Yesu Tiyo gi Yadh Ng’owo e Puonjo Wach Yie

Ka Yesu osewuok Jerusalem chieng’ Wuok Tich godhiambo, odok Bethania man yo wuok chieng’ mar Got Zeituni. Nenore ni onindo e dalagi Lazaro, Maria, kod Maritha ma gin osiepene.

Koro Nisan 11 gokinyi osechopo. Yesu kod jopuonjrene mako wuoth mochomo Jerusalem kendo. To mae dhi bedo odiechienge mogik mar bedone e hekalu. Kendo chieng’no e ma en odiechienge mogik moyalogo e lela ka pok ochamo Pasaka, chako nyasi mar Rapar mar thone, kae to gikone iyale kendo inege.

Sama gia Bethania ka gichomo Jerusalem, ging’ado Got Zeituni. Petro neno yath ma Yesu nyoro okuong’o gokinyicha. Ohum kama: “Rabi, nee! yadh ng’owo ma nyoro ikuong’ocha osener.”​—Mariko 11:21.

To Yesu nomiyo yadhno oner nikech ang’o? Dwoko mochiwo nyiso gimomiyo. Odwoko niya: “Adier awachonu ni, ka un gi yie ma ok uriw gi kiawa, ok ubi timo mana gima aa timo ne yadh ng’owono kende, to kata ka uwacho ne godni ni, ‘Mukri idhi inyumri e nam,’ to mano biro timore. Kendo gik moko duto mukwayo e lamo, ka un gi yie, unuyud.” (Mathayo 21:21, 22) Omiyo, nenore ni onwoyo wach ma nosewacho motelo ni ng’at ma nigi yie nyalo daro kata mana got.​—Mathayo 17:20.

Kuom mano, Yesu nonero yadhno mondo ochiw puonj ni bedo gi yie kuom Nyasaye dwarore. Owacho kama: “Gik moko duto mulamo ka ukwayo, beduru gi yie ni useyudogi, to unuyudgi.” (Mariko 11:24) Donge mano en puonj maber ahinya ne jolup Yesu duto? To puonjno nyalo jiwo joote ahinya nikech tembe kod sand mochomogi nyime. Kata kamano, nitie tudruok machielo e kind yadh ng’owo ma ne onerno kod kit yie ma ng’ato nyalo bedogo.

Mana kaka yadh ng’owono ne nenore gi oko ni onyalo bedo gi olemo, oganda mar Jo-Israel bende wuondore awuonda gi oko ni giluoro Nyasaye. Jo ogandano nie singruok gi Nyasaye, kendo mano miyo ginenore gi oko ni giluwo Chik Nyasaye. Kata kamano, ogandano duto osenyiso ni gionge yie kendo ni ok ginyag olembe mabeyo. Gitamore rwako kata mana Wuod Nyasaye owuon! Omiyo, sama Yesu onero yadh ng’owo ma ok nyag olemono, otimo kamano mondo onyisgo gima biro timore ne oganda ma ok nyag olemo kendo ma onge yieno.

Bang’ kinde machuok, Yesu kod jopuonjrene chopo Jerusalem. Mana kaka ojatimoga, Yesu donjo e hekalu kendo ochako puonjo ji. Nenore ni wi jotend-jodolo kod jodongo mag oganda pok owil gi kaka Yesu nyoro oriembo jowil pesa e hekalu. Omiyo, gipenje e yor achaya kama: “Itimo gigi gi ratiro mane? Kata en ng’a momiyi ratiro mar timo gigi?”​—Mariko 11:28.

Yesu dwokogi niya: “Abiro penjou penjo achiel. Dwokauru eka abiro wachonu ni atimo gigi gi ratiro mane. Batiso ma Johana ne timo, ne en moa e polo koso moa kuom dhano? Dwokauru.” Sani koro joma kwedego e ma dhogi omoko. Kuom mano, jodolo kod jodongo riwo paro kaachiel mondo ging’e kaka digidwoke. Giwacho e kindgi kama: “Ka wadwoke ni, ‘Ne en moa e polo,’ obiro penjowa ni, ‘Kare ang’o momiyo ne ok uyie kuome?’ To nade ka wadwoke ni, ‘Ne en moa kuom dhano’?” Giwacho kamano nikech giluoro oganda “nimar oganda duto ne oyie ni Johana en janabi adier.”​—Mariko 11:29-32.

Onge dwoko malong’o ma joma kwedo Yesugo nyalo chiwo. Omiyo, gidwoke kama: “Ok wang’eyo.” Mano e momiyo Yesu bende wachonegi niya: “An bende ok abi wachonu ni atimo gigi gi ratiro mane.”​—Mariko 11:33.