Oter Paulo Rumi

Jerusalem e ma Paulo ne otiekoe wuodhe mar adek mar lendo. Ka ne en kuno, ne omake mi osoye e jela. Chieng’ moro gotieno, Yesu ne onyise e fweny niya: ‘Ibiro dhi Rumi, kendo ibiro lendo ne ji kuno.’ Ne ogol Paulo Jerusalem mi otere Kaisaria, kendo ne obet e jela kuno kuom higni ariyo. Ka ne iyale e nyim gavana ma niluongo ni Festo, ne owacho niya: ‘An daher ni Kaisar e ma oyala Rumi.’ Festo nonyise kama: ‘Wabiro timo kaka ikwayono. Wabiro teri ir Kaisar.’ Ne oket Paulo e meli ma dhi Rumi. Luka gi Aristarko bende ne odhi kode.

Ka ne gin e nam, apaka mager ne otugore, kendo apakano nodhi nyime kuom ndalo mang’eny. Ji duto ma ne nie melino ne paro ni ne gidhi tho. To Paulo nonyisogi kama: ‘Uwinjo, malaika moro nende owuoyo koda e lek konyisa niya: “Paulo, kik iluor. Ibiro chopo Rumi, kendo onge gima biro hinyo ji duto ma in-go e meli.” Omiyo, beduru gi chir! Ok wabi tho.’

Apaka nodhi nyime kuom ndalo 14. Gikone, ne gichako neno chula moro. Ne en chula mar Molta. Meli notuomo kuoyo mochokore mi melino obarore matindo tindo. Kata kamano, ji 276 duto ma ne ni e melino ne okwang’ nyaka e dho wath. Moko kuomgi nogoyo abal, to moko noliero e ng’injo mag melino ma gisudo mosmos nyaka e dho wath. Joma ne ni e chulano ne orwakogi maber, kendo miyogi mach ma ioyo.

Bang’ dweche adek, askeche ne otero Paulo Rumi ka gitiyo gi meli machielo. Ka ne gichopo kuno, owete nobiro romone. Ka Paulo noneno owetego, nogoyo ne Jehova erokamano kendo nobedo gi chir. Kata obedo ni Paulo ne en mabus, ne oyiene mondo opang ode. Kata kamano, ne omiye askari ma ne rite e odno. Ne odak kuno kuom higni ariyo. Ji ne lime kanyo, kendo ne opuonjogi e wi Pinyruodh Nyasaye kod Yesu. Bende, Paulo ne ondiko barupe ne kanyakla mopogore opogore ma ne ni e alwora mag Asia kod Judea. Kuom adier, Jehova ne otiyo gi Paulo e lando wach maber ne joma oa e ogendni mopogore opogore.