SOMO NAMBA 18

Weche Mapuonjo Jowinjo

1 Jo-Korintho 9:19-23

GIMA INYALO TIMO: Kony jowinjo mondo oti gi pachgi kendo gine ni gipuonjore wach moro ma konyogi.

Par gik ma jowinjo ong’eyo e wi wach midwaro puonjo. Kar nwoyo anwoya gima jowinjo ong’eyo, konygi gine wachno e yo moro mopogore.

Kik ikaw kinde mang’eny kilero weche ma jowinjo ong’eyo. Sama iwuoyo e wi puonj moro manyien, inyalo dhi mos.
Tim nonro kendo ipar matut. Ka nyalore, wuo e wi gik ma ji ok ong’eyo ahinya kata gik ma timore mondo ilergo weche madongo. Par matut kaka ranyisi midwaro tiyogo otudore gi weche madongo ma idwaro puonjo.

Sama inono weche midwaro tiyogo, par matut kipenjori penjo kaka: ‘Ang’o momiyo, nikech ang’o, karang’o, kanye, ng’ano, kata nade.’ Tiyo gi penjo kaka mago biro miyo twagi omak pach jowinjo nyaka itiek.
Nyis kaka weche midwaro puonjo konyo. Ler ne jowinjo kaka puonj mag Muma nyalo konyogi e ngimagi. Sama iwuoyo kuom gik ma timore, paro ma ji nigo, kod okenge ma ji kawo kata monego gikaw, ti gi weche ma jowinjo ong’eyo maber.