SULA MAR APAR GARIYO
Kaka Inyalo Bedo Osiep Nyasaye
1, 2. Moko kuom osiepe Jehova ne gin jomage?
DIHER bedo osiep ng’at ma chalo nade? Nyalo bedo ni en ng’at mihero, ng’at minyalo winjorigo maber, ng’at ma kite ber, kendo ma timbene mori.
2 Jehova yieroga joma odwaro ni obed osiepene. Kuom ranyisi, Ibrahim ne en achiel kuom osiepe Jehova. (Isaya 41:8; Jakobo 2:23) Jehova nohero Daudi bende. Nowacho ni Daudi en ‘jal ma chunye ohero.’ (Tich Joote 13:22) Janabi Daniel bende en ng’at ma Jehova ‘nohero ahinya.’—Daniel 9:23.
3. Ang’o momiyo Ibrahim, Daudi, kod Daniel nobedo osiepe Jehova?
3 Ere kaka Ibrahim, Daudi, gi Daniel ne obedo osiepe Jehova? Jehova nonyiso Ibrahim niya: “Isewinjo dwonda.” (Chakruok 22:18) Jehova mako osiep gi joma winje kendo luwo chikene. Onyalo bedo osiep ji mang’eny. Jehova nolero ne oganda Jo-Israel kama: “Winjuru dwonda, mi anabed Nyasachu to unubed joga.” (Jeremia 7:23) Omiyo, in bende inyalo bedo osiep Jehova ka iwinje.
JEHOVA RITO OSIEPENE
4, 5. Ere kaka Jehova ritoga osiepene?
4 Muma wacho ni Jehova manyo yore monyalo nyisogo “tekone ne jogo ma lame gi chunygi duto.” (2 Weche mag Ndalo 16:9) E ndiko mar Zaburi 32:8, Jehova singo ne osiepene niya: ‘Abiro miyou rieko kendo puonjou yo monego uluw. Abiro ng’adonu rieko ka wang’a nenou.’
5 Nitie jasigu moro ma nigi teko mang’eny ma dwaro geng’owa mondo kik wabed osiepe Nyasaye. Jehova to dwaro ritowa mondo kik gimoro hinywa. (Som Zaburi 55:22.) Kaka osiepe Jehova, watiyone gi chunywa duto. Wadhi nyime tiyone kata chandruoge bed mang’eny machalo nade. Kendo wan gi chir kaka ma jandik zaburi ne nigo. Ne ondiko e wi Jehova niya: “Ok anayiengni nikech en e bada ma korachwich.” (Zaburi 16:8; 63:8) Satan temo geng’owa mondo kik wabed osiepe Nyasaye e yo mane?
MIRIAMBO MA SATAN WACHO E WI DHANO
6. En ang’o ma Satan nowacho e wi dhano?
6 E Sula mar 11, ne wapuonjore ni Satan nokwedo Jehova kowacho ni Jehova en ja miriambo. Bende, nowacho ni Jehova notimo marach nikech ne ok omiyo Adam gi Hawa ratiro mar yiero timo gima ber gi gima rach gin giwegi. Bug Ayub bende konyowa ng’eyo ni Satan wachoga miriambo e wi dhano ma dwaro bedo osiepe Nyasaye. Satan wacho ni dhano tiyonega Nyasaye mana nikech gik ma Nyasaye miyogi to ok nikech gihere. Bende, ne oramo ni onyalo loko ng’ato ang’ata mondo owe tiyo ne Nyasaye. Wane ane puonj ma wanyalo yudo kuom Ayub kod kaka Jehova ne orite.
7, 8. (a) Jehova nowacho ang’o e wi Ayub? (b) Satan to nowacho ang’o e wi Ayub?
7 Ayub ne en ng’a? Ne en ng’at moro maber ma nodak chiegni higni 3,600 mosekalo. Jehova nowacho ni kindego ne onge ng’ato ang’ata e piny ma ne inyal pim gi Ayub. Ayub nohero Nyasaye kendo ne omiye luor ahinya. Bende, ne osin gi gik maricho. (Ayub 1:8) Ayub ne en osiep Jehova gadier.
8 Satan noramo ni Ayub ne tiyo ne Nyasaye mana nikech gik ma ne Nyasaye omiye. Satan nowacho ne Jehova niya: ‘Donge iseketo chiel molwore kaachiel gi joode kod gimoro amora ma en-go? Iseguedho tich lwete kendo jambe opong’o piny. To koro, rie lweti ikaw gik moko duto ma en-go mondo ine ka ok obi yanyi e wang’i.’—Ayub 1:10, 11.
9. Jehova nomiyo Satan thuolo mar timo ang’o?
9 Satan nowacho ni Ayub ne tiyo ne Jehova mana nikech gik ma ne Jehova miye. Satan bende noramo ni onyalo miyo Ayub owe tiyo ne Jehova. Jehova ne ok oyie gi wachno. Kata kamano, Jehova ne omiyo Satan thuolo mar temo Ayub mondo one ni Ayub ne en osiepne nikech nohere.
