Wanyalo Timo Ang’o Mondo Waywa Wedewa e Adiera?

YESU KRISTO nowacho ne jal moro niya: ‘Dhi ir jou, inyisgi gik ma Ruoth osetimoni, kendo kaka nong’wononi.’ Nowacho wechego ne ng’at moro ma ne dwaro bedo jalupne. Noyudo Yesu ni Gadara man milambo mar Nam Galili. Weche ma Yesu nowachogo nyiso ni nong’eyo kido moro ma dhano nigago ma en dwaro nyiso wedegi weche moko ma morogi.—Mari. 5:19.

Wajoneno kidono e kindewagi bende, mak mana ni ogendini mamoko to nyise e okang’ mamalo. Kuom mano, sama ng’ato ochako lamo Jehova Nyasaye madier, thothne ojadwaro nyiso wedene gik manyien mopuonjore. Kata kamano, onego onyisgi e yo mane? Onyalo timo ang’o mondo olendne wedene manie dinde mamoko kata maok nie din moro amora e yo mamulo chunygi? Muma nyisowa yo maber mar timo kamano.

“WASENWANG’O MESIA”

E ndalo Yesu, Andrea ne en achiel kuom joma nokwongo fwenyo ni Yesu en Mesia. To ng’ano ma ne Andrea okwongo nyiso wachno? “Mokwongo jali nonwang’o Simon, omin mare, mi nowachone niya, ‘Wasenwang’o Mesia’ (tiende ni, Kristo).” Andrea notero Petro ir Yesu, to mano nomiyo Petro thuolo mar bedo achiel kuom jopuonjre Yesu.—Joh. 1:35-42.

Chiegni higini auchiel bang’e kane Petro ni Joppa, nogwele mondo odhi Kaisaria e od Kornelio, ofisa maduong’ mar jolweny. Petro noyudo ng’a gini e odno? “Kornelio, nonwang’o ritogi, kosechoko [wedene] gi osiepene mohero.” Omiyo Kornelio nomiyo wedene thuolo mar winjo weche ma Petro wacho mondo bang’e gitim yiero kaluwore gi gik ma giwinjo.—Tich 10:22-33.

Wanyalo puonjore ang’o kuom kaka Andrea gi Kornelio notimo ne wedegi?

Andrea gi Kornelio ne ok oweyo aweya wedegi kamano. Andrea owuon nokawo okang’ mar tero Petro ir Yesu, kendo Kornelio notimo chenro mondo wedene obi owinj gima Petro ne wacho. Kata kamano, Andrea kod Kornelio ok nochuno wedegigo kata tiyo gi yore moko maok nikare mondo giywagi gibed jolup Kristo. Be ipuonjori gimoro kuom wachno? Nyalo bedo maber ka wan bende waluwo ranyisigino. Wanyalo goyo mbaka e wi wach moro gi wedewa mondo omigi thuolo mar ng’eyo adiera mag Muma kendo ng’eyo Jokristo wetewa mamoko. Kata kamano, pod wanyiso luor ne paro ma gin-go kendo watemo ahinya mondo kik nenre ni wachunogi gi adiera. Mondo wang’e kaka wanyalo konyo wedewa, we wane ane ranyisi mar Jürgen gi Petra ma gin Jokristo mokendore, mawuok Jerman.

Petra nopuonjore Muma gi Joneno mag Jehova mi bang’e ne obatise. Chwore ma nyinge Jürgen ne en ofisa mar jolweny. Mokwongo, Jürgen ne ok mor kane jaode obedo Janeno mar Jehova. Kata kamano bang’ kinde, nofwenyo ni Joneno puonjo adiera mawuok e Muma. En bende nochiwore mondo oti ne Jehova, kendo sani en jaduong’-kanyakla. En puonj mane ma Jürgen miyowa kuom kaka wanyalo lendo ne wedewa ma yie margi opogore gi marwa?

Jürgen wacho niya: “Ok onego wachun wedewa gi wach moro kata thung’ogi gi weche mang’eny mag Muma. Mano nyalo miyo kik gibed gi gombo mar ng’eyo adiera. Kinde ka kinde, nyalo bedo maber mana ka wangekonegi wach Nyasaye matin tin. Nyalo bedo maber bende ka watudo wedewa gi owete koda nyimine ma gin mbesegi kendo mohero gik ma gihero. Timo kamano nyalo kelogi machiegni.”

Jaote Petro kaachiel gi wede Kornelio norwako mapiyo adiera mag Muma. Moko kuom joma ne olendnegi a kinde Jokristo mokwongo, to nokawo thuolo malach kapok gidonjo e adiera.

