Onyum Daniel e Bur Sibuoche

Ruoth machielo ma bende nolocho e wi Babulon ne en Darius ma Ja-Media. Darius nofwenyo ni Daniel ne en ng’at makende. Ne oketo Daniel mondo obed jatelo e wi chwo ma ne imiyo duong’ e pinyruodhe. Chwogo ne neno ne Daniel nyiego, kendo ne gidwaro nege. Ne ging’eyo malong’o ni Daniel ne ohero lemo didek odiechieng’ kodiechieng’, omiyo, ne ginyiso Darius kama: ‘Ruoth, onego ket chik moro ma wacho ni in e ma nyaka ji duto lami. Ng’ato ang’ata ma ok oluwo chikno onego onyum e bur sibuoche.’ Wachno nomoro Darius, mi noketo sei e chik ma kamano.

Ka ne Daniel owinjo ni oseket chik manyienno, ne odhi e ode. To mana kaka ne otimoga, ne oyawo dirisane, mi ogoyo chonge piny, kendo lamo Jehova. Chwo ma jonyiegogo nodonjo e ode apoya ma giyude kolemo. Ne giringo ka gidhi ir Darius, mi ginyise kama: ‘Daniel otamore luwo chikni. En pod olamo Nyasache nyadidek pile ka pile.’ Ruoth Darius ne ohero Daniel ahinya, kendo ne ok odwar ni Daniel otho. Odiechieng’ duto, ne otemo paro kaka ne onyalo reso Daniel. Kata kamano, onge ng’ato ang’ata ma ne nigi ratiro mar loko chik ma ruoth ne oseketoe sei. Kata mana ruoth owuon ne ok nyal timo kamano. Ne ochuno ruoth mondo onyis joge onyum Daniel e bur sibuoche mager.

Otienono, chuny Darius nochande ahinya nikech wach Daniel, ma kata mana nindo nodagi tere. Ka ne piny oru, noringo nyaka e bur ma nonyumie Daniel. Nokok kama: ‘Daniel, be Nyasachi oresi?’

Darius nowinjo dwol moro, kendo mana dwond Daniel! Ne onyiso Darius kama: ‘Malaika mar Jehova ne odino dho sibuoche. Ok gihinya kata matin.’ Darius nobedo mamor ahinya! Ne owacho mondo ogol Daniel e burno mapiyo. Onge kama nogwarore e dend Daniel kata matin. Kae to ruoth ne ogolo chik kowacho kama: ‘Nyumuru joma nodonjo ne Daniel-ka e bur sibuoche.’ Ka ne owitgi e burno, sibuochego ne ochamogi te.

Kae to Darius noketo chik ne joge kama: ‘Ji duto nyaka luor Nyasach Daniel. En e Nyasaye ma ne oreso Daniel e bur sibuoche.’

Be ilamo Jehova pile ka pile kaka Daniel ne timo?