Petro Kwer ni Ok Ong’eyo Yesu Sama Gin e Od Kayafa

Ka osemak Yesu e puodho mar Gethsemane, jootene ringo kendo weye nikech giluor. Kata kamano, ariyo kuom jootenego to orem gi e kor yo. Gin Petro “kaachiel gi japuonjre moro machielo,” ma nenore ni en jaote miluongo ni Johana. (Johana 18:15; 19:35; 21:24) Nenore ni mano dhi konyogi yudo kitero Yesu ir Anas. Sama Anas chiko mondo oter Yesu ir Kayafa Jadolo Maduong’, Petro gi Johana luwogi gi chien. Nenore ni giluor ni inyalo neggi, to e iyeno bende gidwaro ng’eyo gima dhi timore ne Ruodhgi.

Nikech Kayafa jadolo maduong’ ong’ere gi Johana, mano miyo iyie ne Johana donjo mayot nyaka e laru mar dala Kayafa. Petro to odong’ oko e rangach. Chuno Johana mondo oduog owuo gi nyako ma rito rangach. Kae to iyie ne Petro bende mondo odonj.

Piny ng’ich ahinya gotienono. Omiyo, ji oyo mach e laru mar dalano. Petro bende oyo kodgi majno sama pod orito “mondo one gima dhi timore” ne Yesu. (Mathayo 26:58) Koro, nyako ma ne oyie ne Petro donjo e rangachcha neno Petro maber nikech ler mar mach ma liel. Omiyo, openjo Petro kama: “In bende in achiel kuom jopuonjre ng’atni, koso?” (Johana 18:17) To jomamoko bende fwenyo Petro kendo giwacho ni en bende en achiel kuom jolup Yesu.​—Mathayo 26:69, 71-73; Mariko 14:70.

Wachno miyo Petro bedo gi luoro ahinya. Omiyo, otemo kaka donyal mondo opond, kotemo kata mana walore kochomo yo rangach. Kuom mano, owacho ni en ne ok en-ga gi Yesu. Chopo kama owacho kata mana kama: “Ok ang’eye, to bende ok awinj tiend gima itemo wacho.” (Mariko 14:67, 68) Ochako kata mana “kuong’ore.” To mano nyiso ni oikore kata mana tho koyud ni oriambo.​—Mathayo 26:74.

Gie kinde ma mago timore, buch Yesu to pod dhi nyime gi kama oting’ore malo e od Kayafa. Petro kod jomamoko man mwalo ka rito ng’eyo gima dhi nyime, nyalo neno ka joneno mopogore opogore donjo to a.

Yo ma Petro wuoyogo miyo ji fwenyo ni en Ja-Galili kendo mano nyiso ni kwer mokwergono ok en adier. E wi mano, achiel kuom joma ni kanyo en wat Malko, jal ma Petro nong’ado ite oko. Omiyo, ng’atno donjo ne Petro niya: “Donge nende aneni e puodho kode?” Sama Petro kwer mar adek ni ok ong’eyo Yesu, thwon-gweno kok mana kaka nosekor.​—Johana 13:38; 18:26, 27.

Nenore ni gie sechego, Yesu ni kama oting’ore malo e nyim laru mar od Kayafa. Ruoth lokore kae to ong’iyo Petro tir kendo nenore ni mano chwoyo chuny Petro sidang’. Petro paro gima Yesu nende owachone seche moko manok motelo ka gin e ot ma malo kama ne gitimoe nyasi. Parie kaka chuny Petro chande bang’ fwenyo ni oa kwer ni ok ong’eyo Yesu! Petro wuok kae to odhi oko kendo oywak kuro malit.​—Luka 22:61, 62.

Petro en jal ma ne osenyiso ni en gi yie motegno kendo ma nomakore gi Ruodhe ahinya. Obet nade ni Petro ne nyalo kwer ni ok ong’eyo Yesu? Nee ni ji hango ne Yesu wach kendo gitimone mana kaka ditim ne ng’at moketho chik. Mano e sama dwarore ni Petro omakree motegno gi jal ma onge ketho, to e ma olokoe ng’eye ne Ng’at ma nigi “weche mag ngima ma nyaka chieng’!”​—Johana 6:68.

Gima lit ma ne otimore e wach Petrono nyiso ni kata mana ng’at motegno e yie kendo ma jakinda nyalo kier ka ok oikore malong’o ne tembe gi obadho ma nyalo poye. Mad waduto ma wan jotich Nyasaye wayud puonj kuom gima ne otimore ne Petrono!