Gideon Noloyo Jo-Midian

Mosmos, Jo-Israel nochako oweyo Jehova, mi gichako lamo nyiseche manono. Kuom higni abiriyo, Jo-Midian ne kwalo jamni mag Jo-Israel kendo ketho cham e puothegi. Mondo Jo-Midian kik hinygi, Jo-Israel ne pondoga e lwendni kod e wi gode. Ne gisayo Jehova mondo oresgi. Jehova ne owinjo kwayogi, kendo ne ooro malaikane ir dichwo moro ma niluongo ni Gideon. Malaikano nonyiso Gideon niya: ‘Jehova oseyieri mondo ibed jalweny ma biro reso Jo-Israel.’ Gideon nopenjo kama: ‘An dares Jo-Israel nade? An ng’at manono malich.’

Ere kaka Gideon ne dhi ng’eyo ni Jehova noseyiere mondo ores joge? Ne okawo yie rombo kae to oketo e lowo, mi onyiso Jehova niya: ‘Ka kiny gokinyi ayudo ka yiergi otimo pi to lowo to otwo, abiro ng’eyo ni idwaro tiyo koda e reso Jo-Israel.’ Kinyne noyudo ka yiergo otimo pi to lowo to ne otwo! Kae to Gideon ne okwayo Jehova mondo yiergo e ma kinyne obed motwo to lowo obed mang’ich. Ka ne mano otimore, Gideon koro ne obedo gadier chuth ni Jehova ne oseyiere mondo ores Jo-Israel. Ne ochoko jolweny mondo giked gi Jo-Midian.

Jehova nonyiso Gideon kama: ‘Abiro miyo Jo-Israel olo jowasikgi. Kata kamano, nikech in gi jolweny mang’eny, unyalo po kuparo ni un e muloyo lwenyno. Nyis ng’ato ang’ata ma luor mondo odog dala.’ Jolweny 22,000 ne odok dala, kendo 10,000 kende e ma nodong’. Kae to Jehova nowachone kama: ‘Jolwenygi pod ng’eny ahinya. Tergi e dho aora kae to inyisgi gimodh pi. Joma omodho ka otang’ ne jowasigu e ma idong’go.’ Mana chwo 300 kende e ma ne omodho pi ka otang’. Jehova ne osingo ne Gideon ni jolweny matin-go ne dhi loyo jolweny 135,000 mag Midian.

Ka ne piny oselil, Jehova ne onyiso Gideon kama: ‘Sa koro osechopo mar monjo Jo-Midian!’ Gideon ne omiyo jalweny ka jalweny tung’ gi agulu ma nigi taya e iye. Nonyiso jolwenygo kama: ‘Ng’iuru kaka atimo, kae to un be utim kamano.’ Gideon nogoyo tung’, notoyo agulu, kendo ne ofwayo taya ma ne en-go ka okok niya: “Lwenyni en mar Jehova gi Gideon!” Ji 300 ma ne ni kodego bende ne otimo kamano. Luoro nomako Jo-Midian ahinya, kendo ne gichako ringo koni gi koni. Chochnino ne omiyo gichako monjore e kindgi giwegi. Jehova ne okonyo Jo-Israel loyo jowasikgi kendo.