Ang’o ma Nyithindo Onego Opuonjre e Wi Nyasaye?

“Ndiko duto mowuok kuom much Nyasaye, konyo kuom puonjo ji, kuom kwero gik maricho, kuom rieyo ji, kendo kuom tiego ji mondo gibed jo makare.”—2 TIMOTHEO 3:16.

DWARORE ni opuonj nyithindo adiera e wi Nyasaye. Ginyalo puonjore adierano kanye? Ginyalo puonjore adierano kowuok e Muma, ma en buk momi luor ahinya e piny mangima.

Muma chalo gi barua mowuok kuom Nyasaye. Ei baruano, Nyasaye fwenyonwa kite kendo ochiwo puonj manyalo konyo nyithinde duto, gibed jomatindo kata madongo. Ne ane moko kuom puonj mayudore e Muma kaachiel gi weche ma kata nyithindo matindo nyalo puonjore kuomgi.

Ang’o ma Nyasaye dwaro ni wang’e kuome?

◼ Gima Muma puonjo: “In, ma nyingi Jehova, In kendi e ng’a Ma Malo Chutho e piny ngima.”—Zaburi 83:18.

Puonj mwayudo: Nyasaye ok en mana teko moro, to en ng’ato ma nigi nyinge owuon miyangego.

◼ Gima Muma puonjo: “Jehova ong’iyo chuny ji duto, kendo ong’eyo paro duto maiye mar chuny: kidware, iniyude.”—1 Weche mag Ndalo 28:9.

Puonj mwayudo: Jehova Nyasaye dewowa waduto, moriwo nyithindo matindo. (Zaburi 10:14; 146:9) Odwaro ni wapuonjre kuome.

◼ Gima Muma puonjo: ‘Kik uchand . . . nyathi kich. Ka umiye chandruok e yo moro, mi oywakna, adieri anawinj ywakne.’—Wuok 22:22-24.

Puonj mwayudo: Jehova winjo lamo kata mag nyithindo matindo. Wanyalo wuoyo gi Nyasaye pile kendo nyise kaka wawinjo e chunywa maiye.

◼ Gima Muma puonjo: “Ne gilokore kendo, ne gitemo Nyasaye, Ne ginyoro Jaler mar Israel.”—Zaburi 78:41.

Puonj mwayudo: Wechewa koda timbewa moro Jehova kata miyo owinj malit, omiyo onego wapar kapok wawacho kata timo gimoro.

Onego watim nang’o ne joma wuok e kit oganda machielo?

◼ Gima Muma puonjo: “Nyasaye ok odewo wang’ ji; to kuom ogendini duto ng’at moluore, kendo ma timo tim makare, e moyiego.”—Tich Joote 10:34, 35.

Puonj mwayudo: Nikech Nyasaye rwako kit oganda duto, ok onego wajar jomamoko nikech kitgi maoko kata chal mar wang’gi opogore kodwa.

◼ Gima Muma puonjo: “Pile beduru kuikoru dwoko wach ni ng’ato ka ng’ato ma penjou, mondo unyise malong’o kuom geno ma un go; to dwokuru gi muolo kod luoro Nyasaye.”—1 Petro 3:15, 16.

Puonj mwayudo: Sama wawuoyo kuom din, onego wachiw pachwa e yo manyiso ni wan gadier kata kamano, kik wabed mager. Bende onego wanyis luor ne joma puonjgi mag din opogore gi magwa.

Onego watim nang’o ne joodwa?

◼ Gima Muma puonjo: ‘Nyithindo, winjuru jonyuolu e weche duto, nikech mano e malong’o kuom Ruoth.’—Jo Kolosai 3:20.

Puonj mwayudo: Nyithindo mawinjo jonyuolgi nyiso ni gihero jonyuolgi kendo gidwaro moro Nyasaye.

◼ Gima Muma puonjo: “Ng’wonreuru, kendo weyoreuru richo ng’ato gi ng’ato, ka ng’ato ni gi wach kod wadgi. Kaka Ruoth noweyonu richou, un bende onego utim kamano.”—Jo Kolosai 3:13.

Puonj mwayudo: Kinde moko, joodwa kata jomamoko biro chwanyowa. Kata kamano, ka wadwaro ni Nyasaye owenwa kethowa, nyaka wapuonjre weyo ne jomamoko kethogi.—Mathayo 6:14, 15.

Ang’o momiyo onego wabed joratiro kendo jomang’won?

◼ Gima Muma puonjo: “Weuru miriambo, kendo ng’ato ka ng’ato owach ni wadgi adiera.”—Jo Efeso 4:25.

Puonj mwayudo: Ka wawacho adier, waluwo ranyisi mar Nyasaye kendo wamore. Ka wanyago kido mar wacho miriambo, wabedo kaka Jachien, ma “en wuon miriambo,” kendo jasik Nyasaye.—Johana 8:44; Tito 1:2.

◼ Gima Muma puonjo: “Gigo duto mudwaro mondo ji otimnu, un bende timnigiuru kamano.”—Mathayo 7:12.

Puonj mwayudo: Onego wabed joma dewo kaka joodwa kata jomamoko e alworawa winjo e chunygi, paro ma gin-go, koda chan-gi. Ka wanyiso ni ‘wakecho’ ji, jomamoko nyalo hero timonwa e yo mang’won.—1 Petro 3:8; Luka 6:38.

Mana kaka ranyisi motelogo nyiso, puonj manie Muma nyalo konyo nyithindo chieng’ obed joma dongo man gi chuny mar duoko erokamano, nyiso luor, kendo dewo chal mar jomoko. Kata kamano, ng’ano mowinjore opuonj nyithindo wechegi?