Onge Gima ne Nyalo Chungo Tijgi

Ne nitie ng’at moro ma rang’ol ma nohero bet e dho ranga hekalu kokuecho. Chieng’ moro godiechieng’, ng’atno ne oneno Petro gi Johana ka donjo e hekalu. Ne okwayogi kama: ‘Miyauru gimoro matin.’ Petro ne onyise niya: ‘An gi gimoro maber ma adwaro miyi moloyo pesa.’ Kae to Petro ne owachone kama: ‘E nying Yesu, chung’ malo kendo iwuothi!’ Kae to Petro ne omako bade mi ochunge malo, kendo ng’atno ne ochako wuotho! Oganda ma ne ni bute kanyo ne mor ahinya gi honono, kendo ji mang’eny ne ochako bedo gi yie.

Kata kamano, wachno ne owang’o i jodolo kod Jo-Sadukai. Ne gimako jopuonjre Yesu, kendo ne giterogi e od yalo buche mi gipenjogi kama: ‘Ng’ama umiyou teko mar chango ng’atni?’ Petro ne odwokogi kama: ‘Wayudo teko koa kuom Yesu Kristo ma ne unegocha.’ Jotend din-go ne okoknegi matek niya: ‘Kik uchak utemie wacho wach Yesu kae!’ To jootego ne odwokogi niya: ‘Nyaka wawuo e wi Yesu kata tek manade. Ok wabi weyo wuoyo kuome.’

Ka ne osegony Petro gi Johana, ne gidhi ma ginyiso jopuonjre mamoko gik moko duto ma ne otimore. Ne gilemo kanyachiel ka gikwayo Jehova kama: ‘Jehova, miwae chir mondo wamed tiyo tijni.’ Jehova ne omiyogi roho maler, kendo ne gimedo lendo gi chir ka gichango ji bende. Ji momedore ne oketo yie kuom Yesu. Nyiego nomako Jo-Sadukai ahinya. Ne gimako joote mi giloronegi e jela. Kata kamano, chieng’no gotieno, Jehova ne ooro malaika moro ir jootego. Malaikano ne oyawo dhoudi mag jela, kendo ne onyiso joote Yesu kama: ‘Doguru e hekalu, kendo upuonj ji kuno.’

Kinyne gokinyi, jotend din ma ne yaloga buche e Sanhedrin ne oyudo ripot ma wacho kama: ‘Joma ne umakoka oyud ka puonjo e hekalu! Jela ma ne osogie to pod olor mana kaka ne olore!’ Ne omak joote kendo, mi okelgi e nyim Sanhedrin. Jadolo maduong’ ne owacho kama: ‘Donge ne wanyisou ni kik uwuo e wi Yesu?’ Petro ne odwoko niya: “Nyasaye e ma nyaka wawinj nikech en e jalochwa, kar winjo dhano.”

Jotend din igi ne owang’, kendo ne gidwaro nego jootego. Kata kamano, Ja-Farisai moro ma nyinge Gamaliel ne ochung’ mowacho niya: ‘Jowetena, tang’uru! An jogi chicha. Nyalo bedo ni Nyasaye ni kodgi. Dipo ka ukedo gi Nyasaye to ukia!’ Ne giyie gi wechenego. Ne girodho jootego gi ludhe, kendo ne gisiemogi ni kik gichak giland wach Yesu, kae to ne gigonyogi. Kata kamano, mano ne ok ochungo tijgi. Jootego ne odhi nyime lando wach maber gi chir e hekalu, kendo e ot ka ot.