Jehova Nohore Kokonyo Jona

Joma nodak e taon mar Nineve e piny Asuria, ne gin joma richo ahinya. Jehova ne ooro janabi Jona mondo odhi Nineve onyisgi ni gilok timbegi. Kata kamano, Jona noringo kochomo kumoro nono. Ne oidho meli ma dhi Tarshish.

Ka ne gin e dier nam, apaka mager ne ochakore, kendo luoro nomako joma ne ni e meli. Ne gilamo nyisechegi ka giwacho ni: ‘Ang’o momiyo masirani oyudowa?’ Gikone, Jona nonyisogi kama: ‘An e ma akelonu masira. Achomo Tarshish nikech ok adwar dhi kama Jehova oorae. Bolauru e nam, kae to apaka biro kuwe.’ Jokwang’ meli ne okwongo oluor matin, to ka Jona noramo ni gibole e nam, ne gitimo kamano mi apaka nokuwe.’

Jona ne paro ni ne odhi tho. Ka ne omedo sikore e i nam, nolamo Jehova. Kae to Jehova ne ooro rech moro maduong’ ahinya. Rechno ne omwonye ngili, to ne ok otho. Ka ne en e i rech, ne olamo kama: ‘Jehova, asingorani ni kinde duto abiro timo gik midwaro.’ Jehova norito Jona mi rech ne ok orege. Nomiyo rechno ong’ogo Jona e dho nam oko bang’ ndalo adek.

Nikech Jehova ne oreso Jona, be mano nyiso ni Jona ne koro ok onego odhi Nineve? Ooyo. Jehova ne ochako onyiso Jona mondo odhi Nineve. Wang’ni to Jona noyie dhi. Ne odhi kuno mi omiyo Jo-Nineve siem niya: ‘Odong’ ndalo 40, to idhi keth Nineve.’ Kae to gimoro miwuoro ne otimore. Jo-Nineve ne orwako siemno, kendo ne giloko chunygi. Ruodh Nineve nonyiso ji niya: ‘Kwauru Nyasaye mondo owenu richou. Dipo ka ok otiekowa.’ Ka Jehova noneno kaka Jo-Nineve noloko chunygi, ne ong’ado ni ne ok odhi ketho Nineve.

Ka ne Jona ofwenyo ni ne ok dhi keth Nineve, wachno nochwanye ahinya. Parie kaka Jehova ne ohore kokonyo Jona kendo nyise ng’wono, to e ma Jona to ne ok dwar nyiso Jo-Nineve ng’wono kata matin. Nodhi mobedo e bwo tipo mar yien moro kokuyo. Kae to yienno notwo, kendo mano nomedo wang’o i Jona ahinya. Jehova nopenje kama: ‘Ang’o momiyo idewo yienni moloyo Jo-Nineve? Asenyiso Jo-Nineve ng’wono mi ok akethogi.’ Ang’o ma Jehova ne temo puonjo Jona? En ni Jo-Nineve ne nigi nengo e wang’e moloyo yien moro amora.