Yesu Noriembo Jolok Ohala e Hekalu

E higa mar 30, nitie chieng’ moro ma Yesu ne odhi Jerusalem. Ji mathoth ne ni Jerusalem e nyasi mar Pasaka, kendo ne gichiwo misengni mag jamni mana kaka ne gijatimo e kinde nyasino. Jomoko ne oa gi jambgi pacho, to moko ne ng’iewo jamni ka gisechopo Jerusalem.

Ka ne Yesu odonjo e hekalu, ne oyudo ka ji uso jamni e iye kanyo. Ne gidich gi timo ohala e i ot ma ilamoe Jehova! Yesu ne okawo okang’ mane? Ne oloso boka mi oriembogo jamni te e hekalu. Ne ong’ielo mesni mag jowil pesa, kendo nopuko pesgi te piny. Yesu nonyiso joma ne uso akuche kama: “Goluru gigi kae! Weuru loko od Wuora od ohala!”

Joma ne nitie e hekalu ne owuoro ahinya gik ma ne Yesu otimogo. Jopuonjrene ne oparo weche ma nokor e wi Mesia ni ne odhi bedo gi kinda mang’eny nikech od Jehova.

Bang’e, e higa mar 33, Yesu nochako oriembo jo ohala e hekalu. Ne ok onyal ling’ aling’a to ji timo gik ma richo e od Wuon-gi.