PENJO MAR 9
Be Onego Ayie ni Gik Moko Nosieko Kendgi?
INYALO TIMO NANG’O?
Par ane wachni: Nitie wach moro ma chando pach Alex. Osebedo koyie ni Nyasaye nochueyo gik moko duto. Kata kamano, kawuono opuonjgi e klas ni gik moko nosieko kendgi kendo japuonj nowachonegi ni nonro ma josayans osetimo nyiso ni mano en adier. Nikech Alex ok dwar ni onenre ka ng’ama ofuwo, owacho kama e chunye: “Ka en adier ni josayans osenono moyudo ni gik moko nosieko kendgi, donge kare ero gin mana kare?”
Ka dine bed ni in Alex, be inyalo yie ni gik moko nosieko kendgi mana nikech ondik kamano e buge mipuonjogo ji e skul?
PAR ANE MONDI!
Joma wacho ni gik moko nosieko kendgi kinde mang’eny wachoga mana gik ma giyiego, to ok ging’eyo gimomiyo giyie gi wechego.
Nitie joma oyie ni gik moko nosieko kendgi mana nikech ipuonjogi kamano e kanisa.
Nitie joma oyie ni gik moko nosieko kendgi mana nikech ipuonjogi kamano e skul.
PENJO AUCHIEL MONEGO IPAR
Muma wacho kama: “Ot ka ot nigi ng’at mogere, to jal ma ne ogero gik moko duto en Nyasaye.” (Jo-Hibrania 3:4) Be mano en wach ma owinjore yiego?
Wacho ni gik moko nosieko kendgi chalre gi wacho ni odni ne ok oger, kar mano ne osieko mana kende
GIMA JI WACHO: Piny nosieko bang’ gimoro muoch dichiel matek.
1. En ng’a kata en ang’o ma nomiyo gino omuoch?
2. En paro mane ma winjore mayot: Wacho ni gik moko nosieko kendgi koso ni nitie ng’at ma nochueyo gik moko duto?
GIMA JI WACHO: Dhano nowuok kuom le.
3. Ka en adier ni dhano nowuok kuom le kaka bim, to kare ang’o momiyo rieko ma dhano nigo oloyo mar bim e okang’ mabor kamano?
4. Ang’o momiyo kata mana gik ma ngima matindo tindo ng’eyo korgi tek kendo pod otamo josayans lero?
GIMA JI WACHO: Wach mar ni gik moko nosieko kendgi en gima osenon moyud ni en adier.
5. Be ng’ama wacho kamano osenono wachno en owuon?
6. Nitie ji adi ma oseyie ni gik moko nosieko kendgi mana nikech ne onyisgi ni nitie ji mang’eny mosomo ma bende oyie gi wachno?
Julia wacho kama: “Par ane ni iwuotho e bungu moro kae to ipo kineno ot moro ma jaber, be inyalo wacho ni yiende manie bunguno nochung’ moro ka moro kama owinjore mi odno ogerore kende? Dwoko en ni mano ok nyalre. To kare ang’o momiyo onego wapar ni gik moko duto nosieko mana kendgi?”
Gwen wacho kama: “Par ane ka ng’ato onyisi ni ink ma igoyogo buge e kambi moro maduong’ ne opukore e kor ot gi tado mi oloso diksonari maber. Be inyalo yie kode adier?”
ANG’O MOMIYO ONEGO IYIE KUOM NYASAYE?
Muma jiwi ni mondo iti gi ‘nyaloni mar paro.’ (Jo-Rumi 12:1) Mano nyiso ni gik ma iyiego ok onego obed mana ni otenore kuom:
KAKA IWINJO E CHUNYI (Awinjo awinja ei chunya ni nyaka bed ni nitie ng’at moro man gi teko moloyo mar dhano)
TIMO GIMORO NIKECH JI MANG’ENY TIMO (Adak kama ji mang’eny oyie kuom Nyasaye)
GIK MA JOMOKO E MA OCHUNIGO (Jonyuolna e ma nochuna gi yie kuom Nyasaye)
Kar mano, onego ing’e gimomiyo iyie kuom Nyasaye.
Teresa wacho kama: “Sama an e klas kendo awinjo ka japuonj lero kaka dend dhano tiyo, mano miyo abedo gadier ni Nyasaye nitie. Fuondewa duto tiyo maber kaka owinjore, nyaka fuonni matinie mogik kendo gitimo kamano ma ok wang’eyo. Kuom adier, dendwa ochue e yo miwuoro!”
Richard wacho kama: “Sama aneno gorofa moro ma rabora, meli moro maduong’, kata mtoka, apenjoraga kama, ‘Ng’ano ma noloso gigi?’ Mondo ng’ato olos mtoka, nyaka obed ng’at mariek nikech loso mtoka dwaro ni ng’ato oriw gik matindo tindo eka mtokano oti maber. Ka mtoka e ma nyaka bed gi ng’at molose, to donge dhano bende nyaka bed gi ng’at ma nochueye?”
Anthony wacho kama: “Kaka namedo somo sayans, e kaka namedo neno ni puonj mar ni gik moko nosieko en gima nono. . . . Aneno ni yie kuom Jachuech yot moloyo yie ni gik moko nosieko kendgi.”
GIMA ONEGO IPAR
Kata obedo ni josayans osetimo nonro kuom higni mang’eny, pod ok ginyal chiwo paro achiel ma giyiego giduto malero kaka gik moko nosieko kendgi. Ka josayans e ma ok nyal winjore e wi wachno, kare ang’o momiyo in to diyie gi puonj ma kamano?