Kristo Ng’ado Bura ne Rombe gi Diek

Yesu oa goyo ngero mar nyiri ma silili apar kod ngero mar talanta ka en e Got Zeituni. Ere kaka otieko dwoko penjo ma jootene ne openje e wi ranyisi ma biro nyiso ndalo ma entie e loch kendo ni giko mar ndalo okayo machiegni? Odhi nyime dwokogi kuom goyo ngero moro mogik ma en ngech rombe gi diek.

Yesu chako konyisogi kinde ma weche manie ngerono timoree. Owachonegi kama: “Ka Wuod dhano obiro e duong’ne, kendo ka malaike duto ni kode, eka nobed e kom-lochne ma nigi duong’.” (Mathayo 25:31) Yesu nyiso maler ni enie jal manie kom-loch ma biro e duong’ne ka luwore gi ngerono. Kinde mang’eny, ne ojaluongore ni “Wuod dhano.”​—Mathayo 8:20; 9:6; 20:18, 28.

To weche manie ngerono biro chopo karang’o? Wechego biro timore e kinde ma Yesu ‘nobie e duong’ne’ kanyachiel gi malaike kendo bet “e kom-lochne ma nigi duong’.” Noyudo osewacho ni “Wuod dhano [dhi] biro e boche polo ka en gi teko mang’ongo kod duong’” kanyachiel gi malaikene. Mano dhi bedo kinde mane? “Mapiyo bang’ masira” ma ne okor. (Mathayo 24:29-31; Mariko 13:26, 27; Luka 21:27) Kuom mano, ngerono dhi timore e kinde ma Yesu nobie e duong’ne. Obiro kawo okang’ mane e kindeno?

Yesu lero kama: “Ka Wuod dhano obiro . . . ibiro chok ogendni duto e nyime, eka obiro pogo ji koketogi e kidienje ariyo mana kaka jakwath pogo rombe gi diek. Kendo noket rombe e bade korachwich to diek koracham.”​—Mathayo 25:31-33.

Yesu wuoyo e wi joma oguedh ma gin kaka rombe kowacho niya: “Eka Ruoth nowach ne joma ni e bade korachwich niya: ‘Biuru, un joma Wuora oseguedho, yuduru pok mar Pinyruoth moseiknu nyaka a chakruok mar piny.’” (Mathayo 25:34) Iparo ni ang’o momiyo Ruoth mor gi joma gin kaka rombego?

Ruoth owuon lero kama: “Kane adenyo ne umiya chiemo; kane an gi riyo ne umiya gima ne anyalo madho. Kata obedo ni ne ok ung’eya, ne urwaka; kane an duk, ne umiya nanga. Kane atuo, ne ukonya. Kane an e jela, ne ulima.” Ka “joma kare” ma gin kaka rombego penje ni gik mabeyogo ne gitimone e yo mane, odwokogi niya: “E okang’ ma ne utimogo gigi ne ng’at matinie mogik kuom owetenagi, nutimona.” (Mathayo 25:35, 36, 40, 46) Gik mabeyogo ok gitim ka gin e polo nimar joma tuo gi joma odenyo onge kuro. Omiyo, nyaka bed ni gik ma gitimogo, gitimo ne owete Kristo manie piny.

To nade joma gin kaka diek ma ne oket e bade koracham? Yesu wuoyo e wigi niya: “Eka [Ruoth biro] wacho ne joma ni e bade koracham kama: ‘Auru kuoma, un joma osekuong’ mondo odhi e mach ma nyaka chieng’ moseik ne Jachien kod malaikene. Nimar kane adenyo, ne ok umiya chiemo; kendo kane an gi riyo, ne ok umiya gima damadh. Kane ok ung’eya, ne ok urwaka; kane an duk, ne ok umiya nanga; kane atuo kendo kane an e jela, ne ok ukonya.’” (Mathayo 25:41-43) Ing’ado ne diek bura ma kamano nikech ne ok gitimo ne owete Kristo manie piny e yo mang’won.

Joote Yesu fwenyo ni joma ibiro ng’adnegi bura e kindeno biro yudo gueth mochwere, to moko biro yudo kethruok mochwere. Yesu wachonegi kama: “Eka [Ruoth] nodwokgi kama: ‘Adier awachonu ni, e okang’ ma ok nutimogo gigi ne achiel kuom joma tindoe mogikgi, ok nutimona.’ Jogi biro dhi e kethruok mochwere to joma kare biro donjo e ngima ma nyaka chieng’.”​—Mathayo 25:45, 46.

Dwoko ma Yesu osemiyo jootene miyo jolupne weche ma koro ginyalo paroe matut mondo mi ginon kitgi gi timbegi giwegi.