Chenro Moket e Kanyakla kod Kaka Itaye

E BARUA mokwongo ma jaote Paulo nooro ne Jo-Korintho, nonyiso kido maber ahinya ma Nyasaye nigo ka nondiko kama: “Nyasaye ok tim gik moko e yo ma ok ochanore, to en Nyasach kuwe.” Kae to komedo wuoyo e wi chokruoge mag kanyakla, nowacho niya: “Weuru mondo gik moko duto otimre e yo mobidhore kendo mochanore maber.”​—1 Kor. 14:33, 40.

² E chak barua nogono, jaoteno nochiwo siem e wi pogruok ma ne kelo ywaruok e i kanyakla mar Jo-Korintho. Paulo nojiwo owete ma kuno mondo ‘giwuo ka gin gi winjruok achiel’ kendo ‘gibed e achiel chutho, ka gin gi paro achiel kod dwaro achiel.’ (1 Kor. 1:10, 11) Kae to nomiyogi puonj kosiemogi e weche moko ma ne ketho winjruok e kanyaklano. Kotiyo gi ranyisi mar dend dhano, nokonyogi ng’eyo ber mar bedo gi winjruok achiel kendo tiyo kanyachiel. Paulo ne ok ong’iyo ni ng’ato nigi migawo mane e kanyakla, omiyo nojiwo jo kanyaklano duto mondo gidewre ng’ato gi nyawadgi ka ginyisore hera. (1 Kor. 12:12-26) Mondo winjruok ma kamano obedie e kind jo kanyaklano, chenro moro maber ne nyaka ket ma chiko kaka itimo gik moko.

³ Kata kamano, en chenro mane ma ne idhi ket e kanyakla mar Jokristo? To en ng’a ma ne dhi timo chenrono? To chenrono ne dhi chalo nade? To gin jo mage ma ne idhi ket e migepe mag tayo? Ka wanono Muma, wanyalo yudo dwoko mag penjogo.​—1 Kor. 4:6.

NYASAYE E MA TAYO KANYAKLA

⁴ Ne ochak kanyakla mar Jokristo chieng’ Pentekost higa 33 bang’ Kristo. Kaka ne itimo gik moko e kanyakla ma ne nitiere e ndalo joote nyalo puonjowa ang’o? Ni Nyasaye e ma ne ochako kanyaklano kendo ni en e ma ne en gi teko mar tayo gik ma timore e iye. E dho Grik, oti gi weche ariyo ma gin the·osʹ kod kraʹtos. E dho Luo tiend the·osʹ en ‘e bwo Nyasaye’ to tiend kraʹtos en ‘teko.’ Wechego yudore e 1 Petro 5:10, 11. Weche mokudh gi much Nyasaye ma nyiso gima notimore Jerusalem chiegni higni 2,000 mosekalo nyisowa ma onge kiawa ni Nyasaye e ma nochako kanyakla mar Jokristo mowir. (Tich 2:1-47) Kanyaklano ne en ot ma Nyasaye gero, tiende ni joode. (1 Kor. 3:9; Efe. 2:19) Kanyakla mar Jokristo ma ndaloni luwo chenro ma kanyakla ma ndalo joote ne nigo kod kaka ne gitimo gik moko.

⁵ Kanyakla mokwongo nochakore mana gi jopuonjre 120 kama. Gin e ma ne okwong olnegi roho maler ka luwore gi weche ma ne okor e Joel 2:28, 29. (Tich 2:16-18) To e odiechieng onogo, ji ma dirom 3,000 mamoko ne obatis e pi mi gibedo jokanyo mag kanyakla mar Jokristo mowir. Ne oyudo giseyie kuom wach Kristo kendo ne “gidhi nyime luwo puonj mag joote.” Bang’ mano, “pile ka pile Jehova ne medonegi jo ma ne donjo e yor warruok.”​—Tich 2:41, 42, 47.

