Nyasaye Nochueyo Dichwo Mokwongo kod Dhako Mokwongo

Jehova ne oloso kamoro ma jaber ma niluongo ni puodho mar Eden. Puodhono ne opong’ gi maua, yiende, gi le bende. Kae to Nyasaye ne okawo lowo mi ochueyogo Adam dichwo mokwongo, kae to nokudho muya e ume. Be ing’eyo gima ne otimore? Dichwono nobedo mangima! Jehova ne oketo Adam mondo orit puodhono, kendo Jehova ne onyise ni omi le duto nying.

Jehova nomiyo Adam chik moro makende. Nonyiso Adam niya: ‘Inyalo chamo olemb yien duto, mak mana olemb yath achiel kende e ma kik icham. Kichamo olemb yadhno, ibiro tho.’

Bang’e, Jehova nowacho kama: ‘Adwaro loso ne Adam jakony.’ Jehova nomiyo Adam onindo nindo matut, kae to nokawo ng’etne achiel mi olosonego dhako. Dhakono ne nyinge Hawa. Adam gi Hawa e ma nokwongo dak kanyachiel kaka joot. Adam nowinjo nade e chunye ka nohango neno chiege? Ne omor sidang’ mi owacho kama: ‘Nee ng’ama Jehova oloso kowuok kuom ng’etna! Koro to weche beyo! Ayudo ng’ama chal koda ndi.’

Jehova ne onyiso Adam gi Hawa ni ginyuol nyithindo kendo gipong’ piny. Ne odwaro ni giyud mor kanyachiel kendo gilos piny ngima obed paradiso kata puodho ma jaber mana kaka puodho mar Eden. Kata kamano, weche ne ok odhi maber. Ang’o ma notimore? Wabiro neno e sula ma luwo.