Gimomiyo Nyaka Wabed Maler

1. Ere kaka bug Tim Jo-Lawi nyalo konyowa?

BUG Tim Jo-Lawi wuoyo ahinya e wi wach ler moloyo buk moro amora e Muma. Nikech kido mar ler en gima dwarore ahinya kuom joma lamo Jehova gadier, winjo tiend weche manie bug Tim Jo-Lawi kendo kawogi mapek biro miyo wabed joma ler e wang’ Nyasaye.

2. Bug Tim Jo-Lawi oting’o weche mage?

² Bug Tim Jo-Lawi, ma nondik gi janabi Musa en achiel kuom buge mayudore e “Ndiko duto” kendo konyo kuom puonjo ji. (2 Tim. 3:16) Nying Jehova yudore chiegni dipar e sula ka sula mar bugno. Winjo tiend weche manie bugno biro konyowa kik watim gimoro amora maketho nying Nyasaye. (Lawi 22:32) Weche mitiyogo ahinya e bugno ni “An e Jehova,” paronwa ni kinde duto onego wawinj Jehova. E sulani kod maluwo, wabiro nono puonj mabeyo mayudore e bug Tim Jo-Lawi, ma en mich ma Nyasaye omiyowa mondo walame ka wan joma ler.

LER EN GIMA DWARORE

3, 4. Luok ma Harun gi yawuote ne luokorego, nochung’ ne ang’o? (Ne picha manie chak sulani.)

³ Som Tim Jo-Lawi 8:5, 6. Jehova noyiero Harun obed jadolo maduong’ ne Jo-Israel, kendo yawuote nonego obed jodolo ne ogandano. Harun ochung’ ne Yesu Kristo, to yawuote ochung’ ne jolup Yesu mowal. Be mano koro nyiso ni luok ma Harun ne luokorego nonyiso ni Yesu bende ne onego oketi obed maler? Ooyo, nimar Yesu ne onge richo kendo ne ‘oonge mbala’ moro amora, omiyo ne onge tiende mondo okete obed maler. (Hib. 7:26; 9:14) Kata kamano, ler ma Harun ne lergo bang’ luokruok nyiso kaka Yesu en ng’at maler kendo makare. To kare luok ma yawuote ne luokorego nochung’ ne ang’o?

⁴ Luokno ne nyiso kaka joma ne idhi yier mondo obed jodolo e polo ne idhi pwodhi obed maler. Be batiso mar Jokristo mowal otudore gi luokruok mar yawuot Harun? Ooyo, batiso ok luok richo. Kar mano, en gima nyiso ni ng’ato ochiwore maonge achuna mondo oti ne Jehova Nyasaye. Jokristo mowal iluoko “kod wach,” kendo mano nyiso ni nyaka giluw puonj mag Kristo gi chunygi duto. (Efe. 5:25-27) Omiyo osepwodhgi kendo giler. To nade ‘rombe mamoko’?​—Joh. 10:16.

5. Ang’o momiyo inyalo wach ni rombe mamoko ipwodho gi Wach Nyasaye?

⁵ Yawuot Harun ok ochung’ ne “oganda mang’ongo” ma gin rombe mamoko mag Yesu. (Fwe. 7:9) Kuom mano, be batiso mar rombe mamoko nyiso ni koro oseketgi gibedo maler kendo opwodhgi gi Wach Nyasaye? En kamano. Sama jogo ma nigi geno mar dak e piny osomo Muma mong’eyo ni remb Yesu ma ne ochuer en gima duong’ ahinya, mano miyo giketo yie kuom wechego kendo ‘gitiyo ne Nyasaye odiechieng’ gotieno.’ (Fwe. 7:13-15) To nikech tij pwodho Jokristo mowal kaachiel gi rombe mamoko pod dhi nyime, mano miyo ‘giwuotho malong’o e kind joma ok oyie.’ (1 Pet. 2:12) Onge kiawa ni Jehova mor ahinya sama oneno kaka Jokristo mowal kaachiel gi rombe mamoko ler kendo nigi kuwe e kindgi ka giwinjo kendo giluwo dwond Yesu Jakwadhgi maok giwe.

