1. Kwa Kony Koa Kuom Wuon Muma

Kaka Inyalo Winjo Tiend Weche Manie Muma

Ninfa, modak e piny Italy wacho kama: “Nitie kinde ma ne ahinyo somo Muma kapok adhi nindo. Ne atimo kamano nikech nang’eyo ni Muma en Wach Nyasaye, omiyo kata obedo ni timo kamano ne ok mora, pod ne adwaro ng’eyo weche ma Nyasaye nomiyo ondiki ei Muma. Kuom adier, ne adwaro some oduto. Sama ne achako, nayudo ka timo kamano yot, kata kamano ne achopo kuonde mago ma ne ayudo ka tekna winjo, mi naweyo some.”

BE GIMA ne otimore ne Ninfa osetimoreni in bende? Ji mang’eny nyalo wacho kamano. Kata kamano, mana kaka ne waneno e sula motelo, Wuon Muma, ma en Jehova Nyasaye, dwaro ni mondo iwinj tiend Wachne. Kata kamano, ere kaka inyalo winjo tiend weche manie Muma? Okang’ mokwongo en kwayo Wuon-go mondo okonyi.

Ji ne kawo joote Yesu kaka ‘jopoya kendo jokiya,’ nimar ne ok gisomo e skunde mag somo weche din. (Tich Joote 4:​13) Kata kamano, Yesu nokonyogi bedo gadier ni winjo tiend Wach Nyasaye ne en gima nyalorenegi. Ne ginyalo winjo tiende e yo mane? Yesu nolero kama: ‘Jakony, ma en roho maler, ma Wuoro noor e nyinga, enopuonju weche duto, kendo noparnu duto.’ (Johana 14:26) Nyasaye notiyo gi roho malerni e chweyo piny koda ngima duto manie iye. (Chakruok 1:2) Notiyo kod rohoni bende e miyo jondiko 40, ondik wechene ei Muma. (2 Petro 1:​20, 21) Roho nogo pod konyo jogo madwaro winjo tiend weche manie Muma.

Ere kaka inyalo yudo roho maler mar Nyasaye? Nyaka ikwa rohono ka in gi yie. Kuom adier, nyalo dwarore ni mondo isik ka ikwayo Nyasaye nyadinwoya mondo omiyi rohono. Yesu nowacho kama: ‘Kwauru eka nomiu. Ka un ung’eyo miyo nyithindu mich mabeyo, Wuoru me polo ok nochiw mokadho roho maler ne joma kwaye koso?’ (Luka 11:​9, 13) Jehova oikore mar miyo roho maler, jogo makwaye gi chuny maler. Rohono nyalo konyi winjo tiend weche moa kuom much Nyasaye ma ne ondiki ei Muma higini gana mang’eny mosekalo. Roho mar Nyasaye bende nyalo miyi rieko madwarore e tiyo gi puonj makonyo ahinya manie Muma e ngimani.​—Jo Hibrania 4:​12; Jakobo 1:​5, 6.

Kinde moro amora mibet mondo isom Muma, wuo gi Nyasaye e lamo, kikwaye roho maler mondo okonyi winjo tiend Wachne.