Ji Miche Neno Yesu ka Chieng’ Pentekost Podi

Bang’ ka osechier Yesu, ochano mondo orom gi jootene 11 e got moro man Galili. Jopuonjre mamoko ma dirom 500 kama bende ni kanyo. To moko kuomgi chon ne niga gi kiawa kuome. (Mathayo 28:17; 1 Jo-Korintho 15:6) Kata kamano, gima Yesu dhi wachonegi sani biro miyo gibed gadier chuth ni koro ongima.

Yesu leronegi ni Nyasaye osemiye teko duto e polo kendo e piny. Ojiwogi kama: “Kuom mano, dhiuru e ogendni duto mondo ulok ji obed jopuonjrena, kubatisogi e nying Wuoro, gi mar Wuode, kod mar roho maler, kendo kupuonjogi rito weche duto ma asechikou.” (Mathayo 28:18-20) Ee, en adier ni Yesu ngima. To ok mano kende, pod doher ahinya ni oyal ne ji wach maber.

Jolup Yesu duto moriwo chwo, mon, gi nyithindo, omi migawo mar yalo wach maber kendo loko ji obed jopuonjre Yesu. Jo akwede nyalo temo geng’ogi mondo kik giyal kendo gipuonj ji wach maber. To e ma Yesu pod jiwogi kama: “Osemiya teko duto e polo kod piny.” Jip momiyo jolupnego nyalo miyo gibed gi geno mane? Owachonegi niya: “Neuru! An kodu kinde duto nyaka e giko mar ndalo.” Yesu ok tem wacho ni jogo duto ma biro yalo wach maber ibiro mi nyalo mar timo honni. Kata kamano, roho maler biro sirogi.

Omiyo, inyalo wach ni Yesu fwenyore ne jopuonjrene “kuom ndalo 40” duto bang’ chierne. Osebedo korwako ringre dhano e kido mopogore opogore kendo ‘konyisore owuon ne jogo kokalo kuom yore mang’eny ma siro ratiro ni ongima’ kendo kopuonjogi “wach Pinyruodh Nyasaye.”​—Tich Joote 1:3; 1 Jo-Korintho 15:7.

Nenore ni ka joote pod ni Galili, Yesu chikogi ni gidog e taon mar Jerusalem. Bang’ romo kodgi e taondno, owachonegi kama: “Kik ua Jerusalem, to sikuru ka urito gima Wuora osesingo, ka luwore gi wach ma ne uwinjo koa kuoma; adier, nikech Johana ne batiso ji gi pi, un to ibiro batisu gi roho maler bang’ ndalo manok chakre sani.”​—Tich Joote 1:4, 5.

Yesu romo kendo bang’e gi jootene. Kae to oterogi ‘oko nyaka Bethania’ man yo wuok chieng’ mar Got Zeituni. (Luka 24:50) Kata obedo ni Yesu osenyisogi maler ni obiro weyogi, gin to pod giparo ni Pinyruoth ma Yesu biro lochoe biro bedo e piny ka.​—Luka 22:16, 18, 30; Johana 14:2, 3.

Jootego penjo Yesu niya: “Ruoth, be ma e kinde ma idwaro duokoe pinyruoth ne Israel?” Odwokogi mana ni: “Ok en ting’ maru mondo ung’e kinde kata ndalo ma Wuora owuon e ma nie gi ratiro.” Kae to ojiwonegi kendo tich monego gitim kowachonegi kama: “Ubiro yudo teko ka roho maler obiro kuomu, mi unubed jonenona e Jerusalem, kod Judea duto, gi Samaria, kendo nyaka kuonde maboyo mogik e tung’ piny.”​—Tich Joote 1:6-8.

Joote pod ni e Got Zeituni sama Yesu chako idho malo e polo. Mapiyo nono, boche polo imo Yesu ma koro ok ginyal nene. Bang’ chierne, Yesu nosebedo ka rwako ringruok mar dhano e kido mopogore opogore. Kata kamano, gie sani to orwako del mar polo kendo mano e ma oidhogo malo e polo. (1 Jo-Korintho 15:44, 50; 1 Petro 3:18) Sama joote mochung’ motegnogo pod ng’iyo Yesu ka dhi, gipo ka “ji ariyo morwakore gi lewni ma rochere” ochung’ e bathgi. Jogo gin malaike morwako ringruok mar dhano, kendo malaikego penjogi kama: “Un Jo-Galili, ang’o momiyo uchung’ ka ung’iyo polo? Yesuni ma oseidho malo koa kuomu, obiro duogo mana e yo ma chal gi kaka useneno koidho e polo.”​—Tich Joote 1:10, 11.

Yesu nowuok e piny ma ok onyisore e lela ne ji duto ni ero owuok. Jolupne ma ne ochung’ motegno kende e ma ne onene kodhi. Obiro duogo “mana e yo ma chal” gi ma jootenego ne onenego kodhi, tiende ni ma ok onyisore ne ji duto. Mano nyiso ni mana jolupne mochung’ motegno kende e ma biro fwenyo ni koro entie kendo osekete ruoth e Pinyruoth.

Bang’ mano, joote duogo Jerusalem. Kuom odiechienge ma luwo, gichokore gi jopuonjre mamoko moriwo nyaka “Maria min Yesu gi owete Yesu.” (Tich Joote 1:14) Jopuonjrego duto siko ka lemo gi kinda. Achiel kuom weche ma gikwayo e lamo en kaka ginyalo yiero japuonjre moro ma nyalo kawo kar Judas Iskariot mondo kwan mar joote obed 12 kendo. (Mathayo 19:28) Gidwaro ni giyier japuonjre mosebedo ka neno tije ma Yesu osebedo ka timo kendo mosenene bang’ chierne. Ma e kinde ma ndiko wuoyoe mogik kuom wach goyo ombulu mondo ong’ego dwach Nyasaye. (Zaburi 109:8; Ngeche 16:33) Ombulu lwar ne Mathia ma nyalo bedo ni en achiel kuom jopuonjre 70 ma Yesu nooro mondo odhi oyal. Omiyo, koro ‘ikwane kanyachiel gi joote 11 mamokogo.’​—Tich Joote 1:26.

Odiechienge apar bang’ ka Yesu oseidho malo e polo, chieng’ Sawo mar Pentekost mar Jo-Yahudi ma higa mar 33 chopo. Chiegni jopuonjre 120 ochokore Jerusalem e ot moro ma malo. Apoya nono, koko moro a e polo ma chal gi mar yamo ma kudho matek kendo pong’o odno duto. Gik ma liel kaka mach ma chal gi lep nenorenegi, kendo moro ka moro pio kuom ng’ato ka ng’ato. Jopuonjrego chako wuoyo e dhok mopogore opogore. Mano e sama iolonegie roho maler ma Yesu nosingonegi!​—Johana 14:26.