Barua Mowuok Kuom Bura ma Tayo Joneno mag Jehova

Jakristo wadwa:

Mana kaka ing’eyo, Muma en buk ma thothne wuoyo kuom ji. Thoth joma iwuoyo kuomgigo ne gin chwo gi mon ma ne ochung’ motegno kata obedo ni ne gikalo e pek ma chalo gi ma wakaloe sani. Jogo ne gin mana “dhano ma chal kaka wan.” (Jakobo 5:17) Moko kuomgi ne ochandore nikech masiche kod parruok mang’eny. Moko ne ochwanyore ahinya nikech joodgi kata joma gilamogo Jehova ne otimonegi marach. To nitie moko mogwaro ma chunygi ne chandogi nikech kethogi giwegi.

Be joma kamago ne oseweyo lamo Jehova chuth? Ooyo. Nenore ni thothgi ne chalo gi jandik-zaburi ma nolamo niya: ‘Aseba yo kaka rombo molal. Dwar jatichni, nimar wiya ok wil gi wecheni michiko.’ (Zaburi 119:176) Dibed ni kamano e kaka in bende iwinjo e chunyi?

Wi Jehova ok wilga gi joge mobayo yo moweyo kueth. Kar mano, otimo kinda mar manyogi, ka kinde mang’eny otiyo gi Jokristo wetegi. Kuom ranyisi, ne ane kaka Jehova nokonyo Ayub jatichne e kinde ma masiche ne olwore. Ayub nolalo mwandune, joode ne otho, kendo tuo marach ahinya ne ogoye. E wi mago duto, Ayub ne onano sama joma ne onego bed ni hoye kendo jiwe e ma koro ne chwoye gi weche. Kata kamano, Ayub ne ok oweyo Jehova kata obedo ni nitie kinde moro ma ne obedoe gi paro ma ok kare. (Ayub 1:22; 2:10) Ere kaka Jehova nokonyo Ayub mondo obed gi paro makare kendo?

Yo achiel ma Jehova nokonyogo Ayub ne en kokalo kuom Elihu jal ma ne gilamogo Jehova. Sama Ayub ne olo chunye ne Elihu kuom weche ma ne chande, Elihu nochikone ite. Wechego nomulo chuny Elihu mi ochako wuoyo. Iparo ni gin weche mage ma ne odhi wacho? Be ne odhi donjo ne Ayub kaka jaketho kendo miyo obed gi wich-kuot? Be Elihu ne okawore ni en ober moloyo Ayub? Ooyo ngang’! Roho mar Nyasaye nomiyo Elihu owacho kama: ‘E nyim Nyasaye an kod in waromre; an bende ne ochueya gi lowo.’ Kae to nojiwo Ayub niya: ‘Ng’e ni, ok dabwogi ma amiyi luoro, ok abi chuni gi teko.’ (Ayub 33:6, 7) Elihu ne ok omedo ne Ayub parruok. Kar mano, ne orieyo pach Ayub e yo mamuol kendo ne ojiwe kaka dwarore.

Dwaher ni ing’e ni chuny ma kamano e momiyo waloso buk misomoni. Mokwongo, ne wachiko itwa malong’o ne paro ma joma oseba yo bedogago kendo ne wanono matut chal margi. (Ngeche 18:13) Kae to bang’e ne wanono Ndiko adimba kendo lemo mondo wang’e kaka Jehova nokonyo jotichne machon ma ne ni e chal ma kamago. Gikone, ne wachoko weche joma Ndiko wuoyoego kendo pimo chalgi gi mag Jokristo ma ndalogi mondo mi walos bugni. Omiyo, wajiwi ahinya ni mondo isom bugni adimba. Ng’e ni waheri ahinya kaka Jakristo wadwa.

Bura Matayo Joneno mag Jehova