SANDUK MAR 19A
Aoche Mag Gueth Moa Kuom Jehova
Ne ane Ndiko moko mopogore opogore ma tiyo gi “aora” kod “pi” sama giwuoyo e wi gueth moa kuom Jehova. Ka wasomo ndikogo duto, ginyisowa gimoro ma jiwowa e wi kaka Jehova guedhowa. E yo mane?
JOEL 3:18 Weche mokorgo nyiso kaka pi biro bubni koa e od Jehova. Aora mol kotero pige e “Hoho mar Shitim” ma en kama otwo ahinya. Omiyo, Joel gi Ezekiel neno aora ma kelo ngima kama otwo. Giduto gineno ka aorano mol kowuok e od Jehova kata hekalu.
ZEKARIA 14:8 Janabi Zekaria neno “pi mar ngima” ka mol koa Jerusalem. Nus mar pigno mol kochomo nam man yo wuok chieng’, kata Nam Chumbi, to nus machielo mol kochomo nam man yo podho chieng’, kata Nam Mediterania. Jerusalem ne en “dala mar Ruoth maduong’,” ma en Jehova Nyasaye. (Mat. 5:35) Omiyo, dala ma ne Zekaria oneno paronwa loch mar Jehova ma biro kwako piny mangima e kinde ma biro. Kuom kinde malach, wasebedo ka walero ni pi miwuoye e weche mokorgo nyiso ni Jehova biro guedho grube ariyo mag ji e Paradiso; joma biro tony e masira maduong’ kod joma ibiro chier bang’e.
FWENY 22:1, 2 Jaote Johana bende neno aora mar ranyisi ma dwaro chalo gi ma Ezekiel noneno. Kata kamano, aorano ok wuog e hekalu, to owuok e kom-loch mar Jehova. Omiyo, mana kaka weche ma ne Zekaria oneno, fwenyni bende wuoyo e wi gueth ma wabiro yudo e kinde Loch Kristo mar Higni Aluf Achiel.
Nitie mana pogruok matin e kind gueth ma loch mar Jehova biro kelo gi gueth ma ne Ezekiel oneno e fweny. Guethgo duto wuok kuom Jehova kendo gichopo ne joge mogeno kuome.
ZABURI 46:4 Ne ane kaka ndikoni wuoyo e wi gik moko ariyo, ma gin lamo kod loch. Owuoyo e wi aora ma kelo mor e “dala Nyasaye,” tiende ni Pinyruoth gi loch, kod “hekalu maler mar Jal Mamalo Chutho,” tiende ni lamo madier.
Ndikogo duto konyowa ng’eyo ni Jehova biro guedho jotichne e yore ariyo. Mokwongo, wabiro yudo gueth ma lochne biro kelo, kae to mar ariyo, wayudo gueth nikech chenro maber moketo mar lamo madier. Omiyo, wadhiuru nyime manyo “pi ngima” kowuok kuom Jehova kod Yesu. Pi ngimano oriwo gik moko duto ma gimiyowa mondo wadag nyaka chieng’!—Jer. 2:13; Joh. 4:10.