Lamo en Ang’o?

Lamo nyalo bedo “nyiso luor kod hera ne nyasaye.” E Muma, weche ma nokwong tigo kiwuoyo kuom “lamo” inyalo tigo kiwuoyo kuom ng’at ma chiwo luor matut, kata ma bolore ne chuech moro. (Mat. 28:9) Wechego bende inyalo tigo kiwuoyo kuom lamo Nyasaye kata gimoro machielo. (Joh. 4:23, 24) Weche molworo ndiko ma otiye gi wachno nyalo konyowa ng’eyo tiend gima iwuoye.

Jehova, Jachuech mar piny gi polo e ma owinjore walam. (Fwe. 4:10, 11) Walamo Jehova ka wachiwo luor ne ratiro ma en-go mar locho kendo ka wamiyo nyinge duong’. (Zab. 86:9; Mat. 6:9, 10) Ratiro mar Jehova mar locho kod nyinge gin weche ariyo madongo ma bug Ezekiel wuoye. E bug Ezekiel kende, oti gi “Jehova Wuon Loch Duto” nyadi 210, to weche ma wacho ni “gining’e ni an e Jehova,” kod weche mamoko ma chalo gi mago otigo nyadi 40 gi wiye.​—Eze. 2:4; 6:7.

Lamo Nyasaye ok en aena gima wawinjo e chunywa; kar mano, lamo madier inyiso gi tim. (Jak. 2:26) Sama wachiwo ngimawa ne Jehova, wasingore ni e ngimawa duto, wabiro winje kaka Jalochwa kendo chiwo luor matut ne nyinge. Par ni ka ne Yesu chiwo dwoko e tem mar adek, nowacho ni lamo otudore gi ‘tiyo ne Nyasaye.’ (Mat. 4:10) Nikech wan jotich Jehova, wagombo ahinya tiyone.a (Rap. 10:12) Watiyo ne Nyasaye sama wachiwore timo tije motudore achiel kachiel gi lamo kendo tijego dwaro chiwruok. Tijego gin mage?

Watiyo ne Jehova e yore mopogore opogore kendo Jehova mor gi tije duto ma watimone. Watiyo ne Nyasaye sama walendo ne ji, sama wadhi e chokruoge e Od Romo, kod sama wagero kata rito ute ma wachokoree. Bende, watiyo ne Nyasaye sama watimo lamo mar joot, sama wakonyo Jokristo wetewa moyudo masiche, sama wachiwore timo tije moko e chokruogewa madongo, kata tiyo e Bethel. (Hib. 13:16; Jak. 1:27) ‘Watiyo ne Nyasaye odiechieng’ gotieno’ ka waketo lamo madier mondo obed mokwongo e chunywa kod pachwa. Wamor tiyo ne Jehova Nyasachwa!​—Fwe. 7:15.