⁶ Kanyakla man Jerusalem ne medo nya e okang’ ma nomiyo jadolo maduong’ mar Jo-Yahudi ong’ur ni jopuonjre ne osepong’o Jerusalem gi puonjgi. Jopuonjre manyien ma ne omedore e kanyakla man Jerusalemno noriwo nyaka jodolo mang’eny mag Jo-Yahudi.​—Tich 5:27, 28; 6:7.

⁷ Yesu nowacho kama: “Ubiro yudo teko ka roho maler obiro kuomu, mi unubed jonenona e Jerusalem, kod Judea duto, gi Samaria, nyaka kuonde maboyo mogik e tung’ piny.” (Tich 1:8) To mano e gino ma notimore ka ne sand mager omuoch Jerusalem bang’ tho Stefano. Jopuonjre ma nodak kanyo ne okere nyaka Judea gi Samaria. Kata kamano, kamoro amora ma ne gidhie, ne gimedo yalo wach maber ka giloko jo mamoko mondo obed jopuonjre, moriwo nyaka Jo-Samaria moko. (Tich 8:1-13) To e ma pod bang’e, ne oyal wach maber nyaka ne jo ma ok oter nyangu, tiende ni ogendni ma ok Jo-Yahudi. (Tich 10:1-48) Tij yalo wach e yo ma kamano nomiyo olok ji mang’eny mobedo jopuonjre kendo ne ochak kanyakla manyien mogwaro kuonde mamoko mopogore gi Jerusalem.​—Tich 11:19-21; 14:21-23.

⁸ Gin chenro mage ma ne oket mondo kanyakla moro amora manyien ma ne ichako otim gik moko e yo ma nyiso ni Nyasaye e ma ne chiko kanyaklano kendo taye? Kokalo kuom teko roho mar Nyasaye, ne oket jokwath ma rito kueth Nyasaye. E kanyakla ma Paulo kod Barnaba ne odhie e kinde mar limbegi mokwongo kaka jo misonari e pinje mamoko, ne giketo jomoko mondo obed jodongo e kanyaklago. (Tich 14:23) Luka, jal ma nondiko Muma leronwa romo moro ma Paulo nobedogo gi jodong-kanyakla mar Efeso. Owacho ni Paulo nowacho ne jodongogo kama: “Nonreuru ahinya uwegi kod kueth duto bende ma roho maler oseketoue kaka jorit, mondo ubed jokwadh kanyakla mar Nyasaye ma nong’iewo gi remb Wuode owuon.” (Tich 20:17, 28) Jogo nochopo e migawo mar bedo jodongo nikech ne ginyiso kido kod timbe ma Ndiko dwaro ni gibedgo. (1 Tim. 3:1-7) Tito, jal ma ne tiyo kanyachiel gi Paulo bende ne omi teko mar keto jodongo e kanyakla ma ne ni e taonde mopogore opogore e alwora mar Krete.​—Tito 1:5.

⁹ Kaka kanyakla mang’eny ne medore, joote gi jodongo ma ne ni Jerusalem e ma ne chiko kanyakla duto mag Jokristo manie pinje mopogore opogore e ndalo joote. Gin e ma ne gin kaka bura matayo.

¹⁰ Jaote Paulo nondiko ne kanyakla man Efeso koleronegi ni ka gitimo gik moko ka luwore gi kaka roho mar Nyasaye chikogi, to kanyakla mar Jokristo ne dhi siko e winjruok achiel kotelnegi gi Yesu Kristo ma e Wi kanyakla. Jaoteno nojiwo Jokristo ma kuno mondo gibed gi kido mar bolruok kendo ‘girit winjruok achiel ma roho miyogi’ ka gibedo gi kue gi ji duto e i kanyakla. (Efe. 4:1-6) Kae to nonwoyo weche ma yudore e Zaburi 68:18 konyisogo kaka Jehova ne dhi keto jomoko mondo obed joote, jonabi, joyal-injili, jokwath, kendo jopuonj. Jo ma kamago ne dhi bedo kaka mich moa kuom Jehova, kendo ne gidhi gero kanyakla mangima mondo odong chuth nyaka e okang’ ma moro Nyasaye.​—Efe. 4:7-16.

