Yore Momedore Minyalo Tiyogo ne Nyasaye

KA KINDE nochopo ma Yesu ne oroe jopuonjrene mondo giyal wach Pinyruoth, nowachonegi kama: “Tij keyo duong’, to jotich e ma nok.” Tich ne thoth ma nonego gitim. Omiyo, nomedo wachonegi niya: “Kwauru Ruodh keyo mondo oor jotich e keyone.” (Mat. 9:37, 38) Yesu nolero ne jopuonjrene kaka nonego gitim tijno. Wechene nyiso ni migawono nonego otim mapiyo. Nowachonegi kama: “Ok unutiek lworo mier manie Israel duto ngang’ ka pok Wuod dhano ochopo.”​—Mat. 10:23.

² E ndalogi bende, nitie gik mathoth monego watim e tij Nyasaye. Wach maber mar Pinyruoth nyaka yal ka giko pok ochopo, to gikono okayo machiegni ahinya! (Mar. 13:10) Wan bende wachalo gi Yesu kod jopuonjrene ma ne nigi tich mang’eny, en mana ni wan to koro onego wayal e piny ngima. Kata obedo ni wanok kopimwa gi dhano bilionde manie piny, pod wan gadier ni Jehova biro konyowa. Wach maber mar Pinyruoth ibiro yal e piny ngima, kendo giko biro chopo e kinde sie ma Jehova oseketo. Be wabiro keto Pinyruodh Nyasaye e ma obed mokwongo e ngimawa mondo mi wachop tich momiwa e okang’ mong’ith? Gin chenro mage ma wanyalo keto mondo wanyisgo ni mano e gombowa?

³ Yesu nonyiso gima Jehova dwaro kuom jotichne mosechiworene kowacho niya: “Nyaka iher Jehova Nyasachi gi chunyi duto, gi ngimani duto, gi pachi duto, kendo gi tekoni duto.” (Mar. 12:30) Nyasaye dwaro ni watine gi chunywa duto. Mondo watim kamano, dwarore ni wanyis kaka wan jo malong’o e wang’ Jehova kendo wanyis okang’ ma wasechiworego mar timo duto ma wanyalo e tije. (2 Tim. 2:15) Nitiere yore mang’eny ma ng’ato ka ng’ato kuomwa nyalo tiyogo ne Jehova ka luwore gi nyalo kod chal ma wantiere. We wanon ane moko kuom yorego kae to ing’ad ni gin mage kuomgi minyalo yiero mondo itigo ne Nyasaye e okang’ momedore.

BEDO JALENDO MAR KANYAKLA

⁴ Jogo duto moserwako adier nigi thuolo ma jaber mar bedo joland wach maber. Mano e tich maduong’ ma Yesu nomiyo jopuonjrene duto. (Mat. 24:14; 28:19, 20) Kinde mang’eny, ng’at ma en japuonjre Yesu Kristo chakoga gi nyiso jowetene wach maber mapiyo bang’ koseyalne. Mano e gima Andrea, Filipo, Kornelio, kod jo mamoko notimo. (Joh. 1:40, 41, 43-45; Tich 10:1, 2, 24; 16:14, 15, 25-34) Be mano nyiso ni ng’ato nyalo lando ne jomoko wach maber kata ka pok obatise? Ee, en kamano! Tek ateka ni ng’ato osebedo jalendo ma pok obatis e kanyakla, koro dhoot oyawne mar chiwo neno e ot ka ot. Bende, ka luwore gi nyalone kod chal ma entiere, onyalo tiyo ne Nyasaye e yore momedore.

⁵ Ka osebatis jalendo, onge kiawa ni obiro temo timo duto monyalo mondo opuonj jo mamoko wach maber. Jo machwo gi jo mamon duto nigi thuolo mar tiyo tij yalo wach maber. Tiyo tij yalo wach Pinyruodh Nyasaye kata bed mana ni wachope e okang’ matin, en gueth makende. Ng’ato ang’ata ma temo manyo yore momedore mag tiyo ne Nyasaye biro bedo gi mor nyowuoyo.

