‘Beduru ka Uparo Jo ma Tayou’

WECHE ma jaote Paulo nondikogo yudore e Jo-Hibrania 13:7. Chakre Pentekost higa 33, joote Ruodhwa Yesu Kristo ne tiyo kaka bura matayo ka gikonyo e chiwo weche ma chiko kanyakla mar Jokristo ma e ka ne oa chaki. (Tich 6:2-4) Ka nochopo higa 49, koro bura matayono ne ok gin mana joote Yesu kende. Kuom ranyisi, ka ne iloso wach ywaruok e wi wach tero ji nyangu, jokanyo mag bura matayono ne gin “joote gi jodongo man Jerusalem.” (Tich 15:1, 2) Ne gin gi ting’ mar nono gik ma ne nyalo mulo ngima Jokristo ka moro amora. Ne gioroga barupe kod weche ma chiko ji e kanyakla. Barupego ne tego kanyakla mopogore opogore kendo miyo jopuonjre osik ka gin gi winjruok achiel e paro kod timbegi. Kanyaklago ne nigi chuny mar luwo kaka bura matayo ne chikogi. Nikech mano, Jehova ne gwedhogi kendo ne giyudo nyak maber.​—Tich 8:1, 14, 15; 15:22-31; 16:4, 5; Hib. 13:17.

² Ka joote nosetho, tim ng’anjo ne lamo madier nochako betie. (2 The. 2:3-12) Mana kaka Yesu nokoro e ngero mar ngano kod ogolo, nitie ng’at ma nochuoyo ogolo (ma gin Jokristo mag miriambo) e i ngano (ma gin Jokristo mowir). Chakre kindeno, ne owe mondo grube ariyogo odong kanyachiel nyaka chop kinde mar keyo, tiende ni “giko mar ndalo.” (Mat. 13:24-30, 36-43) Kindeno Yesu ne chiko Jokristo mowir ka gin ng’ato achiel achiel kata obedo ni ne onge bura matayo kata riwruok moro amora ma ne nenore ayanga ni Yesu ne chikogo jolupne e piny. (Mat. 28:20) Kata kamano, Yesu nokoro ni lokruok ne dhi betie e kinde keyo.

³ Yesu Kristo nopenjo kama: “Ng’ano ma kuom adier e jatich mogen kendo mariek?” Yesu notiyo gi penjono ka nogoyo ngero moro. Ngerono ne wuoyo e wi “ranyisi” mar “giko mar ndalo.” (Mat. 24:3, 42-47) Yesu nonyiso ni jatich mogenno ne dhi bedo modich e chiwo chiemb chuny ne oganda Nyasaye “e kinde mowinjore.” E ndalo joote, kar tiyo gi ng’ato achiel e tayo jolupne, Yesu ne tiyo gi grup moro mar jo manok mondo otago jolupne. Kamano bende, jatich mogen ma Yesu tiyogo e kinde giko mar ndalogi ok en ng’ato achiel.

FWENYO “JATICH MOGEN KENDO MARIEK”

⁴ En ng’a ma Yesu noketo mondo opidh jolupne? Ok kawwa gi wuoro ni ne odhi tiyo gi Jokristo mowir manie piny. Muma luongogi ni “dolo mar joka ruoth” mosemi tij ‘lando e kuonde maboyo ber mogundho’ mag Jalno ma noluongogi kogologi e mudho kendo rwakogi e ler mare miwuoro.’ (1 Pet. 2:9; Mal. 2:7; Fwe. 12:17) Be Jokristo mowir duto gin jatich mogen? Ooyo. Nitie kinde ma Yesu nopidho oganda moro mang’ongo chiemb ringruok e yor hono. Ogandano noting’o chwo 5,000 kama ka ok okwan mon gi nyithindo. Yesu nomiyo jopuonjrene chiemogo, kae to jopuonjrene nomiyo ogandano. (Mat. 14:19) Nopidho ji mang’eny kotiyo gi lwet jo ma nok. Ndalogi bende otiyo gi jo manok e chiwo chiemb chuny.

⁵ Kuom mano, “jarit mogen, kendo mariek” gin owete mowir manok ma tiyo tij iko kendo pogo chiemb chuny achiel kachiel e kinde ma Kristo nitie e loch. (Luka 12:42) Kuom kinde duto mar ndalo mag giko, owete mowir ma gin “jatich mogen kendo mariek” osebedo ka tiyo kanyachiel e ofis maduong’ mar Joneno mag Jehova. Sani, owete mowirgo e ma gin Bura Matayo mar Joneno mag Jehova.