SATAN MONJO AYUB
10. Satan nomonjo Ayub e yore mage, to Ayub notimo ang’o?
10 Mokwongo, Satan nokwalo jamni duto mag Ayub, kata nyalo bedo ni ne onegogi. Kae to nonego jotich Ayub mang’eny. Ayub nolalo gimoro amora ma ne en-go. E monjne mogik, nonego nyithind Ayub apar kotiyo gi yamo mager. Kata kamano, “E wechego duto, Ayub ne ok oketho kata wacho ni Nyasaye otimo marach e yo moro amora.”—Ayub 1:12-19, 22.
Jehova noguedho Ayub nikech nonyiso ni en osiepne madier
11. (a) En ang’o machielo ma Satan notimo ne Ayub? (b) Ayub notimo ang’o?
11 Satan ne ok ogik gi kanyo. Nodhi nyime wacho ne Jehova niya: “Rie lweti imul ringrene gi chokene mondo ine ka ok obi yanyi e wang’i.” Omiyo, Satan nogoyo Ayub gi tuo moro marach. (Ayub 2:5, 7) To e ma pod Ayub ne ok oweyo lamo Jehova. Ayub wacho niya: “Nyaka thona, abiro siko ka an ng’at matir!”—Ayub 27:5
12. Ayub nonyiso nade ni Satan en ja miriambo?
12 Ayub ne ok ong’eyo miriambo ma Satan ne owacho kuome kod gimomiyo ne ochandore. Noparo ni Jehova e ma ne kelone chandruoge. (Ayub 6:4; 16:11-14) Kata kamano, ne ok oweyo lamo Jehova. Koro ne nyalo nenore maler ni Ayub ne ok ohero Jehova mana nikech gik ma ne omiye. Ne en osiep Jehova nikech nohere. Gik ma ne Satan owacho kuome te ne gin miriambo!
13. Ang’o ma Ayub noyudo nikech nomakore gi Jehova?
13 Kata obedo ni Ayub ne ok ong’eyo gik ma ne timore e polo, ne omakore gi Jehova monyiso ni Satan en ja miriambo. Jehova noguedho Ayub nikech nonyiso ni en osiepne madier.—Ayub 42:12-17.
MIRIAMBO MA SATAN WACHO KUOMI
14, 15. En miriambo mane ma Satan nowacho e wi ji duto?
14 Inyalo puonjri gik mang’eny kuom gik ma ne otimore ne Ayub. Kata mana e kindewagi, Satan wacho ni watiyo ne Jehova nikech gik ma omiyowa. E Ayub 2:4, Satan nowacho niya: “Dhano nyalo chiwo gimoro amora ma en-go mondo ores ngimane.” Omiyo, Satan ne ok owacho miriambo e wi Ayub kende, nowacho ni ji duto lamo Jehova nikech gik ma Jehova miyogi. Higni mang’eny bang’ ka Ayub nosetho, Satan pod ne medo jaro Jehova kendo wacho miriambo e wi jotichne. Kuom ranyisi, Ngeche 27:11 wacho kama: “Wuoda, bed mariek kendo imi chunya mor, mondo ayud wach ma dadwokgo ng’at ma jara.”
15 In bende inyalo yiero luwo chike Jehova mondo ibed osiepne, kinyiso ayanga ni Satan en ja miriambo. Gima berie moloyo minyalo timo e ngimani en bedo osiep Nyasaye kata kochuno ni nyaka itim lokruoge madongo e ngimani. Bedo osiep Nyasaye en gima onego wakaw mapek. Satan wacho ni ok inyal dhi nyime lamo Jehova ka chandruoge oyudi. Otemo wuondowa mondo wawe lamo Nyasaye. Otemo wuondowa gi yore mage?
16. (a) Gin yore mage ma Satan tiyogo mondo omi ji owe tiyo ne Jehova? (b) Jachien nyalo tami tiyo ne Jehova e yo mane?
16 Satan tiyo gi yore mopogore opogore mondo otem ketho osiep manie kindwa gi Nyasaye. Omonjowa “kaka sibuor ma ruto komanyo ng’at ma dongam.” (1 Petro 5:8) Kik kawi giwuoro ka osiepeni, joodu, kata jomoko temo tami puonjori Muma kendo timo gik makare. Inyalo chako neno ka gima gimonji.a (Johana 15:19, 20) Satan bende wuondorega mondo onenre “kaka malaika mar ler.” Omiyo, onyalo wuondowa ma wawe luwo chike Jehova. (2 Jo-Korintho 11:14) Yo moro machielo ma Satan nyalo temo tiyogo mondo otamwa tiyo ne Jehova en miyo wabed gi paro moro ni ok wanyal moro Nyasaye e yo moro amora.—Ngeche 24:10.