KONYO KUONDE MA JOTIJ NYASAYE DWAROREE MOLOYO

⁶ Nyalo bedo ni alwora ma kanyaklau yaloega en ka mosetim nyading’eny kendo osechiw neno maber kuno. Ka en kamano, inyalo neno ni ber tiyo ne Nyasaye e okang’ momedore kuom dar mondo idhi e alwora ma jolendo dwaroree moloyo. (Tich 16:9) Ka po ni sani in jaduong’-kanyakla kata jakony-tich, nyalo bedo ni nitie kanyakla moro ma dwarore ni okony. Jarit-alworau nyalo ng’adoni paro kaka inyalo konyo kanyakla machielo man e alworau. Ka idwaro ni idhi ikony e alwora moro manie pinyu, bad ofis nyalo chiwo paro ma dwarore.

⁷ Be diher dhi tiyo ne Nyasaye e piny machielo? Ka en kamano, nitie weche ma dwarore ni inon ahinya ka pok idar. Donge nyalo bedo maber ka iwuoyo gi jodong-kanyaklau? Onge kiawa ni dar kamano biro kelo lokruoge moko e ngimani kaachiel gi ng’ato ang’ata ma di po ni odhi kodi. (Luka 14:28) Kata kamano, ka po ni ok ichano mar dhi dak kuno kuom kinde malach, ber mondo iti ne Nyasaye e alwora moro manie pinyu.

⁸ E pinje moko, owete mitiyogo e migepe mag tayo weche e riwruok mar oganda Jehova pod gin mana jo manyien e adiera. Owete ma kamago onego onyis chuny mar bolruok mondo giwe jodongo ma nigi lony mobiro e kanyaklagi okonygi tayo weche. Ka in jaduong’-kanyakla ma chano dar dhi e piny ma kamano, ng’e ni gima duong’ ma teri kuno ok en kawo kar owete manie pinyno. Mopogore gi mano, idhi kuno mondo iti kanyachiel kodgi. Jiwgi mondo gibed gi gombo mar yudo migepe momedore e kanyakla. (1 Tim. 3:1) Nyis horuok sa mineno ka gitimo gik moko mopogore gi kaka itimo e piny ma thuru. Ti gi lony ma in-go kaka jaduong’-kanyakla mondo ikony owete kaka dwarore adier. Kae to ka ochuno ni chieng’ moro idog thuru, biro yudo ka jodongo miweyogo koro nigi lony e rito weche mag kanyakla.

⁹ Ka bad ofis pok ooroni nyinge kanyakla ma dwarore ni okony, biro dwarore ni Komiti Matayo Tije Kanyakla oornegi barua ma pwodhi. Nyaka or barua ma kamano bed ni in jaduong’-kanyakla, jakony-tich, painia, kata jalendo. Komiti matayo tije kanyakla biro oro barua ma pwodhino kaachiel gi kwayoni achiel kachiel ne bad ofis ma rito piny midwaro dhi konyono.

YALO GI DHOK MACHIELO

¹⁰ Mondo mi iti ne Nyasaye e okang’ momedore, nyalo dwarore ni ipuonjri dhok machielo, moriwo nyaka dho momni, tiende ni dhok mitiyoe gi ranyisi. Ka po ni idwaro puonjori yalo gi dhok machielo, donge ber ka iwuoyo gi jodong-kanyaklau kod jarit-alworau? Ginyalo ng’adoni paro ka gijiwi e yo ma dwarore. Bad ofis osechiko jorit-alwora moko mondo ochan klese mag puonjruok dhok e alworagi, ka ma jolendo gi jo painia ma nigi nyalo yudoe tiegruok mar yalo gi dhok machielo.

BEDO PAINIA

¹¹ Ber ka jolendo duto ong’eyo gik ma dwarore mondo e ka ng’ato obed painia makonyo, painia mapile, kata painia makende, kaachiel gi migepe mamoko mag tiyo ne Nyasaye e okang’ momedore. Painia nyaka bed Jakristo mosebatis ma keto ranyisi maber kendo ma nigi nyalo mar chopo seche moseyang ne jo painia mondo ochop e tijgi mar yalo. Komiti Matayo Tije Kanyakla e ma pwodho kwayo mag jogo ma dwaro bedo jo painia makonyo kod jo painia mapile. Kata kamano, bad ofis e ma keto jopainia makende e migapgi.