⁶ Kristo tiyo gi burano e goyo buge ma nyiso kaka weche mokor e Muma chopo, kendo burano chiwo weche kata siem ma nyiso kaka Jokristo nyalo tiyo gi puonj manie Muma e ngimagi mapile. Ji yudo chiemb chuny ma burano chiwo kokalo kuom kanyakla mag Joneno mag Jehova. (Isa. 43:10; Gal. 6:16) E ndalo ma ne indikoe Muma, misumba kata jatich mogen, ne en ng’at ma rito mwandu duto mag od ruodhe. Kamano bende, Kristo osemiyo jatich mogen kendo mariek ting’ mar rito jood yie, tiende ni Jokristo madier. Omiyo, jatich mogen bende nigi ting’ mar rito mwandu mag Kristo, tayo tij yalo, chano program mitimo e chokruogewa madongo, keto jorit ma tayo e migepe mopogore opogore e riwruok mar oganda Jehova, kod goyo buge ma lero Muma. To chenrogo duto kelo ber ne ‘jood’ Ruoth.​—Mat. 24:45.

⁷ To jo mage ma gin ‘jood’ Ruoth? Gin jogo ma jatijno pidho gi chiemb chuny. E kinde ma ndalo mag gikogi ne chakore, jood Ruoth duto ne gin Jokristo mowir. Bang’e, oganda mang’ongo mar “rombe mamoko” bende ne obedo jood Ruoth. (Joh. 10:16) Grube ariyogo duto chamo chiemb chuny ma jatich mogen chiwonegi.

⁸ E kinde mar masira maduong’, Yesu biro ng’ado bura ne piny marachni kendo kindeno e ma obiro ketoe jatich mogen “e wi gige duto.” (Mat. 24:46, 47) Jogo ma gin jatich mogen biro yudo gueth margi e polo. Ka gin kanyachiel gi Jokristo mamoko mowir, gibiro locho gi Kristo e polo. Kwan margi duto en 144,000. Kata obedo ni jatich mogen kendo mariek koro ok bi betie e piny, Jehova kod Yesu pod biro dhi nyime tayo jogo ma biro dak e bwo loch mar Pinyruodh Mesia kotiyo gi jo ma oket kaka “jotelo.”​—Zab. 45:16.

ANG’O MOMIYO ONEGO ‘WAPAR JO MA TAYOWA’?

⁹ Nitie gik mang’eny ma miyo onego ‘wapar jo ma tayowa’ kendo nyiso ni wagenogi. Ber mar timo kamano en ang’o? Jaote Paulo nondiko kama: ‘Gisiko ka giritou kaka jo ma biro dwoko wach e bura, mondo giti tijno ka gin gi mor to ok gi chuny mapek, nikech mano nyalo kelonu hinyruok.’ (Hib. 13:17) Dwarore ahinya ni wawinjgi kendo waikre luwo kaka gichikowa nimar giritowa mondo gimoro kik keth winjruokwa gi Nyasaye.

¹⁰ Mana kaka ondik e 1 Jo-Korintho 16:14, Paulo nowacho niya: “Gik moko duto mutimo, timgiuru gi hera.” Kido mar hera e ma chiko weche kata paro ma jo ma tayo ng’ado e lo oganda Nyasaye. Bug 1 Jo-Korintho 13:4-8 wuoyo e wi hera kowacho kama: “Hera hore mos kendo ong’won. Hera onge gi nyiego. Ok opakre, ok obed gi sunga, ok otim timbe ma ok nyis luor, ok omany mana gik ma kelone ber owuon, iye ok wang’ piyo. Ok omak tim marach motimne. Ok omor gi tim ma ok kare, to omor gi adiera. Odhil e weche duto, oyie weche duto, obedo gi geno kuom weche duto, onano e weche duto. Hera ok rem ngang’.” Nikech hera e ma chiko paro duto ma jo ma tayo ng’ado mondo gikonygo jotich Jehova, onego wabed mamor luwo yore ma ichikowago. E wi mano, yo ma itayowago nyiso kaka Jehova oherowa.

