DWOKO PENJO MAG MUMA

Ere kaka joma okendore nyalo dak gi mor kod kuwe?

Puonj mawuok e Muma e wi kend konyo nikech gin puonj mowuok kuom Jehova Nyasaye ma e Jal ma ne ochako chenro mar kend. Muma konyowa bedo gi kido mamiyo kend bedo gi mor, kendo nyisowa kido manyalo ketho kend. Muma be puonjo joma okendore wuoyo e yo makelo mor kod kuwe.—Som Jo Kolosai 3:8-10, 12-14.

Dichwo onego onyis chiege luor, kendo dhako onego otim kamano en bende. Ka moro ka moro kuomgi ochopo migawo ma Nyasaye omiye e kend, gibiro bedo mamor.—Som Jo Kolosai 3:18, 19.

Ang’o makonyo kend mondo osiki?

Kend nyalo siko ka joma okendore oherore gadier. Nyasaye puonjowa nyiso hera. Nyasaye kaachiel gi Yesu Wuode, ne oketonwa ranyisi maber chuth e nyiso hera manyalo miyo ng’ato ochiw ngimane ne jomoko.—Som 1 Johana 4:7, 8, 19.

Ka chwo gi mon neno kend kaka chenro mar Nyasaye, gibiro siko kanyachiel. Nyasaye noketo kend obed riwruok mosiko e kind dichwo gi dhako mondo joot obed gi rit madwarore. Kend nyalo siko nikech Nyasaye nochueyo dichwo gi dhako mondo gikonyre ng’ato gi nyawadgi. Bende nochweyogi e kite owuon, omiyo gin bende ginyalo nyiso hera mana kaka en.—Som Chakruok 1:27; 2:18, 24.