¹² Inyalo ket ng’ato mondo obed painia makonyo kuom dwe achiel ka tin, kata kuom dweche moluwore oluwore, kata kuom kinde mogwaro moloyo mago ka luwore gi nyalo mar ng’atno. Thoth joland wach Pinyruoth oheroga bedo jo painia makonyo e kinde makende kaka e kinde mag Rapar, kata e dwe ma jarit-alwora olimoe kanyaklagi. Jomoko yiero timo kamano e dweche ma gintiere e rusa. Jolendo ma pod dhi e skul bende nyalo yiero bedo jo painia makonyo e kinde ma ok gin e skul. Jolendo nyalo yiero bedo jo painia makonyo ma yalo kuom seche moduok piny e dweche mag Mach gi April kaachiel gi dweche ma jarit-alwora olimoe kanyaklagi. Kata bed ni in e bwo chal mane, jodongo biro yie gi kwayoni mar bedo painia makonyo tek mana ni in gi timbe maler, isechano mondo ichop seche ma dwarore, kendo iikori kawo thuolo mar dwe achiel kata mokalo kanyo ka in painia makonyo.

¹³ Mondo oketi kaka painia mapile, nyaka ibed ng’at mosetimo chenro mar chopo seche ma dwarore ne ja painia mapile higa ka higa. Ka in painia mapile, biro dwarore ni imakri ahinya gi chenro mag kanyakla ma intie. Jo painia ma jo kinda gin gueth ne kanyakla nimar gimiyoga ji bedo gi siso kod ilo ne tijwa mar yalo, kendo gimiyoga jo mamoko bende bedo gi gombo mar bedo jo painia. Kata kamano, ka pok ikwayo bedo ja painia mapile, onego obed ni dweche ma ok tin ne auchiel osekadho nyaka ne batisi kendo isebedo jalendo ma keto ranyisi maber.

¹⁴ Kinde mang’eny, jo painia makende iyieroga koa kuom jo painia mapile ma lony kod nyak ma gin-go e tij yalo osenenore ayanga. Nyaka gibed jo ma oikore dhi yalo ka moro amora ma bad ofis oorogie. Kinde mang’eny, kuonde miorogiego bedoga alwora mosokore man mabor gi kanyakla mondo gimany jo ma nyalo mor gi wach maber kendo gichak kanyakla manyien kuondego. Nitie kinde ma jo painia makende ioroga e kanyakla ma dwarore ni okony mondo mi gilend maber e alwora duto ma kanyaklano nigo. Moko kuom jo painia makende ma bende gin jodongo osemiga migawo mar dhi konyo kanyakla moko matindo tindo kata ka jolendo momedore ok dwarre ahinya kuno. Jo painia makende yudoga nya pesa moro matin mondo gikonyrego. Jo painia makende moko imiyoga migawono mana kuom kinde.

YALO KAKA MISONARI

¹⁵ Komiti mar Bura Matayo miluongo ni Komiti Mochung’ ne Tij Lendo e ma ketoga jolendo ma bedo jo misonari, kae to Komiti mar Bad Ofis ma gintiere e ma miyo jo misonarigo migawo e alwora ma ji mang’eny odakie. Jo misonarigo siroga ka maduong’ mondo mi tij yalo kod tije mag kanyakla omed gurore motegno. Kinde mang’eny, jo misonari gin jo mosetieg e Skul mar Joland-Injili mar Pinyruoth. Ichulonegiga kuonde dak kendo imiyogiga nya pesa moro matin ma gikonyorego.

TIJ JARIT-ALWORA

¹⁶ Jogo ma Bura Matayo ketoga mondo obed jorit-alwora gin jo ma osemi tiegruok ma dwarore. Mondo giyud lony, ikwongoga ketgi kaka jorit-alwora ma konyo akonya mondi sa ma jarit-alwora moro onge. Owete ma kamago gin owete mohero tij yalo wach maber kendo gihero Jokristo wetegi. Gin jo painia ma jo kinda, gin jo mohero puonjore Muma e yo matut, gin jogol-twak mong’ith, kendo gilony e puonjo. Ginyiso kido ma luwore gi olembe ma roho nyago, ok gikal tong’ e timbegi, gin jo matur, kendo ginyiso rieko e pogo kor weche. Ka en owadwa mosekendo, chiege nyaka bed painia ma keto ranyisi maber e timbene kendo mong’eyo dak gi ji e yor kue. Obedo ng’at molony e tij yalo wach maber. Ong’eyo nyiso bolruok kaka dhako ma Jakristo kendo ok otem wuoyo e lo chwore kata wuoyo mang’eny ma koro en e ma iwinje. Jorit-alwora kod mondegi niga gi chenro modich ahinya. Kuom mano, jo ma temo chopo e migawono nyaka bed jo ma ok jo midekre. Jo painia ok e ma orga kwayo ni gidwaro bedo jorit-alwora. Kar mano, ginyalo nyiso jarit-alworagi gombo ma gin-go mar bedo e migawono. Jarit-alworano biro ng’adonegi paro ma nyalo konyogi.

