Malaika Norito Hezekia Mondo Jowasigu Kik Monje

Nitie kinde moro ma Jo-Asuria noketo dhoudi apar mag Israel e bwo lochgi. Bang’e, Senakerib ruodh Asuria nochano mondo okaw Juda bende, ma ne nigi dhoudi ariyo. Nochako monjo taonde mag Juda, to taon ma nodwaro ahinya ne en Jerusalem. Gima Senakerib ne kia en ni Jehova ne miyo Jerusalem rit makende.

Hezekia ruodh Juda nooro ne Senakerib pesa mang’eny mondo owere gi Jerusalem. Kata obedo ni Senakerib nokawo pesago, pod ne ooro jolwenyge ma roteke mondo omonj Jerusalem. Luoro ne omako joma ne odak Jerusalem nikech jolweny mag Asuria ne medo mana sudo machiegni gi Jerusalem. Kae to Hezekia ne onyisogi kama: ‘Kik uluor. En adier ni Jo-Asuria nigi teko, kata kamano, Jehova biro konyowa loyogi.’

Senakerib ne ooro Rabshake mondo odhi ojar Jo-Jerusalem. Ka ne ochopo, ne ochung’ gi oko mar dalano, kae to ne okok kama: ‘Jehova ok nyal konyou. Kik uwe Hezekia owuondu. Onge nyasaye moro amora ma nyalo monowa monjou.’

Hezekia ne openjo Jehova gima nonego gitim. Jehova ne odwoke niya: ‘Gik ma Rabshake wachogo kik bwogi. Senakerib ok bi kawo Jerusalem.’ Bang’e, Hezekia ne oyudo barupe moko mowuok kuom Senakerib. Barupego ne wacho kama: ‘Yieuru ayiea wakaw Jerusalem nikech Jehova ok bi konyou.’ Hezekia ne olemo niya: ‘Jehova, kiyie to reswae, mondo ji duto ong’e ni in kendi e Nyasaye madier.’ Jehova nodwoke kama: ‘Ruodh Asuria ok bi kawo Jerusalem. Abiro miyo Jerusalem rit makende.’

Senakerib to ne ni gadier ni Jerusalem ne chiegni bedo mare. Kata kamano, chieng’ moro gotieno, Jehova ne ooro malaika achiel kama jolweny mag Asuria ne ochokoree but Jerusalem. Malaikano ne onego jolweny 185,000 te! Jolweny mag Senakerib ma ne roteke mogik ne otho. Koro ne nyaka odog adoga thurgi gi lwete nono. Jehova norito Hezekia kaachiel gi Jerusalem mana kaka ne osesingo ni ne odhi timo. Ka dine bed ni idak Jerusalem e kindeno, be dine iketo geno mari kuom Jehova?