“Ndalo Ming’adoe Bura” Chiegni
MANA kaka janabi Habakkuk, jopuonjre Yesu bende ne gombo neno giko mar chandruoge. Bang’ ng’eyo kaka Pinyruodh Nyasaye biro tieko chandruoge manie piny, ne gipenjo Yesu kama: “Magi biro timore karang’o, to ang’o ma nobed ranyis mar bedoe mari [e loch mar Pinyruoth] kendo mar kinde giko mar ndalo?” (Mathayo 24:3, NW) Kochiwo dwoko, Yesu nowacho ni Jehova Nyasaye kende ema nong’eyo kinde sie ma Pinyruoth ne dhi kawo loch chuth e wi piny. (Mathayo 24:36; Mariko 13:32) Kata kamano, Yesu koda jo moko nokoro weche ma ne dhi timore e piny manyiso ni giko chiegni.—Ne sanduk man korachwich.
Donge iyie ni gigo onya ahinya ndalogi? Yesu bende nokoro ni tij puonjo ji ne idhi tim e piny mangima. Nowacho niya: “Kendo Wach Maberni mar pinyruoth nolandre e pinje duto, mondo obed ranyis ni ogendini duto; eka giko nobi.”—Mathayo 24:14.
Mano e gima timore e kindewagi. Joneno mag Jehova tiyo tijno. Ka gin e pinje chiegni 236, Joneno mokalo milion abiriyo, nyiso ji gik ma Pinyruoth biro timo, kendo gikonyo ji mondo oluw chike makare mag Nyasaye, ma dwaro mare en tieko chandruok koda rem. Wajiwi idhi nyime puonjri wach Pinyruodh Nyasaye, mondo ibed gi geno mar dak e piny kama chandruok biro bedo maonge—nyaka chieng’.
[Sanduk manie ite mar 15]
Ndiko Manyiso ni Wadak e Ndalo Giko
• Lwenje ma ok rum
• Yiengni mag piny
• Kech
• Tuoche
• Ketho chik nomedre
• Hera nodog chien
• Ketho piny
• Joma ohero pesa ahinya
• Joma ok winj jonyuol
• Joma oherore giwegi mokalo tong’
• Joma ok ohero owetegi
• Joma ok ohero kelo winjruok
• Joma onge gi kido mar ritruok
• Medruok mar timbe maricho
• Hero mor mar piny moloyo hero Nyasaye
• Ji mang’eny ma wuondore ni gin Jokristo
• Jonabi mang’eny mag miriambo
• Sando Jokristo madier
• Joma ok dwar winjo siem mawuok e Muma
[Picha manie ite mar 15]
E piny mangima Joneno mag Jehova puonjo ji wach Pinyruodh Nyasaye