TO NADE OWETE YESU?

Wede Yesu mang’eny norwako adiera e kinde ma notiyo ne Nyasaye e piny. Kuom ranyisi, nenore ni jaote Jakobo gi Johana ne gin omine Yesu kendo min-gi ma Salome, ne en nyamin Mariam min Yesu. Nyalo bedo ni Salome ne en achiel kuom ‘mon ma ne tiyone Yesu gi joote gi mwandugi giwegi.’—Luka 8:1-3.

Kata kamano, moko kuom joodgi Yesu ne ok oketo yie kuome mapiyo. Kuom ranyisi, chieng’ moro bang’ higa achiel kosebatis Yesu, oganda nochokore e ot moro mondo giwinje. To “owetene ka nowinjo, nowuok mondo odhi okawe; nikech ji ne wacho ni ‘Neko omake.’” Bang’ ndalo, kane omine Yesu dwaro ng’eyo gimomiyo nowuotho mang’eny, ok nomiyogi dwoko achiel kachiel. Nikech ang’o? Nikech “ominene bende ne ok oyie kuome.”—Mari. 3:21; Joh. 7:5.

Ang’o mwanyalo puonjore kuom kaka Yesu notimo ne wedene? Iye ok nowang’ kane jomoko wacho ni neko omake. Kata bang’ ka nosenege ma ochier, Yesu nomedo jiwo wedene kane ofwenyore ne Jakobo owadgi. Ka nofwenyorene kamano, nokonyo Jakobo kaachiel gi owetene mamoko mondo obed gadier ni en ema en Mesia. Omiyo, wedene moko nochokore kaachiel gi joote koda joma moko e dala mar Jerusalem kane ool roho maler kuomgi. Bang’ ndalo, Jakobo kod Juda ma bende ne en owadgi Yesu noyudo migepe makende.—Tich 1:12-14; 2:1-4; 1 Kor. 15:7.

JOMOKO DWARORE NI OMI KINDE MALACH

Mana kaka e ndalo Yesu, moko kuom wedewa dwarore omi kinde malach kapok girwako adiera. Kuom ranyisi, Roswitha ne en Ja Katholik kane chwore obatis kaka Janeno mar Jehova e higa 1978. Nikech Roswitha ne neno ni din mare ema ne ber, mano nomiyo okwedo yie mar chwore. Kata kamano, bang’ higini moko akwede mare nochako dok chien mochako neno ni Joneno ema puonjo adiera. Ne obatise e higa mar 2003. Ang’o momiyo noloko pache? Chwore nowene kore mondo owuon one kama adier nitie, kar bedo mager kode sama okwede. Roswitha miyowa paro mage mabeyo? Owacho niya: “Ng’ato nyalo loko chunye mana ka in iwuon ihori mos kendo itimo sinani.”

Monika ne obatis e higa 1974, kae to yawuote ariyo nobedo Joneno bang’ higini apar. Kata obedo ni chwore miluongo ni Hans ok nokwedogi, chworeno nobatis bang’e e higa 2006. Kaluwore gi ber ma joodno oseneno en paro mane ma gichiwonwa? Giwacho niya: “Kinde duto makri gi Jehova maok ikwedo yie mari kata matin.” En adier ni pod ne nyaka ginyis ni gihero Hans. Kendo chunygi ne ok otho nikech kinde duto ne gigeno ni chieng’ moro wuon-gi bende nobed Janeno.

PI MALIW MAR ADIERA MADUOGO CHUNY

Kinde moro Yesu nowacho ni adiera mag Muma chalo gi pi makelo ngima mochwere. (Joh. 4:13, 14) Wadwaro ni wedewa bende omodh pigno, ma en pi maliw mar adiera. Ok wadwar ni githung’ nikech wamiyogi pi mang’eny mokalo tong’. Kapo ni weche ma wanyisogi morogi kata thung’ogi, mano biro luwore gi kaka waleronegi adierago. Muma wacho ni “ng’ato makare oparo e chunye kaka doduok wach; to dho ng’at marach orumo weche maricho.” Ere kaka wanyalo tiyo gi puonjni?—Nge. 15:28; 16:23.

Dhako nyalo gombo lerone chwore yie ma en-go. Ka okwongo “oparo e chunye,” to obiro yiero weche motiyogo kar rikni gi weche maok oparo. Ok onego onyis ni en ng’at makare ahinya moloyo chwore. Weche mowacho bang’ paro matut biro bedo maduogo chuny kendo kelo kuwe. Gin kinde mage ma chwore nyalo goyo mbaka ka pache okuwe? Gin weche mage mamoroga chwore ahinya kata mohero somo? Dibed ni ohero weche sayans, siasa, koso tuke? Onyalo konyo chwore nade mondo oher weche manie Muma maok ojaro paro ma chwore nigo? Paro wechego motelo biro konye mondo owuo kendo otim gik moko e yo mariek.

