Yie gi Migawo mar Kristo e Chenro mar Nyasaye

“KAR chakruok Nyasaye ne ochueyo polo gi piny,” kendo gik moko duto ma nochueyo ne ‘beyo ahinya.’ (Cha. 1:1, 31) Jehova nochueyo dhano kodwaro ni mondo gidag e ngima maber nyaka chieng’. Kata kamano, tim ng’anjo ne ochocho chenrono kuom kinde. Dwach Jehova to pok olokore. Kaka nodwaro ni piny obed ka maber kendo ni dhano odag nyaka chieng’ pod biro chopo. Nyasaye ne onyiso ni kinde ne dhi biro ma koth Adam ma winje ne dhi yudo resruok. Kindego, lamo madier ne dhi betie kendo, kae to Nyasaye ne dhi ketho ng’at marach, ma en Satan kaachiel gi tijene maricho duto. (Cha. 3:15) Gikone, gik moko duto ne dhi bedo ‘mabeyo ahinya’ kendo Jehova ne dhi tiyo gi Wuode Yesu Kristo e chopo mago duto. (1 Joh. 3:8) Kuom mano, dwarore ahinya ni wang’e migawo mar Kristo e chenro mar Nyasaye.​—Tich 4:12; Fil. 2:9, 11.

MIGAWO MAR KRISTO

² Migawo ma Yesu Kristo nigo e chenro mar Nyasaye oriwo tije mang’eny. Tijenego oriwo bedo Jawar ne dhano, Jadolo Maduong’, Wi kanyakla mar Jokristo, kendo sani en Ruoth e Pinyruodh Nyasaye. Paro matut kuom tijenego duto konyowa ng’eyo chenro mar Nyasaye e yo maber kendo ma miyo wamedo hero Yesu gi chunywa duto. Muma leronwa moko kuom tijene mopogore opogorego.

³ Biro ma Kristo nobirogo e piny nonyiso ayanga ni winjruok maber e kind dhano gi Nyasaye ne dhi betie mana kokalo kuom Yesu. (Joh. 14:6) Kaka Jawar mar oganda dhano, Yesu nochiwo ngimane obed rawar ne ji mang’eny. (Mat. 20:28) Yesu noketonwa ranyisi mar bedo gi timbe mabeyo. To ok mano kende. Migawo maduong’ ma bende en-go en mar chopo dwach Jehova ne oganda dhano. Wanyalo bedo gi winjruok maber gi Nyasaye mana kokalo kuom Yesu kende. (Tich 5:31; 2 Kor. 5:18, 19) Tho mar misango mar Yesu kod chierne oseyawo ne dhano moluoro Nyasaye thuolo mar yudo gueth mosiko e bwo loch mar Pinyruodh Nyasaye.

⁴ Kaka Jadolo Maduong’, Yesu nyalo “kechowa e nyawowa” kendo onyalo umo richo mag jolupne ma osechiworene e piny kae. Jaote Paulo nolero kama: “Wan gi jadolo maduong’ ma kechowa e nyawowa, kendo en jadolo ma osetem e yore duto mana kaka wan, to ne osiko ma onge richo.” Kae to Paulo nojiwo jo ma nyiso yiegi kuom Yesu Kristo mondo gikaw mapek chenro moseket mar duoko winjruokgi gi Nyasaye obed maber kendo. Paulo nojiwogi kama: “Omiyo, wadhiuru e nyim kom-loch mar ng’wono mogundho mar Nyasaye ka wan gi chir mar wuoyo, mondo okechwa kendo wayud ng’wonone mogundho ma konyowa e kinde mowinjore.”​—Hib. 4:14-16; 1 Joh. 2:2.

⁵ Bende, Yesu e Wi kanyakla mar Jokristo. Mana kaka jolupne madier e ndalo joote ne onge gi jatelo moro ma dhano, wan bende waonge gi dhano moro ma waluongo ni jatendwa. Yesu chiko jolupne kotiyo gi roho maler kod jokwath manie bwoye ma biro dwoko wach ire kod Wuon mare me polo ka luwore gi kaka girito kueth mar Nyasaye. (Hib. 13:17; 1 Pet. 5:2, 3) Jehova nokoro wach e wi Yesu kowacho niya: “Neuru! Ne akete obed janeno ne ogendni, nakete ruoth kendo jatend lweny ne ogendni.” (Isa. 55:4) Yesu nonyiso kaka wachno nochopo ka nowacho ne jopuonjrene kama: “Kik luongu ni jotelo nikech Jatendu en achiel, ma en Kristo.”​—Mat. 23:10.

⁶ Yesu nyiso chuny ma en-go mar konyowa kogwelowa kama: “Biuru ira, un duto mujony kendo ma ting’ turou, to anamiu yueyo. Keturu jok mara kuomu kendo puonjreuru kuoma, nimar adembora kendo chunya muol, to ununwang’ yueyo. Nikech jok mara yom kendo ting’na yot.” (Mat. 11:28-30) Sa ma Yesu Kristo chiko gik moko e kanyakla mar Jokristo gi muolo kendo e yo ma duogo chunywa, mano nyiso ni en “jakwath maber” ma luwo ranyisi mar Jehova Nyasaye Wuon mare manie polo.​—Joh. 10:11; Isa. 40:11.

