Jehova Winjo Ywak mar Joma Chunygi Chandore
MANA kaka Ruoth Suleman mar Israel machon nowacho, gik moko ‘duto nigi ndalogi kendo weche yudowa waduto.’ (Ekl. 9:11) Masira kata chandruok ma kore tek nyalo chocho ngimawa e yo marach ahinya. Kuom ranyisi, ka achiel kuom joodwa otho apoya, mano nyalo nyoso chunywa ahinya. Kuom jumbe kata dweche maluwo mano, lit kod kuyo nyalo hewowa. Ng’ato nyalo bedo gi parruok ahinya mi chop kama oneno ni ok olong’o kendo ok onyal wuoyo gi Jehova e lamo.
Dwarore ni ojiw, odew, kendo oher ng’at manie chal ma kamano. E yo machiwo geno, Daudi jandik-zaburi nowero kama: “Jehova tego ji duto ma podho, kendo ochungo jogo duto monyosore.” (Zab. 145:14) Muma wachonwa ni “wang’ Jehova ong’iyo piny duto koni gi koni, ni mondo tekone onyisre ni jogo ma chunygi lony kare e nyime.” (2 Weche 16:9) Jehova ‘nikod ng’at man gi chuny mamuol, mondo oduog chuny jo mamuol, omi chunygi oduogi.’ (Isa. 57:15) Ere kaka Jehova konyo jogo ma chunygi muol, tiende ni joma chunygi chandore?
“Wach Mohul e Ndalo Mowinjore”
Achiel kuom yore ma Jehova chiwogo kony e kinde mowinjore en kokalo kuom riwruok mar owete ma Jokristo. Ijiwo Jokristo ni, “duoguru chuny jo ma luor.” (1 Thes. 5:14) Weche mang’won mag hera manyiso ni jowetewa ma Jokristo dewowa, nyalo tego ng’ato ahinya e kinde ma en e chandruok kata kuyo moro. Weche machiwo hoch miwacho kata mana e mbaka moro machuok nyalo konyo ahinya e duogo ng’ama chunye onyosore. Weche makonyo kamano nyalo a kuom ng’at machon osenyagore gi chandruok kata kuyo ma kamano. Kata ginyalo bedo weche moting’o rieko moa kuom osiepwa moro ma nigi lony ahinya e ngima. Kokalo kuom yorego, Jehova nyalo duogo ng’ama chunye chandore.
Non ane ranyisi mar Alex, ma ne en jaduong’-kanyakla ma eka ne oa donjo e kend, to apoya nono chiege ne otho nikech tuwo moro maok thiedhre. Owadwa moro ma en jarit-alwora kendo ma nigi kido mar kecho ji, nokawo okang’ mar wuoyo gi Alex mondo ohoye. En bende noyudo oselalo chiege e otho kata obedo ni koro nosekendo dhako machielo. Jarit-alworano nolero kaka paro ma ne nie chunye ne onyose ahinya. Ne ojawinjo maber ka en gi jomoko e tij lendo koda e chokruoge mag kanyakla. Kata kamano, ka nodok ot mi koro en kende, ne ojawinjo ka okuyo ahinya. Alex wacho kama: “Mano kaka chunya nogonyore bang’ ng’eyo ni lit ma ne an-go en gima yudo ji duto, kendo ni nitie jomoko mosebedo kodgi.” Kuom adier, “wach mohul e ndalo mowinjore” nyalo hoyo ahinya ng’at manie chandruok.—Nge. 15:23.
Jaduong’ moro machielo mar kanyakla mong’eyo jomamoko moselalo joutegi e tho, bende ne oneno ni mondo ojiw chuny Alex. E yor kech, nonyise ni Jehova ong’eyo kaka owinjo ei chunye koda gigo mochando. Owadwano nowachone kama: “Kapo ni e dweche kata e higini mabiro ibiro neno ni dwarore ibed gi jaot, mich manyiso hera moa kuom Jehova biro bedo chako kend manyien.” En adier ni, ok ji duto moselalo jogi e tho to gombo donjo e kend manyien, nie chal mamiyogi thuolo mar timo kamano. Kata kamano, koparo weche owadwano, Alex wacho kama: “Konya ng’eyo ni bedo gi jaot en mich moa kuom Jehova, gonya kuom paro maok kare ni dipo ka ok abedo jadier gi jaoda kata gi chenro mar Jehova kapo ni achako akendo e ndalo mabiro.”—1 Kor. 7:8, 9, 39.
Daudi jandik-zaburi ma noromo gi chandruok kod pek mang’eny e ngimane owuon, nowacho ayanga niya: “Wang’ Jehova omanyore gi jo matir, kendo ite oyawore ni ywakgi.” (Zab. 34:15) Kuom adier, Jehova nyalo konyo joma chunygi chandore, kendo onyalo timo kamano e kinde mowinjore kokalo kuom weche moting’o rieko kod weche mang’won kendo kotiyo nyaka gi Jokristo wetewa. Yore ma kamago beyo kendo gikonyo gadier.
Kony Kokalo Kuom Chokruoge Jokristo
Yot mondo ng’at ma chunye onyosore obed gi paro maok kare manyalo miyo opogore gi jomoko. Kata kamano, Ngeche 18:1 chiwo siem kama: “Ng’a mopogore owuon kod owetene odwaro luwo yore owuon; otimo mirima kod weche duto mabeyo mag rieko.” Alex ne oyie ni: “Sama ilalo jaodi e tho, pachi pong’ gi paro mang’eny maok kare.” Oparo kaka nojapenjore kama: “‘Be nitie gima dipo ni ne anyalo timo e yo mopogore? Be nitie kaka ne anyalo nyiso ni ahere e okang’ momedore?’ Ne ok adwar bedo kenda. Ne ok adwar bedo maonge jaot. Tek ahinya bedo gi paro maok kamano nimar pile ka pile nitie gik ma paroni ni in kendi.”
