Dwoko Penjo Mag Muma

Be malaike nyalo konyowa?

Jehova Nyasaye nochueyo tara gi tara mag malaike chon kata kapok ne ochueyo dhano. (Ayub 38:4, 7) Malaikego gin chuech mag roho ma nigi teko ma tiyo ne Nyasaye; nitie kinde ma Nyasaye orogi mondo gibi gita jotichne manie piny kendo ritogi. (Zaburi 91:10, 11) E ndalowagi, malaike konyo ji mondo oyud ber kokalo kuom wach maber ma jolup Yesu lando.—Som Fweny 14:6, 7.

Be onego walem ka wakwayo malaike mondo okonywa? Ooyo. Lamo en yo mar chiwo luor kata duong’ ma ahinya ne ng’ato kata gimoro, omiyo lamowa duto onego odhine mana Nyasaye kende. (Fweny 19:10) Nikech malaike tiyo ne Nyasaye, giluwo wach moa e dho Nyasaye to ok gima dhano dwaro ni gitim. Omiyo, lamowa duto onego odhi mana ne Nyasaye kokalo kuom Yesu.—Som Zaburi 103:20, 21; Mathayo 26:53.

Be nitie malaike maricho?

Mana kaka dhano, malaike bende ne ochue gi thuolo mar timo yiero, kendo ginyalo yiero timo gima ber kata marach. Gima lit en ni malaike mang’eny ne ong’anjo ne Nyasaye. (2 Petro 2:4) Achiel kuom malaike ma nokwongo ng’anjo en Satan; kae to malaike mamoko ne oluwe ma gibedo jochiende. E higni mokalo, ne oriemb Satan gi jochiendene e polo ma owitgi e piny.—Som Fweny 12:7-9.

Medruok mar timbe maricho kod gero chakre higa mar 1914 nyiso maler ni kinde ma Nyasaye biro tieko Satan kod jochiende ma ok ginichak gichand ji, okayo machiegni. Kae to bang’e Nyasaye biro loso piny obed maber kaka ne en kar chakruok.—Fweny 12:12; 21:3, 4.