Riwruok ma Timo Dwach Jehova

RIWRUOGE odhuro e piny ma sani. Riwruogego gin kaka mag din, mag siasa, mag ohelni, kata mag osiepe. Gihinyo bedo gi timbe, dwaro, paro, kata puonj mopogore opogore. Kata kamano, nitiere riwruok moro achiel mopogore kod mamokogo duto. Wach Nyasaye konyowa ng’eyo ni riwruok mopogore kodgino en oganda mar Joneno mag Jehova.

² En gima ber ni in bende isekawo okang’ mar riwori gi Joneno mag Jehova. Mano en nikech iseng’eyo gadier gino ma dwaro mar Nyasaye en, kendo koro sani itimo dwache. (Zab. 143:10; Rumi 12:2) Sani in jatich Nyasaye ma tiyo kanyachiel gi riwruok duto mar owete moherore e piny mangima. (2 Kor. 6:4; 1 Pet. 2:17; 5:9) Mana kaka Wach Nyasaye singonwa, timo kamano keloni gueth kod mor mogundho. (Nge. 10:22 New World Translation; Mar. 10:30) Timo dwach Jehova sani ma ok iwe, miyo iketo mise mogurore motegno ne kinde ma biro ma jaber.​—1 Tim. 6:18, 19; 1 Joh. 2:17.

³ Jachuechwa ma en Jehova Nyasaye nigi riwruok makende e piny mangima ma en e ma ochiko. Mano nyiso ni gik moko duto ni e bwoye. Wan gi geno kuome chuth nimar en e Jang’adnwa-bura, en e Jachiwnwa-chik, kendo en e Ruodhwa. (Isa. 33:22) Nikech en Nyasaye mochanore, oseloso chenro mondo ‘wati kanyachiel kode’ e chopo dwache.​—2 Kor. 6:1, 2.

⁴ Kaka giko mar piny marachni medo kayo machiegni, e kaka wamedo makore gi Kristo Yesu ma e Ruoth moseketi. (Isa. 55:4; Fwe. 6:2; 11:15) Yesu owuon e ma nokoro konyiso ni jolupne ne dhi timo tije madongo moloyo ma en owuon ne otimo ka en e piny ka. (Joh. 14:12) Mano ne dhi bedo adier nikech jolup Yesu ne dhi medore kendo ne gidhi tiyo kuom higni mang’eny ka giyalo e alwora malach. Ne gidhi yalo wach maber mar Pinyruoth nyaka kuonde maboyo mogik e tung’ piny.​—Mat. 24:14; 28:19, 20; Tich 1:8.

⁵ En adier ni oseyal wach maber e okang’ malach. Kata kamano, mana kaka Yesu nonyiso maler, tij yalo wach maber biro rumo e kinde ma Jehova owuon e moseketo. Gik ma timore sani ma Jehova Nyasaye ne osekoro e Wachne nyiso ayanga ni odiechienge maduong’ kendo malich osekayo machiegni.​—Joel 2:31; Zef. 1:14-18; 2:2, 3; 1 Pet. 4:7.

⁶ Kaka wamedo ng’eyo dwach Jehova e ndalo mag gikogi, e kaka onego wamed kindawa e timo gik mochikowa ni watim. Mano dwaro ni wang’e malong’o kaka riwruok mar oganda Nyasaye tiyo kendo wariw lwedo chuth chenro moketonwa. Weche manie Ndiko mokudh gi much Nyasaye e ma chiko gik moko duto ma riwruogni timo. Wechego oriwo chike ma Jehova chiwonwa, weche ma Jehova nyisowa, weche ma Jehova puonjowa, kod buche mong’ado.​—Zab. 19:7-9.

⁷ Sa ma oganda Jehova temo ahinya luwo yo ma ichikogi godo ka luwore gi Muma, mano miyo gidak kanyachiel gi kue kod winjruok. (Zab. 133:1; Isa. 60:17; Rumi 14:19) En ang’o ma miyo winjruok motegno betie e kind owete ka moro amora ma gintie? Hera. Wan jo morwakore gi kido mar hera kendo mano e ma tego winjruokwa. (Joh. 13:34, 35; Kol. 3:14) Nikech Nyasaye oseguedhowa gi kue kod winjruok ma kamano, watemo ahinya mondo wadhi riat gi bad-riwruok mar oganda Jehova manie polo.