Kinde ma ng’ato chunye onyosore ema dwarore moloyo ni obed gi osiepe manyalo jiwe. Osiepe ma kamago yudore mayot e chokruoge mag kanyakla. Ka wan kuonde kaka mago, pachwa bedo thuolo rwako paro mabeyo magerowa moa kuom Nyasaye.
Chokruoge Jokristo konyowa bedo gi paro makare kuom chalwa. Sama wawinjo kendo paro matut kuom weche manie Muma, mano konyowa keto pachwa duto kuom weche ariyo madongo moloyo—tiende ni ratiro ma Jehova nigo mar locho koda wach pwodho nyinge obed maler, to ok mana kuom chandruokwa wawegi. E wi mano, e kinde ma kamago mag yudo puonj e wi Jehova, wayudo jip kuom ng’eyo ni kata kapo ni jomoko ok ong’eyo lit ma wan-go, kata ok giwinj tiend chandruokwa, Jehova to ong’eyo gadier. Ong’eyo ni “parruok mei chuny onyoso dhano.” (Nge. 15:13) Nyasaye madier dwaro konyowa, kendo mano miyo wabedo gi teko kod chuny mar nano.—Zab. 27:14.
Sama wasike ne okete e bwo chal matek ahinya, Ruoth Daudi noywak ne Nyasaye niya: “Chunya ool: chunya otamore hore.” (Zab. 143:4) Kinde mang’eny, masiche mayo ng’ato teko e ringre, rieko mar paro, to kata mana miyo chunye kik hore. Chandruok nyalo bironwa e yor tuoche kata midekre moro masiko e del. Wanyalo bedo gadier ni Jehova biro konyowa nano. (Zab. 41:1-3) Kata obedo ni ok ochang ng’ato ang’ata e yor hono ndalogi, Nyasaye chiwo rieko kod hoch madwarore ne ng’ama chandore mondo omi onyagre gi chal ma entiereno. Ng’e ni sama tembe ne hewo Daudi, ne odhi ir Jehova mondo okonye. Nowero kama: “Aparo ndalo machon; abudho gi paro kuom timni duto: chunya ng’eny gi weche maparo kuom tich lweti.”—Zab. 143:5.
Bedo ni wechego ma ne oa e much Nyasaye ne ondiki ei Wachne, nyiso ni Jehova ong’eyo maber kaka wawinjo e chunywa. Weche ma kamago nyisowa gadier ni owinjo kwayowa. Ka warwako kony ma Jehova chiwo, en owuon ‘nopidhwa.’—Zab. 55:22.
‘Lamuru Maok Uwe’
Jakobo 4:8 wacho niya: “Suduru ir Nyasaye, to nosud iru.” Yo achiel mwanyalo sudogo ir Nyasaye en kokalo kuom lamo. Jaote Paulo jiwowa ni, “lamuru ma ok uwe.” (1 Thes. 5:17) Kata kapo ni teknwa wacho kaka wawinjo ei chunywa, roho “owuon kwayonwa kochur ahinya ma tamore wacho.” (Rumi 8:26, 27) Kuom adier, Jehova ong’eyo kaka wawinjo.
Monika, ma nigi winjruok machiegni kamano gi Jehova, wacho kama: “Kokalo kuom lamo, somo Muma, timo puonjruok ma mara awuon, osechopo kama aneno ni Jehova e Osiepna machiegni moloyo. Osebedona ng’at masie e okang’ ma miyo aneno lwete e ngimana kinde duto. En gima hoyo chuny ng’eyo ni kata mana e kinde maok anyal wacho kaka awinjo, en to ong’eya maber. Ang’eyo ni ng’wonone koda gwethge gin mochwere.”
Omiyo, watimuru duto mwanyalo mondo warwak weche mag hera kod hoch ma a kuom Jokristo wetewa, wati gi puonj, siem, koda weche matego yie ma iparonwa e chokruoge Jokristo, kendo wawach ne Jehova e lamo weche duto manie chunywa. Magi duto gin yore ma Jehova nyisowago ni odewowa. Alex nyiso gima oseneno owuon e ngimane sama owacho kama: “Ka watimo korka korwa kuom tiyo gi yore duto ma Jehova Nyasaye chiwonwago kony mondo wasiki kwategno e winjruokwa kode, wabiro bedo gi ‘tekono maduong’ ahinya’ mar nano e bwo tem moro amora.”—2 Kor. 4:7.
[Sanduk/Picha manie ite mar 18]
Hoch Mimiyo Ng’ama Chunye Chandore
Bug Zaburi opong’ gi weche manyiso parruok manie chuny dhano koda singo mang’eny manyiso ni Jehova winjo ywak mar ng’ama chunye chandore. Non ane weche maluwogi:
“E thagrwokna naluongo nying Jehova, mi naywak ni Nyasacha: nowinjo dwonda nyaka a e hekalune, ywakna e nyime nochopo e ite.”—Zab. 18:6.
“Jehova ochiegini gi jo ma chunygi onyosore chuth, kendo oreso jogo ma chunygi lokore kuom richogi.”—Zab. 34:18.
“[Jehova] ochango jo ma chunygi otur, kendo oboyo ringregi kohiny.”—Zab. 147:3.
[Picha manie ite mar 17]
Mano kaka “wach mohul e ndalo mowinjore” nyalo chiwo hoch ahinya e kinde mar chandruok!