6. En nonruok mane ma ka watimo to nyalo konyowa?

⁶ Chik ma ne dwaro ni jodolo mag Jo-Israel oluokre puonjo jotich Jehova me kindegi weche moko. Joma wapuonjo Muma nenoga kaka kuonde ma wachokoree ler, kaka waler, kendo warwakore maber. Kata kamano, ler ma jodolo ne lergo paronwa ni ng’ato ka ng’ato mabiro e god Jehova mondo olame nyaka bed ng’at ma “chunye ler.” (Som Zaburi 24:3, 4; Isa. 2:2, 3.) Tich ma watiyo ne Nyasaye chunowa ni nyaka wabed gi paro maler, chuny maler, kaachiel gi del maler. Mani dwaro ni wanonre wawegi kinde ka kinde, to mano nyalo chuno ni jomoko otim lokruok moko eka gibed joma ler. (2 Kor. 13:5) Kuom ranyisi, Jakristo mosebatisi ma ng’iyo ponografi goyiem onego openjre kama, ‘Be adier anyiso ni aler?’ Kae to onego okwa kony mondo owe tim mochidono.​—Jak. 5:14.

NYISURU NI ULER KUOM BEDO JOMA WINJO WACH

7. Kaluwore gi Tim Jo-Lawi 8:22-24, Yesu noketonwa ranyisi mane?

⁷ Kane ipwodho Harun Jadolo Maduong’ kaachiel gi yawuote e piny Israel machon, ne iketo remb yim e bath itgi ma korachwich, e lith lwetegi mathuondi ma korachwich, kod lith tiendegi mathuondi ma korachwich. (Som Tim Jo-Lawi 8:22-24.) Tiyo gi remo e yo machalo kamano ne nyiso ni jodologo ne dhi timo migepegi duto e yo maber chuth kaka ginyalo. E yo machalo kamano bende, Yesu ma be en Jadolo Maduong’ keto ne Jokristo mowal kaachiel gi rombe mamoko ranyisi maber miwuoro. Nochiko ite malong’o mondo owinj kaka Nyasaye ne chike. Lwet Yesu notimo dwach Jehova kendo tiendene ok nobaro moweyo luwo yore makare mag Nyasaye.​—Joh. 4:31-34.

8. Jotich Jehova duto nyaka tim ang’o?

⁸ Jokristo mowal kaachiel gi rombe mamoko, nyaka luw yore makare kaka Jadologi Maduong’. Jotich Jehova duto nyaka luw weche te mayudore e Wach Nyasaye kendo mano biro konyogi kik gimi roho mar Nyasaye chuny lit. (Efe. 4:30) Nyaka ‘gilos yoregi obed moriere tir ne tiendegi.’​—Hib. 12:13.

9. Gin weche mage ma owete adek mosetiyo gi Bura Matayo nowacho, to ere kaka gik ma ne giwachogo nyalo konyi mondo idhi nyime bedo ng’at maler?

⁹ We wane ane weche ma owetewa moko adek ma nigi geno mar dak e piny kendo mosebedo ka tiyo kuom higini pieche gi Bura Matayo nowacho. Achiel kuomgi nowacho kama: “Kata obedo ni tiyo kaachiel gi owete mowalgo en thuolo makende, bedo machiegni kodgi kinde ka kinde osefwenyonwa ni pod gin mana dhano morem. Kata kamano, achiel kuom gik ma nasingora ni abiro timo ndalo duto en winjo kendo luwo joma tayowa.” Owadwa mar ariyo bende nowacho niya: “Ndiko machalo gi 2 Jo Korintho 10:5, ma jiwowa ni ‘wawinj Kristo,’ osekonya ahinya mondo awinj kendo ariw lwedo jogo matayo. Atimo kamano kowuok e chunya.” Owadwa mar adek to wacho niya: “Hero gima Jehova ohero kendo sin gi gik mosin-go, kendo weyo mondo otawa kinde duto ka watimo gigo mamore, nyiso ni waluwo kaka ichikowa gi riwruok mar oganda mare, kaachiel gi jogo motiyogo mondo dwache ochop e piny.” Owadwani nofwenyo ni Nathan Knorr, ma bang’e nobedo achiel kuom jogo manie Bura Matayo, ne oyie gi weche ma nondiki e Watch Tower ma 1925 e bwo wich ma wacho ni “Birth of the Nation” tiende ni “Inyuolo Oganda” kata obedo ni jomoko to ne ok oyiego. Ranyisi mar Knorr nomoro owadwano ahinya. Paro matut weche ma owete adekgo owuoyoe nyalo konyowa mondo wabed joma ler kuom winjo wach.

