Gik Mwapuonjore Kuom Yesu

Kaka Onego Watim ne Jomoko

Ang’o momiyo onego ibed mang’won?

Be ing’won, kata mana sama ji ok nyisi ng’wono? Ka wadwaro luwo ranyisi mar Yesu, nyaka wabed mang’won kata mana gi jogo ma sin kodwa. Yesu nowacho kama: “Kuhero jo ma oherou, ng’a ma nogonu erokamano? Nikech kata joricho ohero jo ma oherogi. . . . To heruru wasiku . . . , kendo nubed yawuot Ng’a Mamalo Chutho; nikech en ong’won ni jo ma ok dewe kendo ni jo maricho.”​—Luka 6:32-36; 10:25-37.

Ang’o momiyo onego iwene ji richogi?

Sama waketho, wadwaro ni mondo Nyasaye owenwa. Yesu nopuonjo ni owinjore wakwa mondo Nyasaye owenwa richowa. (Mathayo 6:12) Kata kamano, Yesu bende nowacho ni, Nyasaye biro weyonwa richowa mana ka wan bende waikore mar weyo ne jomoko. Nowacho niya: “Nikech kuweyo ni ji richogi, un bende Wuonu me polo nowenu. To ka ok uweyo ni ji richogi, Wuonu bende ok nowenu richou.”—Mathayo 6:14, 15.

Ere kaka joot nyalo bedo mamor?

Kata obedo ni Yesu ne ok okendo ngang’, wanyalo puonjore gik mang’eny kuome, kodok korka miyo ngima mar joot obed mamor. Kokalo kuom wechene koda timbene, ne oketonwa ranyisi maber monego waluw. Non ane puonj adek maluwogi:

1. Dichwo nyaka her chiege kaka ohero ringre owuon. Yesu noketo ranyisi maber ne chwo. Ne owacho ne jopuonjrene niya: “Chik manyien amiyou, mondo uherru ng’ato gi ng’ato.” Nyaka e okang’ mane? Nowacho ni, “Mana kaka yandi aherou.” (Johana 13:34) Kotiyo gi puonjni kuom chwo, Muma wacho kama: “Chwo, heruru mondu, kaka Kristo bende nohero [kanyakla], mi nochiwore nikech en . . . E kaka chwo bende onego giher mondgi kaka ringregi giwegi. Ng’a mohero chiege, oherore owuon. Onge ng’ato ma sin gi ringre owuon ngang’; to opidhe kendo orite kaka Kristo bende rito [kanyakla].”​—Jo Efeso 5:25, 28, 29.

2. Joma okendore ok onego onindre gi ng’at maok gikendorego. Nindruok oko mar kend en timo richo ni Nyasaye, kendo tim makamano ketho udi. Yesu nowacho niya: “Pok usomo . . . ‘Nikech wachno ng’ato nowe wuon mare gi min mare, kendo nopadre gi chiege, mi ji ariyogo nobed ringruok achiel.’ E momiyo ok pod gin ji ariyo, to gin ringruok achiel. Omiyo gi ma Nyasaye oseriwo, kik dhano opogi. . . . Awachonu ni, ng’ato ma oriembo chiege, mak mana kuom terruok, mi okendo machielo, oterore.”—Mathayo 19:4-9.

3. Nyithindo nyaka winj jonyuolgi. Kata obedo ni Yesu ne en dhano ma onge richo, kane pod en nyathi, ne owinjo jonyuolne kata obedo ni ne gin dhano ma joricho. Muma wacho kama kuom Yesu kane en jahigini 12: “Eka nolor kod [jonyuolne ka] gidok Nazareth, kendo ne owinjogi.”—Luka 2:51; Jo Efeso 6:1-3.

Ang’o momiyo onego wati kod puonjgi?

Kowuoyo kuom weche ma nosepuonjo jopuonjrene, Yesu nowacho kama: “Kung’eyo magi, un jo moguedhi kutimogi.” (Johana 13:17) Mondo wabed Jokristo madier, nyaka wati gi puonj ma Yesu nochiwo kuom kaka onego watim ne jomoko. Nowacho ni: “Ma eri e ma nomi ji duto ong’e ni un jopuonjrena, ka un uheroru ng’ato gi ng’ato.”​—Johana 13:35.

Mondo iyud weche mamoko, ne sula 14 e bug Ang’o ma Muma Puonjo Kuom Adier?a

[Weche moler piny]

[Picha manie ite 18]

Ngero ma Yesu nogoyo e wi wuowi ma noketho pokne, puonjowa gimomiyo dwarore ahinya wanyis ng’wono kendo wawe ne ji richogi.​—Luka 15:11-32

[Picha manie ite 19]

Joma okendore onego obed jo adier ng’ato gi nyawadgi e kendgi