SKUNDE MAG TIEGO JI NE TIJ NYASAYE

¹⁷ Skul mar Joland-Injili mar Pinyruoth: Nikech nitierega alwora mag lendo ma ok yaliega ahinya kendo nitie kanyakla mogwaro monego okony, joland wach Pinyruoth momedore dwarorega. Kuom mano, owete gi nyimine ma pok odonjo e kend kaachiel gi mago mosekendore nyalo oro kwayogi mondo giyud tiegruok makende e Skul mar Joland-Injili mar Pinyruoth. Bang’ wuok e skundno, ibiro orgi mondo gidhi gibed jo painia mapile kuonde ma jolendo dwaroree ahinya e piny ma thurgi. Kata kamano, jomoko kuomgi to inyalo mi migepe mamoko e pinygi kata e piny machielo ka nyalorenegi. Jo manok kuomgi inyalo or kaka jo painia makende, to moko kaka jo painia makende kuom kinde. Jo painia ma diher dhi e skundni nyalo yudo weche ma dwarore ka gidhi e romo mitimoga e chokruogwa maduong’.

¹⁸ Skul mar Gilead: Owete gi nyimine ma pok odonjo e kend kaachiel gi mago mosekendore iyieroga mondo odhi e skundni. Gin jo ma wacho dho Kisungu kendo ma tiyo ne Nyasaye kuom thuologi duto e yo makende. Gin jo ma nyalo miyo tij yalo ogurre motegno kendo ginyalo tayo weche motudore gi bad ofis. Gin jo mosenyiso ni gihero tiyo ne owete kendo konyo jo mamoko e yo mang’won mondo jogo ong’e weche manie Ndiko kod weche ma riwruok mar oganda Jehova chiko. Komiti mar Bad Ofis mar piny ka piny e ma oroga fom ne jolendo mowinjorego mondo gikwa dhi e skundni. Jo mosewuok e skundni imiyoga migawo mar tiyo e Bethel kata e tij yalo, bed ni omigi migawono e pinygi kata e piny machielo.

TIJ BETHEL

¹⁹ Tiyo e Bethel en thuolo makende. Bethel en nying ma tiende en “Od Nyasaye,” kendo nyingno owinjore ndi nimar Bethel en ka mitayoe tij Nyasaye. Owete gi nyimine ma tiyo Bethel timo tich ma dwarore ahinya mar goyo buge ma lero Muma, lokogi e dhok mamoko, kendo pogogi ne ji kuonde ma gidwaroree. Nikech Bura Matayo e ma chiko kaka kanyakla duto me piny mangima onego otim gik moko, gigeno ahinya tich ma jo Bethel timo. Jo Bethel mang’eny ma konyo e loko dhok timo kamano e alwora mar bad ofisgi ka gidak ka ma thoth jo ma wacho dhok ma gilokono odakie. Mano bende konyogi lony gi dhok ma gilokono nimar giwinjo ka ji wache pile. Bende, ginyalo fwenyo ka be ji winjo tiend weche ma gitiyogo e buge ma giseloko.

²⁰ Thoth tije mitimo Bethel gin tije michodoe luya nikech gidwaro teko mang’eny. Kuom mano, ng’enyne, jo miluongo e Bethel gin owete mosebatis ma pod gin rowere ma tekregi ng’eny kendo ma ok jo midekre. Ka bad ofis ma rito pinyu dwaro ji to in bende diher tiyo e Bethel, inyalo penjo jodong-kanyaklau gik ma dwarore ni itim.

TIJE GEDO

²¹ Tij gero ute mitiyogo e tij Nyasaye en tich maler ne Nyasaye mana kaka tij gero hekalu ma Solomon notimo. (1 Ru. 8:13-18) Thoth owete gi nyimine nyisoga kinda ahinya ka gichiwo thuologi kod mwandugi ne tijego.

²² Be in bende inyalo konyo e tijni? Ka in jalendo mosebatis to diher konyo e tij gedo, owete ma tayo tije mag gedo e alworau biro mor tiyo kodi kendo gibiro tiegi kata ka po ni ionge gi lony moromo. Donge inyalo nyiso jodong-kanyaklau ni diher konyo e tijego? Jolendo moko mosebatis kendo mosechopo weche ma dwarore, osegachiwore ne tij gero ute mitiyogo e tij Nyasaye e pinje mamoko.

