PENJO MOA KUOM JOSOMBWA

Be en gima ber mondo jonyuol ma Jokristo obed but nyathigi ma nogol oko mar kanyakla sama gin e chokruoge mag kanyakla?

Gaset mar Ohinga mar Jarito osebedo kajiwo jonyuol ma Jokristo mondo okony nyathindgi ma nogol oko mar kanyakla to pod odak kodgi obed gi winjruok maber gi Nyasaye kapo ni timo kamano owinjore. Mana kaka nonyis e Mnara wa Mlinzi ma Oktoba 1, 2001, e ite mag 16 nyaka 18, jonyuol nyalo puonjore Muma gi nyathigino kapo ni pod hike tin to pod odak gi jonyuolne. Timo kamano nyalo konyo nyathino mondo okaw okang’ mar rieyo yorene.a

Sama jonyuol ma Jokristo obiro e Od Romo, ok rach ka nyathigino obet mos butgi e kanyakla. Nikech ok ochunoga ni ng’at mogol oko mar kanyakla obed chien sama chokruoge dhi nyime, ok en gima rach ka nyathino obet but jonyuolne e chokruok. Nikech jonyuol dewo ahinya winjruok ma nyathigi nigo gi Jehova, gibiro dwaro neno ni ochiko ite maber seche ma chokruoge dhi nyime. Bedo machiegni gi nyathino biro konyogi ahinya moloyo weye mondo obed kar kende.

To nade kapo ni nyathino ok odak gi jonyuolne? Be mano nyiso ni koro ok onyal bet but jonyuolne ka odhi e chokruoge mag kanyakla? E kinde mosekalo, gaset mar Ohinga mar Jarito nosebedo kanyiso maler paro ma Jakristo onego obedgo kodok korka tudruok gi watwa ma ne ogol oko mar kanyakla to ok wadak kode. Kata kamano, weyo ng’at mogol oko mar kanyakla mondo obed mos but wedene e chokruok, opogore ahinya gi kapo ni wedene hombore kode mondo gitudre e yo moro amora maok ochuno. Kapo ni wedene momakore gi Jehova nigi paro makare kodok korka watgi mogol oko mar kanyakla, kendo gitemo luwo siem mayudore e Ndiko makwero ni kik gitudre kode, onge tiende bedo gi kibaji mang’eny.—1 Kor. 5:11, 13; 2 Joh. 11.

Kapo ni ng’at mogol oko mar kanyakla obet but watne kata but jomamoko e kanyakla, mano ok onego chand chuny ji tek mana ni ok ochand ji. Keto chik ni ng’ato onego obed kanye e Od Romo en gima nyalo kelo pek moko kaluwore gi chal mantie. Kapo ni ji duto manie kanyakla moriwo wede momakore gi Jehova, temo luwo puonj mag Muma motudore gi wach golo ng’ato oko mar kanyakla, kendo kapo ni kama ng’at mogol oko mar kanyakla betie ok chwany jomoko, onge tiende bedo gi parruok ahinya kaka ji onego obedi sama gibiro e chokruoge.