KANYAKLA MA NDALOGI LUWO KAKA JOOTE NE TIMO

¹¹ Yo mochan-go kanyakla mag Joneno mag Jehova e ndalogi bende luwo mana kaka joote ne timo. Kanyaklago duto loso riwruok achiel maduong’ mokwako piny mangima ma owete mowir kokalo kuom roho e ma tayo. (Zek. 8:23) Yesu Kristo e ma miyo mano nyalore. Mana kaka nosingo, osemakore gi jopuonjrene mowir “kinde duto nyaka e giko mar ndalo.” Jo ma donjo e kanyakla ma medo dongono, rwako wach maber mar Nyasaye, chiwo ngimagi ne Jehova gi chunygi duto, kae to ibatisgi mondo gibed jopuonjre Yesu. (Mat. 28:19, 20; Mar. 1:14; Tich 2:41) Ging’eyo ni “jakwath maber” ma en Yesu Kristo e ma en Wi kueth duto moriwo Jokristo mowir kaachiel gi “rombe mamoko.” (Joh. 10:14, 16; Efe. 1:22, 23) ‘Kueth achielno’ temo matek mondo girit winjruok me kindgi kuom riwo lwedo yo ma Kristo tiyogo e tayogi, kendo gibolore ne “jatich mogen kendo mariek” ma e ma Kristo oketo mondo otagi. Mad wadhi nyime riwo lwedo kendo nyiso ni wageno yo achiel ma Kristo tayowagono.​—Mat. 24:45.

RIWRUOGE MA WATIYOGO KA LUWORE GI CHIK SIRKAL

¹² Mondo wayud chiemb chuny e kinde mowinjore kendo mondo wayal wach maber mar Pinyruoth ka giko pok ochopo, nitie riwruoge ma watiyogo ka luwore gi chike mag sirkande kata piny ma wantieree. Kata kamano, riwruogego tiyo kanyachiel kendo tich ma gitimo konyo e yalo wach maber e piny mangima.

CHENRO MAR BAD OFIS

¹³ Sa ma ochak bad ofis, iketoga owete adek kata mokalo kanyo mondo gibed e Komiti mar Bad Ofis. Gin e ma gitayo weche mag piny ma ofisgi nitie kata moriwo pinje mamoko manie bwogi. Achiel kuom jo komitino bedoga jachan Komiti mar Bad Ofisno.

¹⁴ Kanyakla manie bwo bad ofis ichanoga e kidienje miluongo ni alwora. Alworago nyalo bedo madongo kata matindo. Mano en nikech yo ma alworago obetgo kaachiel gi dhok ma giwacho kod kwan mag kanyakla manie bwo bad ofisno. Bad ofis ketoga jarit-alwora mondo orit kendo olim kanyakla manie alworane. Bad ofis nyisoga jarit-alwora kaka onego otim migepene.

¹⁵ Kanyakla duto riwo lwedo chenro duto moket kendo mano konyo ji duto. Giriwo lwedo jodongo moket mondo ota e bad ofis, e alwora, kendo e kanyakla. Giyie luwo chenro ma jatich mogen kendo mariek tiyogo e miyogi chiemb chuny e kinde mowinjore. To jatich mogen bende makore motegno gi Kristo ma e Wi kanyakla ka gimakore chuth gi puonj mag Muma, kendo giikore luwo kaka roho maler chikogi. Sa ma waduto wariwore e tiyo kanyachiel gi winjruok, wayudo nyak ma chalo gi ma Jokristo ma ndalo joote ne yudo. Ndiko wacho ni: “Kanyakla man kuondego nomedo gurore e yie kendo kwan-gi ne medore pile ka pile.”​—Tich 16:5.