Chopo e chuny wedewago ok en mana leronegi weche manie Muma matin tin. Gimaduong’ en siro puonj mag Mumago gi timbewa mabeyo.

SIK GI TIMBE MABEYO

Jürgen ma ne owuo kuome motelocha wacho niya: “Bed ng’at masiko luwo puonj manie Muma e ngimani mapile. Timbeni mabeyo ema biro ywayo watni katabed ni ok gibi nyisi achiel kachiel.” Hans, ma bang’e ne obatis chiegni higini 30 bang’ ka chiege osebedo Janeno wacho kama: “Timbe mabeyo ma Jakristo nigo konyo kama duong’ ahinya, nikech wede neno kaka adiera mwapuonjore tiyo e ngimawa.” Wedewa onego one ni yiewa miyo wabedo mopogore gi joma moko e yo maber to ok e yo marach.

Jaote Petro nochiwo puonj maber ne mon ma chwogi ok gin Joneno. Nowachonegi kama: “Winjuru chwou uwegi, mondo ka jo moko kuomgi ok oyie winjo Wach, to oresgi gi tim mag mondgi, ma ok wachnigi wach, ka girango ngimau maler kuluoro Nyasaye. Bidhruok maru kik obed maoko, kaka kado yie wich, kata rwako lewini mareprep; to moloyo bidhruok mondo obed maiye, mar chuny, kod rwakruok ma ok ti mar chuny modimbore, mokuwe, ma nengone duong’ nyim Nyasaye.”—1 Pet. 3:1-4.

Petro nondiko e wi kaka timbe mabeyo mag dhako nyalo ywayo chwore e adiera. Bang’ kane osebatis nyaminwa miluongo ni Christa e higa 1972, noketo paro manie Ndikono e chunya mondo en bende timbene mabeyo oywa chwore. Kata obedo ni chwore nosega puonjre gi Joneno, ne pok orwako adiera. Chwore osebedo kadhi e chokruoge mag Jokristo kendo en gi osiepe mang’eny ei kanyakla. Jo kanyakla bende owene thuolo mar timo yiero kende owuon. Christa temo konyo chwore nade?

“Ang’ado mar luwo yo ma Jehova dwaro mondo awuothie. To seche ma atimo kamano, aweyo mondo timbena mabeyo ema omul chuny jaoda ‘maok awachone wach.’ Ajatimo kaka chwora dwaro tek mana ni ok aketh chike Jehova. Ang’eyo bende ni en gi ratiro mare mar timo yiero kaka odwaro kendo aweyo weche duto e lwet Jehova.”

Ranyisi mar Christa nyiso kaka en gimaber bedo ng’ama tur. Oketo chenro majaber makonye luwo yore Nyasaye, moriwo dhi e chokruoge koda tiyo tij lendo. Onyiso bende ni ong’eyo ni onego oher chwore, kendo osiko omanyo thuolo mondo gibed kanyachiel. Bedo ng’ama tur kendo mawinjo wach en gima dwarore ahinya kuom jogo ma wedegi ok gin Joneno. Muma wacho ni ‘gik moko duto nigi ndalo mowinjorenigi.’ Mano oriwo thuolo ma wabedogo gi joodwa to ahinya wuon mondewa kata chwowa maok gin Joneno. Yudo thuolo mar bedo kanyachiel jiwo ji mondo owuo. En adier ni goyo mbaka kanyachiel nyalo konyo dichwo kata dhako owinj e chunye ni ohere kendo mano miyo ok obed gi nyiego.—Ekl. 3:1.

CHUNYI KIK OL

Holger ma wuon mare ne obatis higini 20 bang’ kosebatis joodgi duto, wacho kama: “En gimaduong’ mondo wanyis wedewa ni waherogi kendo onego walemnegi.” Christa bende wacho ni ‘chunye ok nool gi geno ni chieng’ moro chwore norwak adiera gi chunye duto mochak tiyo ne Jehova.’ Paro ma wan-go kuom wedewa maok gin Joneno kinde duto onego obed makare kendo onyis ni wan gi geno.

Gombo ma wan-go en mondo warit osiep manie kindwa gi wedewa, kendo miyo wedewa thuolo mar yudo adiera, kendo chopo e chunygi gi weche manie Muma. Kendo e yorewa duto, onego wabed joma ‘dwoko wach gi muolo kod luoro Nyasaye.’—1 Pet. 3:16.