Hana Nolemo Kokwayo Jehova Nyathi ma Wuoyi

Ja-Israel moro ma ne iluongo ni Elkana ne nigi mon ariyo ma ne gin Hana gi Penina. Elkana ne ohero Hana ahinya. Penina ne ohero jaro Hana nikech Hana ne onge nyathi to Penina ne nigi nyithindo mang’eny. Higa ka higa, Elkana ne dhiga lemo e hema mar lamo ma ne ni Shilo ka en gi joode duto. Chieng’ moro ka ne gin kuno, Elkana ne oneno ka jaode ma Hana okuyo marach. Ne owachone niya: ‘We ywak Hana. Aheri ahinya.’

Bang’ mano, Hana ne odhi kar kende mondo olem. Ne oywak malit kosayo Jehova mondo okonye. Ne osingore kama: ‘Jehova, kimiya nyathi ma wuoyi, abiro chiwonigo mondo otini kuom ngimane duto.’

Ka Eli Jadolo Maduong’ noneno Hana ka dhoge tetni kendo ofiko ume, Eli noparo ni Hana nomer. Hana nonyise niya: ‘Ooyo ruodha, ok amer. An gi chandruok maduong’, kendo mano e gima anyiso Jehova.’ Eli nofwenyo ni ne ohango ne Hana wach, kendo ne onyise kama: ‘Nyasaye mondo omiyi gima idwarono.’ Hana ne owinjo ka en gi kuwe e chunye, kendo noa malo modhi. Ka ne higa achiel pok orumo, Hana ne onyuolo wuoyi, mochake ni Samuel. Nyaka bed ni wachno ne omoro Hana ndi, donge?

Hana wiye ne ok owil gi gima ne osingo ne Jehova. Ka ne Samuel oweyo dhoth, min-gi ne otere mondo oti e hema mar lamo. Ne onyiso Eli kama: ‘Jehova odwoko lamona. Ma e wuoyi ma ne akwaye. Daher chiwe mondo oti ne Jehova kuom ngimane duto.’ Elkana gi Hana ne limoga Samuel higa ka higa kendo ne giteronega kandho manyien ma onge bade. Bang’e, Jehova nomedo Hana nyithindo mamoko abich​—yawuoyi adek gi nyiri ariyo.