BAD-RIWRUOK MAR OGANDA JEHOVA MANIE POLO

⁸ Jonabi kaka Isaya, Ezekiel, kod Daniel, noneno fweny moko ma konyowa ng’eyo kaka bad-riwruok mar oganda Jehova manie polo chalo. (Isa., sula mar 6; Eze., sula mar 1; Dan. 7:9, 10) E bug Fweny, jaote Johana bende noneno fweny moro ma nyiso kaka ochan bad-riwruogno. E fwenyno, noneno Jehova kobet e kom-lochne ma nigi duong’ kendo kolwore gi malaike ma wacho niya: “Maler, maler, maler en Jehova Nyasaye, Manyalo Duto, ma ne nitie, kendo ma nitie, kendo ma biro.” (Fwe. 4:8) Bende, Johana noneno “nyarombo moro . . . kochung’ e dier kom-lojno.” Nyarombono ne en Yesu Kristo.​—Fwe. 5:6, 13, 14; Joh. 1:29.

⁹ Nikech fwenyno nyiso ni Jehova obet e kom-loch, mano konyowa ng’eyo ni en e ma en Wi riwruok mar oganda mare. Bug 1 Weche mag Ndalo 29:11, 12 wuoyo e wi tekone ma malo moloyo kowacho kama: “A Jehova, duong’ gi teko gi ber gi pak gi loch gin magi. Nimar gik moko duto manie polo gi piny gin magi. Pinyruoth en mari, A Jehova. In e ma iting’ori malo e wi gik moko duto. Mwandu gi duong’ wuok kuomi, ilocho e wi gik moko duto, kendo loch gi teko nie lweti. Lweti e ma nyalo miyo ng’ato duong’ kendo in e ma imiyo ji duto teko.”

¹⁰ Yesu Kristo tiyo kanyachiel gi Jehova nimar Jehova osemiye migawo ma malo ma nigi teko e polo. Kuom adier, Nyasaye “noketo gik moko duto e bwo tiende, kendo nokete obedo e wi gik moko duto e kanyakla.” (Efe. 1:22) Jaote Paulo nowacho e wi Yesu niya: “Nyasaye ne omiye migawo ma malo moloyo, kendo nomiye nying moloyo nyinge mamoko duto, mondo e nying Yesu, ji duto ogo chonggi piny​—jo ma ni e polo gi jo ma ni e piny kod jo ma ni e bwo lowo​—kendo lep ka lep onego ohul ayanga ni Yesu Kristo en Ruoth, mondo Nyasaye Wuoro oyud duong’.” (Fil. 2:9-11) Omiyo, wanyalo bedo gadier chuth ni Yesu Kristo en jatelo makare.

¹¹ Janabi Daniel noneno e fweny Ng’at ma hike ng’eny kobet e kom-loch e polo kendo malaike “ji milion achiel ma tiyone, kendo ji milion mia achiel mochung’ e nyime.” (Dan. 7:10) Muma wuoyo e wi oganda mar malaikego koluongogi ni “chuech ma nigi teko moket ne tich maler, kendo oseorgi mondo giti ne jo ma biro yudo warruok.” (Hib. 1:14) Ochan chuech mag malaikego e kidienje kaka “kombe ruodhi,” “migepe mag telo,” “pinjeruodhi,” kod “teko mag loch.”​—Kol. 1:16.

¹² Sa ma wakawo thuolo mar nono matut kaka ochan bad-riwruok mar oganda Jehova manie polo, wanyalo ng’eyo kaka Isaya ne winjo e chunye kokalo kuom weche ma nowacho bang’ neno fweny moro. E fwenyno, ‘noneno Jehova kobet e kom-lochne moting’ore malo,’ kendo ‘Joserafi ne ochung’ e wiye.’ Isaya nowacho kama: ‘Yaye, piny lichna! Achalo mana ng’at mosetho, an ng’at ma dhoge ok ler, kendo adak e kind jo ma dhogi ok ler; To aseneno Jehova Ruoth kendo Nyasach oganda lweny!’ Kuom adier, wachno nomako dho Isaya mi ne obolore ahinya bang’ neno kaka riwruok mar oganda Jehova duong’ miwuoro. Wachno nomulo chuny Isaya ahinya. Omiyo, ka ne luong moro owuok e polo kidwaro jo ma di dhi mondo otim tich makende mar yalo wach kum mag Jehova, Isaya nochiwore modwoko niya: “An ka! Ora!.”​—Isa. 6:1-5, 8.

