Omi Chi Ruoth Kum Mager

Ruoth Ahab ne nyalo neno puoth mzabibu moro ma jaber gi chien ka en but dirisa e ode man Jezreel. Ne en puoth ng’at moro ma ne nyinge Naboth. Ahab ne dwaro puodhono, kendo ne otemo ng’iewe kuom Naboth. Kata kamano, Naboth ne otamore usone puodhono nikech Chike Jehova ne ok oyie ne ng’ato uso lop anyuola. Be Ahab ne orwako pach Naboth? Ooyo. Ahab iye ne owang’ ahinya ma kata mana wuok e otanda ne otame, kendo nodagi chiemo.

Jezebel chiege ma ne kite rach ahinya ne onyise kama: ‘Donge in e ruodh Israel? Donge in gi ratiro mar kawo gimoro amora midwaro? In ling’ aling’a, abiro kawoni puodhono ma kata tek manade.’ Jezebel ne ondiko ne jodongo barupe konyisogi ni gidonj ne Naboth ni ne oyanyo Nyasaye, kendo ni ne onego goye gi kite mi otho. Jodongo ne otimo kaka Jezebel ne ochikogi. Ka ne oseneg Naboth, Jezebel ne onyiso Ahab niya: ‘Naboth osetho. Koro inyalo kawo puothe mar mzabibu.’

Jezebel ne ok onego mana Naboth kende, to ne onego ji mathoth ma ne ohero Jehova. Bende, ne olamo nyiseche manono, kendo ne otimo gik maricho mang’eny. Jehova ne neno gik moko duto maricho ma ne Jezebel timo. Jehova ne dhi kawone okang’ mane?

Bang’ kinde ka Ahab ne osetho, wuode ma Jehoram bende ne obedo ruoth. Jehova ne ooro ng’at moro ma ne nyinge Jehu mondo okum Jezebel gi joode duto.

Jehu ne oidho gache mi odhi Jezreel, kama Jezebel ne odakie. Jehoram ne owuok mondo odhi orom gi Jehu. Ne openjo Jehu niya: ‘Be nitie kuwe e kindi kodwa?’ To Jehu nodwoke niya: ‘Kuwe dibedie nade to Jezebel minu timo gik maricho?’ Jehoram ne otemo ringo kodok yo kama ne oaye. Kata kamano, Jehu ne ochwoye gi asere mi otho.

Kae to Jehu ne odhi e dala Jezebel. Ka ne Jezebel owinjo ni Jehu biro, ne odusore mi oloso yie wiye, kendo ne ong’icho gi e dirisa ma malo e ode. Ka ne Jehu ochopo, Jezebel ne omose gi achaya. Jehu ne okok matek ne jotij Jezebel ma ne ochung’ but Jezebel, kowachonegi niya: “Boleuru piny!” Ne gidhiro Jezebel gi e dirisa, kendo ne olwar piny matek mi otho.

Bang’ mano, Jehu ne onego yawuot Ahab 70, kendo ne otieko lamo mar Baal e pinyno. Donge wechegi puonjowa ni Jehova ong’eyo gimoro amora ma timore, kendo ni e sa mowinjore, okumo ji duto ma timo gik maricho?