DWOKO PENJO MAG MUMA

Be Nyasaye winjo lemo duto?

Nyasaye winjo kwayo mag ji mowuok e ogendni duto. (Zaburi 145:18, 19) Muma, ma en Wach Nyasaye, jiwowa mondo wawuo kode kendo wanyise gimoro amora machandowa. (Jo Filipi 4:6, 7) Kata kamano, nitie lemo moko ma Nyasaye ok winji. Kuom ranyisi, ok owinj lemo ma ng’ato omako e wiye kendo osiko onwoyo anwoya.—Som Mathayo 6:7.

Jehova bende ok winj lemo mag jogo matamore luwo chikene goyiem. (Ngeche 28:9) Kuom ranyisi, kinde ma ne indikoe Muma, Nyasaye ne otamore winjo kwayo mag Jo-Israel ma ne nigi buch remo. Mano nyiso ni nitie gik ma nyaka watim mondo Nyasaye owinj lemo magwa.—Som Isaiah 1:15.

Ang’o ma nyaka watim mondo Nyasaye owinj lemowa?

Nyasaye ok nyal winjo lemowa ka waonge yie. (Jakobo 1:5, 6) Nyaka wayie ni entie kendo odewowa. Wanyalo miyo yiewa obed motegno kuom puonjruok Muma, nikech yie madier otenore kuom gik mosingi e Wach Nyasaye.—Som Jo Hibrania 11:1, 6.

Onego walem ka wabolore kendo kowuok e chunywa. Kata mana Yesu, Wuod Nyasaye, ne obolore kane olemo. (Luka 22:41, 42) Omiyo, kar mana nyiso Nyasaye gima dwaher mondo otimnwa, onego wan be wasom Muma mondo wang’e gik ma odwaro ni watim. Mano ema biro miyo walem kaluwore gi dwaro mar Nyasaye.—Som 1 Johana 5:14.