⁷ E barua mokwongo ma Paulo nondiko ne Jo-Korintho, nolero migawo machielo ma Yesu Kristo nigo. Nondiko niya: “Nyaka oloch ka en ruoth nyaka chop kama Nyasaye biro keto wasike duto e bwo tiende. To bang’ ka gik moko duto oseket e bwo Wuoyi, eka Wuoyi bende biro bolore e bwo Jal ma noketo gik moko duto e bwoye, mondo Nyasaye obed gik moko duto ne ji duto.” (1 Kor. 15:25, 28) Ka Yesu ne pok obiro e piny, ne otiyo kaka “jatich molony” mar Nyasaye nikech en e ma Nyasaye nokwongo chueye ka pok ochue chuech mamoko duto. (Nge. 8:22-31) Ka Nyasaye nooro Yesu e piny, kinde duto notimo dwach Nyasaye. Ne onano e bwo tem maduong’ie mogik ma en tho kendo ne otho ma ok oketho chik moro amora mar Wuon mare. (Joh. 4:34; 15:10) Nikech Wuode ne omakore kode nyaka e tho, Nyasaye ne ochiere motere e polo kendo ne omiye ratiro mar bedo Ruoth e Pinyruodh polo. (Tich 2:32-36) Omiyo, migawo maduong’ ma Nyasaye omiyo Kristo Yesu en mar tiyo gi malaike ma nigi teko e golo loch mar dhano e piny kendo tieko gik maricho duto manie pinywani. (Nge. 2:21, 22; 2 The. 1:6-9; Fwe. 19:11-21; 20:1-3) Pinyruodh Nyasaye e ma koro biro bedo gi teko mar locho e wi piny mangima. Kindeno, Yesu Kristo e ma biro bedo Ruoth e pinyruodhno.​—Fwe. 11:15.

YORE MA WANYISOGO NI WAYIE GI MIGAWO MAR KRISTO

⁸ Yesu Kristo e jal ma ketonwa ranyisi maber monego waluw. En ng’at makare chuth ma onge richo. Osemiye tij ritowa. Mondo wayud ber kuom rit momiyowa, dwarore ni wasik ka wamakore gi Jehova kendo wadhi riat gi riwruok mar ogandane ma siko ka timo dongruok.

⁹ Jolup Yesu ma ne odak e ndalo joote noyie gi migawo mar Yesu e chenro mar Nyasaye. Ne ginyiso mano kuom tiyo e winjruok achiel e bwo Kristo, ka giikore luwo kaka Kristo chikogi kokalo kuom roho maler. (Tich 15:12-21) Jaote Paulo nowuoyo e wi winjruok ma kanyakla mar Jokristo mowir ne nigo ka nondiko niya: “Ka wawacho adier, weuru mondo kuom hera wadong e weche duto kuom jalno ma en wich, tiende ni, Kristo. Kuome e ma ringruok duto otueyoree kanyachiel kendo tiyoe kanyachiel kokalo kuom fuoni ka fuoni ma chopo tich ma dwarore. Ka fuoni ka fuoni tiyo kare, mano konyo ringruok dongo, nimar ogerore owuon kuom hera.”​—Efe. 4:15, 16.

¹⁰ Sa ma ng’ato ka ng’ato manie kanyakla tiyo e winjruok achiel gi jo mamoko e bwo telo mar Kristo, mano kelo dongruok kod chuny mar hera. To herano ‘e ma tueyo gik moko duto kanyachiel.’​—Joh. 10:16; Kol. 3:14; 1 Kor. 12:14-26.

¹¹ Gik ma timore e piny ma chopo weche mokor e Muma nyiso ma onge kiawa ni chakre higa mar 1914, osemi Yesu Kristo teko mar locho e Pinyruodh polo. Sani olocho e dier jowasike. (Zab. 2:1-12; 110:1, 2) Mano nyiso ang’o ne jo modak e piny sani? Ni kinde okayo ma Yesu biro chopo migawone kaka Ruoth manie wi ruodhi kendo Jaloch manie wi joloch, sa ma obiro kelo kum mag Nyasaye e wi jowasike. (Fwe. 11:15; 12:10; 19:16) Kae to wach ma Jehova nosingo kar chakruok bang’ ng’anjo mar dhano biro chopo kendo obiro nyiso ng’wono ne jo manie bad Kristo ma korachwich. (Mat. 25:34) Mano kaka wanabed mamor ni ne wanyiso ni wayie gi migawo mar Kristo e chenro mar Nyasaye! Wadhiuru nyime kanyachiel ka watiyo tijwa mar yalo kendo luwo kaka Kristo chikowa e kinde mag gikogi.