho ni bang’ neno gima misumba ma ok kech nyawadgino otimo, wasumbni mamoko dhi kendo ginyiso ruodhgi. Ruodhgino bedo gi mirima kendo ochiko ni oluongne misumbano. Owacho ne misumbano niya: “In misumba marach, ne aruchoni gowi duto kane isesaya. Donge in bende nonego ikech misumba wadu kaka ne akechi?” Ruoth ma nigi mirimano chiwo misumba ma ok okecho nyawadgino e lwet jojela nyaka chieng’ ochul gowi duto ma en-go. Yesu tieko ka wacho kama: “Kamano e kaka Wuora manie polo bende biro timonu ka ng’ato ka ng’ato kuomu ok we ne owadgi richo koa e chunye.”​—Mathayo 18:32-35.

Donge mano puonj maber ahinya e wi weyo ne jomoko richogi? Nyasaye oseweyonwa richo ma en kaka gowi maduong’ ahinya. Ketho moro amora ma Jakristo wadwa nyalo timonwa en gima tin ahinya kopim gi richo ma wan-go. Jehova weyonwaga richowa nyading’eny, to ok nyadichiel kende. Donge onego wawe ne owadwa kethone nyading’eny kata bed ni ochwanyowa maromo nade? Mana kaka Yesu nopuonjo e twak ma nogolo e Got, Nyasaye biro ‘weyonwa gopewa kaka wan bende waweyo ne jogopewa.’​—Mathayo 6:12.