¹³ Ndalogi bende, jo Jehova bedoga gi chuny kaka mar Isaya, bang’ ka giseng’eyo riwruok mar oganda Jehova kendo ng’eyo maber kaka riwruogno tiyo. Kaka riwruogno medo dhi ng’wech, e kaka wan bende watemo matek mondo wadhi kode riat. Watemo ahinya mondo wanyis ni waluwo kaka riwruok mar oganda Jehova ma ndaloni chikowa.

RIWRUOK MAR OGANDA JEHOVA DHI NG’WECH

¹⁴ Weche ma ne okor ma yudore e bug Ezekiel sula mokwongo nyisowa kaka Jehova riembo gari moro maduong’ manie polo. Gari maduong’no ochung’ ne bad-riwruok mar oganda Jehova me polo. Jehova riembo garino kochike kendo kotiyo kode e yo mang’won mondo ochop dwache.​—Zab. 103:20.

¹⁵ Ndiga, tiende ni tielo ka tielo mar garino nigi tielo moro moket ariwa e iye ma lachne romre gi i tielo ma oko. Yo ma tielogo obetgono e ma miyo inyalo wach ni “ne ginyalo ringo koni gi koni.” (Eze. 1:17) Tielogo nyalo chomo komachielo apoya nono. Kata kamano, mano ok nyis ni garino ringo aringa ma onge ng’at ma chike. Jehova ok nyal yie mondo riwruok mar oganda mare odhi adhiya fwaa. Bug Ezekiel 1:20 wacho niya: “Ne gidhi kamoro amora ma roho ne chikogie.” Kuom mano, Jehova e ma miyo riwruok mar ogandane dhi ka moro amora ma rohone chiko ni mondo odhiye. Penjo ma ng’ato ka ng’ato kuomwa nyaka penjre en niya: ‘Be adhi riat gi riwruok mar oganda Jehova?’

¹⁶ Dhi riat gi riwruok mar oganda Jehova ok en mana dhi e chokruogewa kod yalo kende. Gino maduong’ ma nyiso ni ng’ato dhi riat gi riwruogno en kuom timo dongruok e winjruokne gi Nyasaye. Onego ‘wayang gadier gik ma dwarore moloyo’ kendo wabed jo ma luwore gi chenro moro amora manyien ma po nono ni inyalo ketnwa mondo wayudgo chiemb chuny. (Fil. 1:10; 4:8, 9; Joh. 17:3) Onego wang’e bende ni mondo weche odhi maber e riwruok moro amora, ji nyaka riw lwedo chenro duto moket e riwruogno. Kuom mano, nyaka wang’e ni dwarore ni wati maber gi mwandu mag chuny kod mag ringruok ma Jehova omiyowa mondo wachopgo tijene. Sa ma wadhi riat gi gach polo ma Jehova riembono, wabiro dak ka luwore gi wach ma wayalo.

¹⁷ Riwruok mar oganda Jehova konyowa mondo wadhi nyime gi timo dwach Nyasaye. Ng’e ni Jehova e ma riembo gach polono. Kuom mano, sa ma wadhi riat gi ng’wech ma gacheno ringogo, wanyiso ni wamiyo Jehova luor kendo ni wan gi geno kuome kaka Lwandawa. (Zab. 18:31) Muma singonwa kama: “Jehova biro miyo joge teko. Jehova biro guedho joge gi kuwe mang’eny.” (Zab. 29:11) Nikech wan e riwruok mar oganda Jehova e ndalogi, wayudo teko kod kue ma gin gueth mochiwo ne ogandane. Kuom adier, onge kiawa ni wabiro medo yudo gueth mogundho kaka wamedo dhi nyime timo dwach Jehova gie sani kendo nyaka chieng’.