Miriambo Mokwongo: Ni Chuny Ok Tho

Miriamboni ne ochakore nade? “Jorieko machon mabende ne gin Jokristo norwako puonj mar Jo-Grik ni chuny ok nyal tho kendo ne giparo ni Nyasaye ne chweyo chuny kae to okete e dend dhano sa mako ich.”—The New Encyclopædia Britannica (1988), Volume 11, ite mar 25.

Muma to wacho ang’o? “Chuny matimo richo, enotho.”—Ezekiel 18:4, King James Version.

Muma nyiso ni dhano mokwongo ne en chuny, kowacho kama: ‘Jehova Nyasaye nochweyo dhano gi buru mar lowo, mokudho much ngima e ume; ma dhano nodoko chuny [e dho Hibrania, neʹphesh] mangima.’—Chakruok 2:7.

E dho Hibrania, neʹphesh ma olok ni “chuny,” tiende en ‘chwech mayweyo.’ Kane Nyasaye ochweyo dhano mokwongo, ne ok oketo kuom Adam gimoro ni chuny ma ok tho, to nokudho kuome much ngima mirito gi yweyo. Kuom mano, kaluwore gi Muma, “chuny” en ng’at mangima kaka en oduto. Ka ogol much ngima ma ne Nyasaye okwongo kudho, chuny tho, tiendeni ng’ato owuon tho.—Chakruok 3:19; Ezekiel 18:20.

Puonj mar ni chuny ok tho nonyuolo penjo moko: Bang’ tho, chuny dhi kune? Ang’o ma timore ne chuny joma richo? Ka jogo maluongore ni Jokristo norwako puonj mar ni chuny ok tho, mano ne omiyo girwako miriambo machielo ni nitie kar mach misandoe ji.

Pim gi ndikogi mag Muma: Eklesiastes 3:19; Mathayo 10:28; Tich Joote 3:23

ADIERA EN:

Ka ng’ato otho, otho