DWOKO PENJO MAG MUMA
Kuom adier, en ng’ano ma locho e wi pinyni?
Kapo ni Nyasaye ema ne locho e wi piny, be piny dobedo gi chandruok mang’eny kama?
Ji mang’eny paro ni Nyasaye madier ema locho e wi pinyni. To kapo ni mano ne en adier, be piny dopong’ gi chandruok kama? (Rapar mar Chik 32:4, 5) Kaluwore gi Muma, pinyni nie bwo teko mar ng’at marach.—Som 1 Johana 5:19.
Ere kaka ng’at marach noyudo loch e wi dhano? Kane eka ochwe dhano, malaika moro ne ong’anjo ne Nyasaye kendo ne otemo ywayo dichwo gi dhako mokwongo mondo oriwre kode e ng’anjono. (Chakruok 3:1-6) Ji ariyogo ne oyiero winjo Satan, malaika ma ne ong’anjono, kendo mano nomiyo Satan obedo jalochgi. Nyasaye Manyalo Duto e Jaloch mowinjore, kata kamano, odwaro ni ji oyier giwegi bedo e bwo loch mare nikech gihere. (Rapar mar Chik 6:6; 30:16, 19) Gima lit en ni thoth ji osetimo yiero marach kaka ma ne jonyuolwa mokwongo otimo.—Som Fweny 12:9.
Ng’ano mabiro tieko chandruoge mag dhano?
Be Nyasaye biro weyo Satan osiki ka locho e wi dhano? Ooyo! Nyasaye biro tiyo gi Yesu mondo otiek chuth gik maricho duto ma Satan osekelo.—Som 1 Johana 3:8.
Ka otiyo gi teko ma Nyasaye omiye, Yesu biro tieko Satan. (Jo Rumi 16:20) Kae to Nyasaye biro locho e wi dhano kendo obiro miyo ji odag e ngima mar mor kod kuwe kaka ne odwaro a e chakruok.—Som Fweny 21:3-5.