LUW CHIKE JEHOVA
17. Ang’o momiyo waluwo chike Jehova?
17 Sama waluwo chike Jehova, wanyiso ni Satan en ja miriambo. En ang’o ma biro konyowa luwo chike Jehova? Muma wacho kama: “Nyaka uher Jehova Nyasachu gi chunyu duto kod ngimau duto, kendo gi tekou duto.” (Rapar mar Chik 6:5) Waluwo chike Jehova nikech wahere. Kaka wamedo hero Jehova, e kaka biro bedonwa mayot timo gimoro amora modwaro. Jaote Johana nondiko niya: “Tiend hero Nyasaye e ma, ni waluw chikene; to chikene ok tek luwo.”—1 Johana 5:3.
18, 19. (a) Gin gik mage ma Jehova nyisowa ni kik watim? (b) Wang’eyo nade ni Jehova ok nyal nyisowa ni watim gima ok wanyal timo?
18 Gin gik mage ma Jehova nyisowa ni kik watim? Moko kuomgi yudore e sanduk ma wiye wacho ni, “Sin gi Gik ma Jehova Osin-go.” Inyalo paro ni moko kuom gigo ok richo ahinya. Kata kamano, ka isomo Muma kendo iparo matut kuom gik misomogo, ibiro neno ber mar luwo chike Jehova. Inyalo fwenyo ni nitie lokruoge moko ma onego itim e ngimani. Timo lokruogego nyalo bedo matek. Kata kamano, kitimogi to ibiro bedo gi kuwe kod mor, ma gin gik ma osiepe Nyasaye kende e ma bedogo. (Isaya 48:17, 18) Wang’eyo nade ni timo lokruogego ok tek?
19 Jehova ok nyal nyisowa ni watim gima ong’eyo ni nyalo tamowa timo. (Rapar mar Chik 30:11-14) Ong’eyowa moloyo kaka wang’ere wawegi nikech en osiepwa madier. Ong’eyo nyawowa kod kama tekrewa nyalo chope. (Zaburi 103:14) Jaote Paulo jiwowa niya: “Nyasaye en ja adiera, kendo ok obi weyo mondo otemu mokalo ma unyalo nanoe, to kaachiel gi temno obiro losonu yo mar wuok mondo ubed gi nyalo mar nano.” (1 Jo-Korintho 10:13) Wan gi geno ni Jehova biro miyowa teko mar timo gik makare. Obiro miyi “teko mokalo mapile” mondo ilo tem moro amora ma nyalo yudi. (2 Jo-Korintho 4:7) Bang’ ka Jehova nosekonyo Paulo moloyo tembe, Paulo ne nyalo wacho gi chir niya: “E weche duto, an gi nyalo kokalo kuom jal ma miya teko.”—Jo-Filipi 4:13.
HER GIK MA JEHOVA OHERO
20. Gin kido mage ma onego inyis to nikech ang’o?
20 Ka wadwaro bedo osiepe Jehova, nyaka wawe timo gik ma osin-go. E wi mano, nitie gimachielo ma bende nyaka watim. (Jo-Rumi 12:9) Osiepe Nyasaye ohero gik ma ohero. Oler gigo e Zaburi 15:1-5. (Som.) Osiepe Jehova bedo gi kido ma Jehova nigo. Kidogo gin kaka “hera, mor, kuwe, horuok, ng’wono, ber, yie, muolo, kod ritruok.”—Jo-Galatia 5:22, 23.
21. Ang’o ma nyalo konyi bedo gi kido ma Nyasaye ohero?
21 En ang’o ma nyalo konyi bedo gi kido mabeyogo? En ka isomo Muma pile kendo ipuonjori weche manie iye. Timo mago biro konyi hero gik ma Jehova ohero. (Isaya 30:20, 21) Ka idhi nyime timo kamano, ibiro hero Jehova moloyo, kendo ibiro dwaro luwo chikene.
22. Ang’o ma biro timore ka iluwo chike Jehova?
22 Lokruoge ma nyalo dwarore ni itim e ngimani inyalo pim gi lonyo lewni moti kae to irwako manyien. Muma wacho ni onego ‘ilony kit dhano machon kod timbene’ kae to irwak “kit dhano manyien.” (Jo-Kolosai 3:9, 10) Kata obedo ni timo lokruogego ok yot, ka watimogi kendo waluwo chike Jehova, osingo ni obiro miyowa “pok maduong’.” (Zaburi 19:11) Chak luwo chike Jehova sani mondo inyis ni Satan en ja miriambo. Ti ne Jehova nikech ihere gadier, to ok mana nikech gueth ma ibiro yudo bang’e. Kitimo kamano, ibiro bedo osiep Nyasaye madier!
a Mano ok nyis ni Satan e ma chikogi achiel kachiel ni gitami puonjori Muma. Kata kamano, Satan e “nyasach pinyni,” kendo ‘piny duto ni e tekone.’ Kuom mano, ok kawwa giwuoro ka jomoko temo tamowa tiyo ne Jehova.—2 Jo-Korintho 4:4; 1 Johana 5:19.