LUW CHIK NYASAYE MA KWERO TIYO GI REMO

10. Ang’o momiyo onego waluw chik Nyasaye ma kwero tiyo gi remo?

¹⁰ Som Tim Jo-Lawi 17:10. Jehova nochiko Jo-Israel ni kik cham “remb gimoro.” Jokristo bende ne omi chik ni kik gicham remo kata tiyo gi remb le kata dhano e yo moro amora. (Tich 15:28, 29) En gima lit ahinya paro ni wanyalo timo gimoro ma miyo Nyasaye obed ‘mamon’ kodwa kendo inyalo golwa e kanyakla. Wahere kendo wadwaro luwo chikene. Kata ka ngimawa ni e kind akuru kod asumbi, tiende ni wachiegni gi tho, wang’ado e chunywa mar chung’ motegno kata bed ni jogo ma kia Jehova kendo maok dew chikene yondhowa mondo watim dwachgi. Wang’eyo ni ji biro jarowa kapo ni watamore ni kik medwa remo. Kata kamano, wayiero mar luwo chike Nyasaye. (Juda 17, 18) Ang’o mabiro jiwowa mondo ‘wane ni ok wachamo remo’ kendo ok wayie mondo omedwago?​—Rapar 12:23.

11. Ang’o momiyo wanyalo wacho ni Odiechieng Loso Winjruok ne en gima duong’?

¹¹ Yo ma jodolo ne tiyogo gi remo e piny Israel machon e Odiechieng Loso Winjruok ma nitimo higa ka higa, konyowa ng’eyo paro ma Nyasaye nigo e wi remo. Remo ne itiyogo e kinde makende. Ne itiyo kode mondo olos winjruok e kind ng’ato gi Jehova kiweyone richone. Remb ruath gi diel nonego okir e nyim ark. (Lawi 16:14, 15, 19) Timo kamano ne chiwo thuolo mondo Jehova owe ne Jo-Israel richogi. E wi mano, Jehova nogolo chik ni ng’at ma noyang’o le mondo ocham, ne nyaka ol remb leno e lowo kendo ume nikech “gik mangima duto rembgi ni kaachiel gi ngimagi.” (Lawi 17:11-14) Timo kamano ne en gima duong’ ahinya e wang’ Nyasaye. Yo ma ne itiyoe gi remo e Odiechieng Loso Winjruok, kaachiel gi chik ma ne dwaro ni oole piny, ne winjore ndi gi chik ma Jehova nomiyo Noa gi kothe e wi remo. (Chak. 9:3-6) Jehova Nyasaye nokwero tim chamo remo ni eka ng’ato odhi nyime bedo mangima. Wachno puonjo Jokristo ang’o?

12. Barua ma Paulo nondiko ne Jo-Hibrania nyiso ni nitie tudruok mane e kind remo gi weyo ne ng’ato richo?

¹² Kane jaote Paulo ondiko ne Jokristo ma Jo-Hibrania e wi teko ma remo nigo mar pwodho gik moko, noleronegi kama: “E bwo Chik, chiegni gik moko duto ipwodho gi remo, kendo ka remo ok ochuer, golo richo onge.” (Hib. 9:22) Paulo bende nowacho ni kata obedo ni misengni mag le ne konyo e okang’ moro, misengnigo ne paro ne Jo-Israel ni ne gin joricho kendo ni misango moro maber moloyo ne dwarore mondo owenegi richogi chuth. Kuom adier, Chik ne en “mana tipo mar gik mabeyo ma biro, to ok gigogo wuon.” (Hib. 10:1-4) Ere kaka ne idhi wene ji richogi?

