Ruth gi Naomi

Ndalo moro ka ne kech nitie e Israel, dhako moro miluongo ni Naomi ne odar modhi e piny Moab ka en gi chwore gi yawuotgi ariyo. Ka ne gin kuno, chwor Naomi ne otho. Yawuotgigo ne okendo nyi Moab. Nyirigo ne nyinggi Ruth gi Orpa. Gima lit en ni yawuoyigo bang’e ne otho.

Ka ne Naomi owinjo ni kech ne oserumo e piny Israel, nong’ado ni odog kuno. Ruth gi Orpa ne owuok Moab kode, to ka ne gin e yo, Naomi ne onyisogi kama: ‘Un mon mabeyo ahinya, kendo ne udak maber gi yawuota. An be userita maber. Daher ni uyud chwo kendo. Doguru Moab.’ Ne gidwoke niya: ‘Waheri ahinya! Ok wadwar weyi.’ Naomi nomedo nyisogi ni gidogi. Gikone, Orpa nojok modok thurgi, kata kamano, Ruth to nodong’ gi Naomi. Naomi nonyise niya: ‘Orpa osedok ir joge gi nyisechene. Luwe mondo idog e od minu.’ To Ruth nowachone niya: ‘Ok abi weyi. Jou nobed joga, kendo Nyasachi nobed Nyasacha.’ Iparo ni Naomi nowinjo nade e chunye ka ne owinjo weche ma Ruth nowachonego?

Ruth gi Naomi ne ochopo Israel e kinde ma ne Jo-Israel chako kayo cham miluongo ni shairi. Chieng’ moro, Ruth ne odhi e puoth ng’at moro ma niluongo ni Boaz, ma ne en wuod Rahab mondo okwany cham ma jokeyo ne weyoga e puodho. Boaz ne owinjo ni Ruth ne en Nya-Moab, kendo ni nomakore gi Naomi. Boaz ne onyiso jotichne mondo giwe cham moko e puodho mondo Ruth okaw.

Ka ne Ruth odok ot godhiambo, Naomi nopenje niya: ‘Kawuono nichoko cham e puoth ng’a?’ Ruth nodwoke niya: ‘E puoth ng’at moro ma nyinge Boaz.’ Naomi nonyise niya: ‘Boaz en achiel kuom wede jaoda. Med mana choko cham e puothe kanyo gi nyiri mamoko. Ka in e kind nyiri weteni kanyo, to weche beyo.’

Ruth ne odhi nyime tiyo e puoth Boaz nyaka tij keyo ne orumo. Boaz ne oneno kaka Ruth ne en nyako ma jakinda kendo mariek. E ndalono, ka ne dichwo otho to oweyo dhako ka onge gi nyithindo ma yawuoyi, achiel kuom yuochene ne nyalo kende. Kuom mano, Boaz ne okendo Ruth. Ne ginyuolo wuoyi, kendo ne gichake ni Obed, ma bang’e nobedo kwar Ruoth Daudi. Osiepe Naomi ne mor ahinya. Ne giwachone kama: ‘Jehova nokwongo omiyi Ruth ma osemakore kodi ahinya, to sani bende koro ochako oguedhi gi nyakwaro. Opak nying Jehova.’