CHAKO MBAKA
SULA MAR 6
Bed gi Chir
Puonj: “Ne wachoko chir kokalo kuom Nyasachwa mondo wayalnu wach maber.”—1 The. 2:2.
Gima Yesu Notimo
1. Ne VIDIO, kata isom Luka 19:1-7. Bang’ mano, non penjo ma luwogi:
Ang’o momiyo jomoko ne nyalo luoro Zakayo?
To ang’o ma nojiwo Yesu mondo olandne wach maber?
Ang’o ma Wapuonjore Kuom Yesu?
2. Dwarore ni wabed gi chir eka waland wach Pinyruoth ma ok wabuono ji.
Luw Ranyisi mar Yesu
3. Gen kuom Jehova. Roho maler mar Nyasaye nomiyo Yesu teko mar lendo, to in bende rohono nyalo miyi teko. (Mat. 10:19, 20; Luka 4:18) Kwa Jehova mondo omiyi chir mar lendo ne joma iluoro lendonegi.—Tich 4:29.
4. Kik ing’ad ne ji bura ka pok iwuoyo kodgi. Wanyalo bedo maluor wuoyo gi jomoko kaluwore gi kaka gichal, tije ma gitiyo, kaka gidak, kata dinde ma gintie. Kata kamano, par wechegi:
Jehova gi Yesu e ma nyalo somo chuny ji; wan ok wanyal.
Ng’ato ang’ata nyalo yudo ng’wono mar Jehova.
5. Bed gi chir, kata kamano, ti gi rieko kendo ibed motang’. (Mat. 10:16) Kik iywari gi ji. Inyalo ng’ado mbaka kifwenyo ni ng’atno ok dwar winjo wach kata ka ngimani ni kama rach.—Nge. 17:14.