Kecho Ji e Piny ma Ji Ok Dew Jowetegi

MALARIA mager ogoyo dichwo moro e piny Burundi. Dwarore otere e osiptal mapiyo ahinya. To obiro chopo nade? Onge mtoka manyalo tere. Osiepene moko ariyo obiro mondo okonye. Gikete e ndiga kendo taye kuom seche abich, ka gitwenyo gode koda thuche. Gichopo kama iidhoe bas matere e osiptal manie machiegni. Bang’ ndalo matin, owinjo ka koro oberie.

E tung’ piny komachielo, bang’ yamo mager miluongo ni Katrina ketho gwenge moko mag Wi nam e piny Amerka dwe mar Agost 2005, lang jochiw kony moko abich noyudo ot moro ma yien odiyo. Kata obedo ni ne ok ging’ere chuth gi weg odno, ne gitiyo gi masinde mag ng’ado yien kuom odiechieng’ mangima ka gigolo yien-go kaachiel gi yugi duto. Miyo ma wuon odno nowacho kama: ‘Aduoko erokamano ahinya kuom kony ma jogi omiya.’

Gasede, redio kata televison chiwo mana ripode mag timbe malich mag gero. Gik marichogi miyo timbe kecho ji koda ng’wono ma jomoko nyiso pile, ok nenre ahinya. Kata kamano, adiera en ni ji duto kamoro amora nigi gombo ahinya ni mondo onyisgi hera, kech koda ng’wono. Chunywa gombo ahinya mondo okechwa! Gombo ma kamago nyalo nenore ahinya e kinde mag Krismas, ma thoth ji jowuoyo kata kwayo ni ‘kuwe koda ber obed ne dhano.’​—Luka 2:​14, King James Version.

Kecho ji nyalo bedo gima ok yot e piny ma nenore ni dhano ng’ich ng’ich kendo ok dew jowetegi. Paro ma ji mang’eny nigo en ni timo gik moko gi thuon ma ok gidew jomoko biro miyo weche odhinegi maber kendo gilochi. Nenre ni ji mang’eny yie gi paro mawacho ni,​—bedo ng’ama ger ber moloyo bedo ng’ama kecho jomoko. Wuoro koda guondo miyo dhano ok kech jowetegi.

Nikech mano, ji mang’eny oherore kendgi giwegi, ma ok gidew paro kata chal mar jomoko. Pile, jotuke ma locho kendo ma ok kech jomoko ikawo ni e “thuondi madier.” Joloch moko mag siasa bende ni kamano.

Kuom mano, ber wapenjre niya: Ang’o momiyo onego wabed joma kecho jomoko? Be kecho jomoko nyalo kelo ber? To ang’o manyalo konyowa kecho jomoko? Sula maluwo biro chiwo dwoko mag penjogi.

[Sanduk manie ite mar 3]

•Be kecho ji nyiso ni ng’ato nyap?

•Be kecho jomoko kelo ber?

•Gin yore mage mwanyalo kecho godo jomoko?