Chan Weche Chon Kitiyo gi Rieko

Yesu eka oa goyo ngero mar wuowi ma ne olal. Ngerono ne onego okony josol osuru, jondiko, gi Jo-Farisai ma ne winje mondo ging’e ni Nyasaye oikore weyo ne joricho moloko chunygi moweyo richogi. (Luka 15:1-7, 11) Sani to koro Yesu goyo ngero machielo ne jopuonjrene. Ngerono en mar ng’at moro ma jamwandu ma fwenyo ni jarit mochung’ ne mwandune, ok osebedo ka rito mwandugo maber.

Yesu wacho ni osedonj ne jaritno nikech oketho mwandu mag ruodhe. Omiyo, jamwanduno ng’ado ni obiro riembo jarit mochung’ ne mwanduneno. Jaritno parore niya: “En ang’o ma abiro timo nikech koro ruodha ero maya tij chung’ ne mwandune? Aonge gi teko moromo ma dapurgo kendo wich-kuot ok nyal yiena kuecho.” Mondo oikre ne gima nyalo timorene bang’e, ong’ado paro kama: “Aseng’eyo gima abiro timo eka mondo kosegola e tij chung’ ne mwandu ruodha, ji biro rwaka e utegi.” Gikanyono, oluongo jogo duto ma nigi gop ruodhe. Kae to openjo moro ka moro kuomgi niya: “In gi gop ruodha ma romo nade?”​—Luka 16:3-5.

Jagowi mokwongo dwoke niya: “Mor zeituni moromo gige pimo mia achiel.” Mago nyalo romo mo lita 2,200. Nyalo bedo ni jagowino ne nigi puodho maduong’ mar yiend zeituni, kata ni ne en ja ohand mor zeituni. Jaritno wacho ne jagowino kama: “Kaw barupi mar winjruok ma ne undikorugo kendo ibed piny, kae to indikie mapiyo ni in gi 50 [lita 1,100].”​—Luka 16:6.

Jaritno penjo jagowi machielo niya: “In to in gi gowi ma romo nade?” Ng’atno dwoke kama: “Ngano ma romo gige pimo madongo mia achiel.” Mago nyalo romo kilo 22,000 kama. Jaritno nyiso jagowino niya: “Kaw barupi mar winjruok ma nundikrugo kae to indikie ni in gi 80.” Jaritno duoko gope chien gi gige pimo 20.​—Luka 16:7.

Nikech jaritno e ma pod ochung’ ne mwandu mag ruodhe, inyalo wach ni en gi teko mar duoko piny gope ma jomoko onego ochul ruodhe. Kata kamano, mano kelone ber mane? Sama oduoko piny gope ma jomoko nigo kamano, jaritno loso osiep gi joma chieng’ moro nyalo konye bang’e ka oseriembe e tich.

Bang’ kinde, ruodh jaritno fwenyo gima osebedo ka timore. Kata obedo ni okang’ ma jaritno osekawo okelo ne ruodhno asara moro, ruodhno mor kendo opwoyo jaritno nimar “kata obedo ni ne ok en ng’at makare, notiyo gi rieko.” Yesu medo kama: “Nyithind ndaloni ong’eyo tiyo e yo mariek ahinya gi jotieng’gi giwegi, moloyo kaka nyithind ler timo.”​—Luka 16:8.

Ngerono ok nyis ni Yesu oyie gi gima jaritno notimo. Bende, ok otem puonjo ni ji obed jomibadhi e timo gik moko. To kare wach maduong’ mopuonjo en mane? Ojiwo jopuonjrene kama: “Losuru osiep kutiyo gi mwandu ma ok kare mondo ka mwandugo orumo, ginirwaku e kuonde dak ma nyaka chieng’.” (Luka 16:9) Ee, opuonjo ni ber mondo wabed joma neno nyime kae to wati gi rieko sama waikore ne kindeno. Jotich Nyasaye ma gin “nyithind ler” onego oti gi mwandugi e yo mariek, e yo ma biro miyo giyud ngima ma nyaka chieng’.

Jehova Nyasaye kod Wuode kende e joma nyalo rwako ng’ato e Pinyruodh polo, kata e Paradiso ma nobed e piny e bwo Pinyruodhno. Onego watim kinda mondo walos kodgi osiep ka watiyo gi mwanduwa manie piny e riwo lwedo tij yalo wach maber mar Pinyruodhno. Mano biro miyo wayud ngima mochwere kata obedo ni dhahabu, fedha, kod mwandu mamoko mag pinyni biro rumo kendo lal nono.

Yesu wacho bende ni jogo migeno nikech gitiyo maber gi mwandu mag pinyni, bende ibiro gen kuom weche madongo moloyo. Yesu wacho kama: “Kuom mano, ka pok unyiso uwegi ni un joma igeno kuom wach mwandu ma ok kare, en ng’a ma biro ketou e wi mwandu madier [kaka tij Pinyruoth]?”​—Luka 16:11.

Yesu temo nyiso jopuonjrene ni mondo orwakgi “kuonde dak ma nyaka chieng’,” nitie gik mathoth ma biro dwarore ni gitim e okang’ momedore. Ng’ato ok nyal bedo jatich madier mar Nyasaye ka gie kindeno bende en misumba mwandu ma ok kare mag pinyni. Omiyo, Yesu tieko kowacho kama: “Onge jatich ma nyalo bedo misumba ruodhi ariyo, nimar obiro sin gi moro to ohero machielo, kata obiro makore gi moro to ochayo machielo. Ok unyal bedo wasumbni mag Nyasaye kendo mag Mwandu.”​—Luka 16:9, 13.