Josombwa Penjo

Be En Adier ni Jo Mariek Adek Nolimo Yesu ka Eka Onyuole?

Kinde Krismas, e piny mangima, ihinyo nyiso Yesu ka en nyathi mayom ma eka oa nyuol, to ruodhi adek nie bathe koting’o mich ma nengogi tek ma gikelone Yesu. Be en adier? Be wachni owinjore kod adiera mayudore e Muma. Weuru wane ane.

Buge ariyo mag Injili, Mathayo koda Luka, ondiko kaka nyuol Yesu ne chal. Wechegigo nyiso ni mana jokwath kende ma ne rito rombe machiegni, ema nolimo Yesu ka eka oa nyuole. Jogo miwacho ni ne gin jo mariek kata ruodhi, kuom adier ne gin jonon sulwe, to ok ruodhi, kendo Muma ok nyis ni ne gin ji adi. Jonon sulwego ok ne odhi limo Yesu ka en nyathi mayom e kund dhok, to ne gilime bang’e ka Yesu koro ne dit kendo odak e ot. Limbe margino bende noketo ngima Yesu kama rach.

Non ane matut sigand nyuol Yesu kaluwore gi Luka jandik Muma, kendo ibiro yudo ni owacho kama: “Ne nitie jokwath moko ma ne nindo oko, ka gigoyo arita e kuedhgi gotieno. Malaika mar Ruoth nochung’ butgi, kendo, . . . nowachonigi ni, . . . ‘ununwang’ nyathi makwar koum gi lep nyathi, konindo e kund dhok.’ . . . Ne gidhiyo ka gireto, ne ginwang’o Mariam kod Josef, kod nyathi makwar konindo e kund dhok.”—Luka 2:8-16.

Mana Josef, Mariam, kod jokwath ema ne nitie gi Yesu ka eka oa nyuole. Onge ng’at machielo ma Luka nondiko ni ne nitie.

Koro we wanon weche manie Mathayo 2:1-11 “Ka ne Yesu onywol e Bethlehem mar Judea e ndalo mag ruoth Herode, jo mariek moa e yor wuok chieng’ nobiro Jerusalem . . . Kendo ka ne gidonjo e ot, ne gineno nyathino kod Mariam min mare.”

Ne ni Muma wacho mana ni ne nitie “jo mariek,” to ok “ji adek mariek,” kendo onyiso ni ne giwuok yo wuok chieng’, ma gikwongo gibiro Jerusalem, to ok Bethlehem dala ma ne onyuolie Yesu. Gikone ka koro ne gichopo Bethlehem, Yesu ne en nyathi madit modak e ot, to ok nyathi mayom manie kund dhok.

Bende, sama Muma mar Luo Bible, 1968 tiyo gi wach ni “jo mariek” kolero chal mar welogo, loko moko mag Muma to tiyo gi weche kaka “Magi” kata “jonon sulwe.” Buk miluongo ni A Handbook on the Gospel of Matthew wacho ni “jo mariek” en ‘wach moloki kowuok e dho-Grik ma en Magi, ma en wach ma ne itiyogo kiwuoyo kuom jodolo mag Persia ma ne olony ahinya e nono sulwe.’ Kendo buk miluongo ni The Expanded Vine’s Expository Dictionary of New Testament Words lero ni wachno tiende sie en jal matiyo gi teko mopogore opogore mag ‘juok.’

Kata obedo ni tim nono sulwe koda tiyo gi teko juok pod onya ahinya ndalogi, Muma siemowa ni kik wadonj e timbego. (Isaiah 47:13-15) Gin moko kuom timbe juok ma Jehova Nyasaye osin godo. (Rapar mar Chik 18:10-12) Mano emomiyo onge malaika mar Nyasaye ma nolando wach nyuol Yesu ne jonon sulwego. Kata kamano, kokalo kuom lek, Nyasaye nosiemogi ni kik gidog ir Ruoth Herode nimar ne odwaro nego Yesu. Omiyo “ne gidok thurgi e yo machielo.”—Mathayo 2:11-16.

Be Jokristo madier nyalo dwaro jiwo weche maok nyis adier kuom nyuol Yesu? Dwoko en ni, ooyo.