¹¹ Mana kaka e ndalo joote, jo ma Jehova tiyogo e tayo joge gin dhano morem kendo ma nigi richo. To ber ng’eyo ni e kinde mokalo, Jehova osebedo ka tiyo gi dhano morem mondo ochopgo dwache. Notiyo gi Noa e gero yie kod yalo wach kethruok ma ne dhi biro e ndalone. (Cha. 6:13, 14, 22; 2 Pet. 2:5) Jehova nogolo joge Misri kotiyo gi Musa. (Wuok 3:10) Jo ma ne otigo e ndiko Muma ne gin dhano morem kendo ma nigi richo. (2 Tim. 3:16; 2 Pet. 1:21) Bedo ni Jehova tiyo gi dhano morem e ndalogi mondo ota joge en gino ma ok onego omi wabed gi kiawa e wi riwruok mar oganda Nyasaye. Kar mano, wabedo gi yie motegno nikech wang’eyo ni riwruogno ok dichop gik mabeyo motimo gie sani ka dabed ni Jehova ok e ma chike. Kuom higni mang’eny, jatich mogen osetimo gik ma nyiso ni roho mar Nyasaye tayogi kata mana e bwo pek kod akwede. E ndalogi, Jehova osemiyo bad-riwruok mar oganda mare manie piny gueth mogundho. Kuom mano, ber mondo wadhi nyime riwo riwruogno lwedo kendo gene gi chunywa duto.

KAKA WARIWO LWEDO RIWRUOK MAR OGANDA JEHOVA

¹² Jo ma oket e migepe mag tayo e kanyakla nyalo nyiso ni giriwo lwedo riwruok mar oganda Jehova kuom chopo ting’ momigi kaka dwarore. (Tich 20:28) Kaka joyal wach Pinyruoth, watimo kinda e tij yalo ot ka ot, wadok limo jo ma ne omor gi wach ma ne wayalonegi, kendo watemo mondo wabedie gi jo ma wanyalo puonjo Muma. (Mat. 24:14; 28:19, 20) Mondo chiemb chuny ma jatich mogen chiwo okonywa kaka dwarore, ber ka waiko motelo weche ma idhi non e chokruogewa mag Jokristo, moriwo nyaka chokruogewa madongo kae to wachop e chokruogego. Bedo kanyachiel gi owetewa e chokruoge mag Jokristo miyo wajiwore e kindwa ng’ato gi ng’ato.​—Hib. 10:24, 25.

¹³ Wanyalo nyiso bende ni wariwo lwedo kendo wageno riwruok mag oganda Jehova kuom golo chiwo mag ringruok. (Nge. 3:9, 10) Sa ma owetewa ochando gimoro e yor ringruok, wanyalo kawo okang’ mapiyo mar konyogi. (Gal. 6:10; 1 Tim. 6:18) Watimo kamano nikech hera manie kindwa kaka owete. Kinde duto wabiro temo ahinya manyo thuolo mag nyiso ni wamor gi gik ma Jehova kod riwruok mar oganda mare osetimonwa.​—Joh. 13:35.

¹⁴ Bende, wanyiso ni wageno riwruok mar oganda Jehova kuom riwo lwedo paro ma owete moket mondo otawa ng’ado. Mano dwaro ni wabed gi kido mar bolruok ne jo ma oket e wiwa, kaka jorit-alwora kod jodong-kanyakla. Owetego gin moko kuom ‘jo ma tayowa’ monego wawinj kendo wayie bedo e bwo tekogi. (Hib. 13:7, 17) Kata ka ok wang’eyo malong’o gimomiyo ochiw paro moro, onego wang’e ni luwo wachno biro kelonwa ber mosiko. Timo kamano osemiyo Jehova oguedhowa nikech waluwo kaka Wachne kod riwruok mar ogandane chikowa. Mano nyiso ni wachiwo luor ne Ruodhwa, Yesu Kristo.

¹⁵ Kuom adier, nitie weche mang’eny ma konyowa ng’eyo gimomiyo onego wariw lwedo jatich mogen kendo mariek. Satan ma en nyasach piny marachni timo kinda ahinya mondo oketh nying Jehova kod nying riwruok mar oganda Jehova. (2 Kor. 4:4) Tang’ kik ilwar e obadho mar riekni mopondo ma Satan tiyogo! (2 Kor. 2:11) Ong’eyo ni odong’ mana gi “kinde manok” ka pok owite e abiso. Omiyo, otemo ahinya kaka nyalore mondo olok thoth jotich Jehova mondo giwe lamo Jehova. (Fwe. 12:12) Kata kamano, kaka Satan medo kindane, wan bende wameduru sudo machiegni gi Jehova. Wadhiuru nyime keto genowa kuom Jehova kendo kuom riwruok motiyogo e chiko joge kindegi. Timo kamano biro miyo wabed e winjruok achiel kaka owete.