Puonjri Kuom Wach Nyasaye

Ere Kaka Inyalo Fwenyo Din Madier?

Sulani nigi penjo manyalo bedo ni isepenjori, kendo onyiso kama inyalo somo e Mumbi mondo iyud dwoko mag penjogo. Joneno mag Jehova diher wuoyo kodi e wi dwokogo.

1. Be nitie mana din achiel kende madier?

Yesu nopuonjo jolupne mana din achiel kende, ma en din madier. Ochalo kaka yo madhi e ngima. Yesu nowacho kama kuom yorno: “Ginok ma nwang’e.” (Mathayo 7:14) Nyasaye oyie mana gi lamo ma misene en adiera mayudore e Wachne. Jogo duto malamo Nyasaye madier oriwore e yie achiel.—Som Johana 4:23, 24; 14:6; Jo Efeso 4:4, 5.

2. Ang’o momiyo dinde mang’eny mopogore opogore luongore ni Jokristo?

Jonabi ma miriambo oseduwo puonj mag Jokristo kendo gisetiyo gi nying Kristo e chopo dwachgi giwegi. Mana kaka Yesu nokoro, ginenore kaka ‘rombene’, kata kamano, timbegi to gin mag ondiegi modenyo. (Mathayo 7:13-15, 21, 23) Dinde mag miriambo maluongore ni Jokristo nochako bedoe moloyo bang’ tho mar joote Yesu.—Som Tich Joote 20:29, 30.

3. Moko kuom weche mifwenyogo din madier gin mage?

Joma lamo Nyasaye madier kawo Muma kaka Wach Nyasaye. Gitemo dak kaluwore gi puonjne. Omiyo din madier opogore gi din ma misene en puonj mag dhano. (Mathayo 15:7-9) Joma luwo din madier ok puonj gimachielo to koni gitimo mopogore.—Som Johana 17:17; 2 Timotheo 3:16, 17.

Din madier miyo nying Nyasaye, ma en Jehova luor. Yesu nopuonjo nying Nyasaye. Nokonyo ji ng’eyo Nyasaye kendo nopuonjogi lamo ni nying Nyasaye obed maler. (Mathayo 6:9) Kama idakie, en din mane majiwo ji mondo oti gi nying Nyasaye?—Som Johana 17:26; Jo Rumi 10:13, 14.

4. Inyalo fwenyo nade jogo malamo Nyasaye madier?

Jokristo madier lando Pinyruodh Nyasaye. Nyasaye nooro Yesu mondo oland Pinyruodhno. Pinyruodh Nyasaye kende ema nyalo loyo chandruoge mag dhano. Yesu nodhi nyime wuoyo e wi Pinyruodhno nyaka ochopo chieng’ thone. (Luka 4:43; 8:1; 23:42, 43) Nonyiso jolupne mondo oland Pinyruodh Nyasaye. Kapo ni ng’ato obiro wuoyo kodi e wi Pinyruodh Nyasaye, nyalo bedo ni en e din mane?—Som Mathayo 10:7; 24:14.

Jolup Yesu ok gin mag piny marachni. Ok gidonjre gi weche siasa kata gi ywaruok mag oganda. (Johana 17:16) Bende ok giluw timbe koda paro makelo hinyruok ma ji luwo e piny.—Som Jakobo 1:27; 4:4.

5. En kido mane maduong’ mafwenyo Jokristo madier?

Jokristo madier oherore e yo makende. Wach Nyasaye puonjogi miyo jo mowuok e dhoudi duto luor. Kata obedo ni din ma miriambo osebedo ka riwo lwedo ahinya lwenje e kind oganda, Jokristo madier to tamore timo kamano. (Mika 4:1-4) Kar mano, jogo manie din madier tiyo gi thuolo kod mwandugi mang’eny e konyo kendo jiwo jomamoko.—Som Johana 13:34, 35; 1 Johana 4:20, 21.

En grup mane ma puonjge duto otenore kuom Wach Nyasaye, mamiyo nying Nyasaye luor, kendo malando ni Pinyruodh Nyasaye e geno kende ma dhano nigo? En grup mane manyiso hera kendo ok riw lweny lwedo? Gik ma nenore ayanga nyiso ni Joneno mag Jehova e grubno.—1 Johana 3:10-12.

Mondo iyud weche momedore, ne sula mar 15 e bugni, Ang’o ma Muma Puonjo Kuom Adier? mogo gi Joneno mag Jehova.

[Picha manie ite mar 16]

“Giwacho ni ging’eyo Nyasaye, to gik ma gitimo nyiso ni gidage.”—Tito 1:16