²³ Nitie tije gedo mathoth ma ng’ato nyalo chiwore mondo otim. Jolendo mosebatis, ma keto ranyisi maber e ngimagi, ma nigi lony moro moromo, kendo ma nyalo konyo e tije gedo mitimo thurgi, inyalo ket kaka jo mochiwore e Migawo Mochung’ ne Gedo. Jolendo mamoko nigi nyalo mar dhi e tije gedo man kuonde maboyo kuom kinde moyangnegi. Bad ofis e ma ketoga jo mochiwore ne tije gedo mondo giti e kind jumbe ariyo nyaka dweche adek. Jo ma ofis oketo mondo oti tije gedo kuom thuolo malach iluongo ni jo moket ne tije gedo. Ng’at moket ne tije gedo mitimo e piny machielo iluongo ni ng’at moket ne tije gedo e piny ma oko. Grube mag Gedo bedoga gi jo moket ne tije gedo kod jo mochiwore ne tije gedo. Grubego e ma tayoga tij gedo mitimo to ikonyogiga gi jo mochiwore e Migawo Mochung’ ne Gedo kod jo mochiwore koa e kanyakla migedonegi. Grube mag Gedo darga ka wuok e tij gedo moro nyaka e machielo e bwo alwora ma bad ofisgi rito.

IN GI CHENRO MAGE MAG TIYO NE NYASAYE E YORE MOMEDORE?

²⁴ Ka isechiwo ngimani ne Jehova, onge kiawa ni gomboni maduong’ en tiyone nyaka chieng’. Kata kamano, in gi chenro mage mag tiyo ne Nyasaye e yore momedore? Keto chenro mag tiyo ne Nyasaye e okang’ momedore biro konyi mondo iti gi tekreni kod mwanduni e yo mariek. (1 Kor. 9:26) Chenro ma kamago nyalo konyi timo dongruok e winjruokni gi Nyasaye kendo miyo iket pachi kuom gik ma dwarore moloyo sa mitimo kinda mondo ichop e migepe momedore.​—Fil. 1:10; 1 Tim. 4:15, 16.

²⁵ Jaote Paulo noketonwa ranyisi maber monego waluw sama watiyo ne Nyasaye. (1 Kor. 11:1) Paulo nonyiso kinda mar tiyo ne Jehova gi tekrene duto. Nong’eyo ni Jehova nosemiye thuolo mang’eny mag tiyone. Nondiko ne owete ma ne ni Korintho niya: “Oseyawna dhoot malach mar tich.” Donge kata wan bende oseyawnwa dhoot malach kamano e ndalowagi? Ee, nimar wan gi thuolo mang’eny mag tiyo ne Jehova kanyachiel gi kanyakla, to moloyo e tij yalo wach maber mar Pinyruoth. To mana kaka notimore ne Paulo, donjo e ‘dhoot malachno’ dwaro ni waked ahinya gi “jo akwede mang’eny.” (1 Kor. 16:9) Paulo noikore kata mana kwedore owuon. Ne ane kaka nondiko: “Asiko ka agoyo ringra kendo chike kaka misumba.” (1 Kor. 9:24-27) Be wan gi paro ma chal gi mareno?

²⁶ Ijiwo ng’ato ka ng’ato kuomwa mondo oket chenro mag tiyo ne Nyasaye e okang’ momedore ka luwore gi nyalo ma en-go. Jomoko ma sani tiyo ne Nyasaye kuom thuologi duto, timo kamano mana nikech ne giketo chenro mag timo kamano chon e ngimagi. Kata ka ne pod gin nyithindo, jonyuolgi kod jo mamoko ne ojiwogi mondo giket chenrogo. Mano osemiyo gitiyo ne Jehova gi mor kod ilo ma ok giywag ang’e ngang’. (Nge. 10:22) Nitiere yore mamoko ma ng’ato nyalo tiyonego Nyasaye e okang’ momedore. Yorego gin kaka dhi e tij yalo juma ka juma, bedo gi ng’at mipuonjo Muma, kata tiyo gi thuolo momedore e iko chokruogewa. Gima duong’ en ni wasik ka wachung’ motegno kendo watim tich mosemiwa e yo maber chuth. Ka watimo kamano, wabiro miyo Jehova duong’ kendo chopo gombowa mar tiyone mochwere nyaka chieng’.​—Luka 13:24; 1 Tim. 4:7b, 8.