Lamo ma Yesu Tiekogo Nyasi ma Gitimo e Ot ma Malo

Nikech Yesu ohero jopuonjrene ahinya, osebedo koikogi nimar ochiegni wegi kodhi e polo. Koro oting’o wang’e kong’iyo polo kae to ochako lemo kokwayo Wuon mare kama: “Mi wuodi duong’ mondo wuodi omiyi duong’ mana kaka isemiye teko e wi ji duto, eka mondo ochiw ngima ma nyaka chieng’ ne jogo duto ma isemiye.”​—Johana 17:1, 2.

Kuom adier, Yesu nyiso e lamono ni miyo Nyasaye duong’ en gima dwarore ahinya. To donge en gima ber ni e lamono Yesu wuoyo kuom ngima ma nyaka chieng’ ma en geno ma jaber miwuoro? Nikech osemi Yesu “teko e wi ji duto,” koro misango mare mar waro ji nigi teko mar kelo ber ne oganda dhano duto. Kata kamano, ok ji duto ma misangono biro konyo. Ang’o momiyo en kamano? Mano en nikech Yesu biro chiwo gueth mag misangone mana ne jogo ma timo ka luwore gi weche ma omedo wacho e lamono. Owacho kama: “Ma e ngima ma nyaka chieng’, ni ging’eyi in Nyasaye makende mar adier kod jal ma ne ioro, Yesu Kristo.”​—Johana 17:3.

Ng’ato nyaka ng’e Wuoro kod Wuode e yo malong’o chuth, mi omak osiep maber kodgi. Ng’atno nyaka bed gi paro ma chalo gi margi e yo ma ginenogo gik moko. E wi mano, nyaka ng’at ma kamano tem ahinya luwo ranyisi mar Wuoro gi Wuode. Onego otem nono kaka gitimo ne jomamoko kae to oluw kitgi mabeyo ahinyago. Kendo nyaka ong’e ni miyo Nyasaye duong’ e gima duong’ moloyo yudo ngima ma nyaka chieng’. Yesu koro dok e wach maduong’ mar lamone.

Owacho kama: “Asemiyi duong’ e piny, nimar asetieko tich ma nimiya mondo atim. Omiyo, koro Wuora, miya duong’ e bathi, duong’ ma chal gi ma ne an-go e bathi kane piny pok obetie.” (Johana 17:4, 5) Ee, Yesu kwayo ni oduokne duong’ ma ne en-go e polo bang’ kosechiere.

Kata kamano, wi Yesu pok owil gi gik mosechopo e piny kotiyo ne Nyasaye. Owacho e lamono kama: “Asemiyo nyingi ong’ere ne joma ne imiya koa e piny. Ne gin meki, to ne imiyagi, kendo giserito wachni.” (Johana 17:6) Yesu ne ok ohulo ahula ne ji nying Nyasaye ma en Jehova sama noyalo kae to oweyo gi kanyo. Ne okonyo jootene bende mondo ging’e kido ma Nyasaye nigo kod yo ma otimogo ne dhano gik moko.

Koro jootene oseng’eyo Jehova, migawo ma Wuode nigo, kaachiel gi weche ma Yesu osebedo ka puonjo. Yesu lemo konyiso bolruok niya: “Asechiwonegi weche ma ne imiya, mi ne girwakogi, kendo kuom adier giseng’eyo ni ne abiro e loyi kendo giseyie ni niora.”​—Johana 17:8.

Kae to Yesu nyiso ni ong’eyo ni jolupne opogore gi jopiny. Olamonegi kama: “Akwayo nikech gin; ok akwa ne piny, to akwayo nikech jogo misemiya, nimar gin jogi . . . Wuora Maler, ritgi nikech nyingi iwuon misemiya, mondo gibed achiel mana kaka wan kodi wan achiel. . . . Aseritogi maber, mi onge kata achiel kuomgi mosekethore mak mana wuod kethruok.” Tiende ni Judas Iskariot, ma dwaro dhi ndhogo Yesu.​—Johana 17:9-12.

Yesu medo lemo kowacho kama: “Piny osin kodgi. . . . Ok akwayi ni mondo igolgi e piny, to mondo iritgi nikech Ng’at Marach. Ok gin mag piny, mana kaka an ok an mar piny.” (Johana 17:14-16) Kata obedo ni joote kaachiel gi jopuonjre mamoko ni e piny ma oganda dhano ma Satan locho e wigi odakie, jolup Yesugo to nyaka sik kopogore gi timbe maricho mag jopinygo. E yo mane?

Nyaka gisik ka giler e tiyo ne Nyasaye kuom luwo adiera ma yudore e Ndiko mag Dho-Hibrania (Muma Machon) kaachiel gi weche ma Yesu owuon osepuonjo. Yesu lemonegi kama: “Pwodhgi gibed maler kokalo kuom adiera; wachni en adiera.” (Johana 17:17) Bang’ kinde, moko kuom jootego biro ndiko buge mokudh gi much Nyasaye ma gin buge ma bende biro bedo moko kuom “adiera” ma nyalo pwodho ng’ato mondo obed maler.

Kata kamano, kinde biro ma jomamoko bende biro rwako “adiera.” Mano e momiyo Yesu lamo niya: “Ok akwa ne jogi kende [joma ni kanyo], to bende ne joma keto yie kuoma kokalo kuom wachgi.” En ang’o ma Yesu kwayo ne jogo duto? Okwayo kama: “Mondo eka giduto gibed achiel, mana kaka in, Wuora, in e winjruok achiel koda, kendo an e winjruok achiel kodi, mondo gin bende gibed e winjruok achiel kodwa.” (Johana 17:20, 21) Ng’ato nyalo paro ni wechego nyiso ni Yesu kod Wuon mare gin ng’ato achiel. Ndikono wacho ni gin achiel nimar gibedo e winjruok achiel e weche duto. Yesu lamo ni mad jolupne bende obed gi winjruok achiel kamano.

Yesu noyudo osenyiso Petro kod jowetene mamoko ni owuok odhi mondo oiknegi kar dak, tiende ni e polo. (Johana 14:2, 3) Koro Yesu dok e wachno kendo sama olamo. Olemo kama: “Wuora, adwaro ni joma isemiya obed kama antieree, mondo gine duong’ misemiya, nimar ne ihera ka chakruok mar piny ne podi.” (Johana 17:24) Wechenego nyiso maler ni chon ahinya kane Adam gi Hawa pok onyuolo nyathi moro amora, Wuod Nyasaye ma miderma ma bang’e nobedo Yesu Kristo to ne nitierega, kendo Nyasaye ne ohere ahinya.

Yesu tieko lamoneno kojiwo kendo wach nying Wuon mare kod hera ma Nyasaye Wuoro oherogo jootene kaachiel gi jomamoko ma bende biro rwako “adiera” bang’e. Owacho kama: “Asemiyo nyingi ong’erenegi kendo abiro miyo omed ng’ere, mondo eka hera ma ne iherago obed kuomgi, kendo abed e winjruok achiel kodgi.”​—Johana 17:26.