13. Bedo ni Yesu nochiwo nengo mar rembe ne Jehova e polo miyo iwinjo nade?

¹³ Som Jo Efeso 1:7. Yesu Kristo ‘nochiworenwa’ mondo otho kaka misango, kendo thoneno en gima duong’ ahinya ne joma ohere kendo mohero Wuon mare. (Gal. 2:20) Kata kamano, gima Yesu notimo bang’ thone kod chierne ema nomiyo inyalo wenwa richowa. Yesu nochopo gik moko duto ma ne itimo e Odiechieng Loso Winjruok kaka Chik Musa ne dwaro. Odiechiengno, jadolo maduong’ ne kawo moko kuom remb le ma nitimogo misango, modonjgo e Ka Maler Moloyo mar tabernakel kochiwe e nyim Nyasaye, kendo notimo kamano bende kane oger hekalu mar Suleman. (Lawi 16:11-15) E yo machalo kamano, Yesu nodonjo e polo gi nengo mar rembe mi ochiwe ne Jehova. (Hib. 9:6, 7, 11-14, 24-28) To mano kaka wail ni iweyonwa richowa kendo chunywa bedo maonge bura nikech waketo yie kuom remb Yesu!

14, 15. Ang’o momiyo en gima duong’ mondo wang’e tiend chik Jehova e wi remo kendo luwogo?

¹⁴ Donge sani koro ing’eyo maber gimomiyo Jehova chikowa ni kik wacham “remb gimoro”? (Lawi 17:10) Be ineno gimomiyo Nyasaye neno remo kaka gima ler? Oneno remo kaka gima romre gi ngima. (Chak. 9:4) Donge koro iyie gi paro ma Nyasaye nigo kuom remo kendo iyie gi chikne ma kwerowa ni kik wacham remo kendo kik medwago? Yo achiel kende ma wanyalo bedogo gi kuwe e kindwa gi Nyasaye en keto yie kuom misango mar Yesu kendo ng’eyo ni remo nigi nengo maduong’ e nyim Jachuechwa.—Kol. 1:19, 20.

¹⁵ Ng’ato ang’ata kuomwa nyalo po koromo gi wach medo remo. Achiel kuom joodwa kata osiepwa nyalo romo gi chal moro matek manyalo dwaro ni otim yiero kabe ibiro mede remo kata ok bi mede. E kindego bende, nyaka oyier kabe obiro yie omede ng’injo mag remo kata oti gi yore mamoko mag thieth. Omiyo, ber mondo ng’ato otim nonro matut kendo oikre ne gimoro amora manyalo timore apoya modok korka weche thieth. E wi mano, ka wamedo gi lamo, timo ikruok ma kamano biro konyowa chung’ motegno kendo makruok gi yiewa kata ang’o ma timre. Kuom adier, ok wadwar chwanyo Jehova kuom timo gima Wachne kwerowa. Lakteche mogwaro kaachiel gi jomamoko moyie gi wach medo remo homboga ji mondo ogol remo minyalo tigo ni mondo oresgo ngima ji. Kata kamano, oganda maler ma lamo Jehova oyie ni Jachuech ema nigi ratiro mar wacho kaka onego oti gi remo. E wang’ Jehova, “remb gimoro” kata obed remb ang’o, ler e nyime. Nyaka waluw chikne motudore gi remo. Timbewa maler nyiso Jehova ni wakawo mapek remb Yesu ma nigi teko mar reso ngimawa, nimar mano e remo kende ma miyo iweyonwa richowa kendo miyowa thuolo mar yudo ngima mochwere.—Joh. 3:16.

GIMOMIYO JEHOVA DWARO NI WABED MALER

16. Ang’o momiyo jotich Jehova nyaka bed maler?

¹⁶ Kane Nyasaye golo Jo-Israel e piny Misri kama ne gin wasumbni, nonyiso ogandano niya: “An e Jehova ma nogolou e piny Misri, mondo abedi Nyasachu: e momiyo unubed maler nikech An Aler.” (Lawi 11:45) Jehova ne dwaro ni Jo-Israel obed maler nikech en bende oler. Wan Joneno mag Jehova nyaka wabed maler. Bug Tim Jo-Lawi nyiso mano maler.

17. Inyalo wacho ang’o kuom bug Tim Jo-Lawi?

¹⁷ En adier ni nono weche moko e bug Tim Jo-Lawi osekonyowa ahinya. Nyaka bed ni sulani osekonyi neno bug Tim Jo-Lawi e yo makende. Paro matut e wi moko kuom weche mayudore e bugni osekonyi mondo imed ng’eyo gimomiyo nyaka wabed maler. Kata kamano, gin puonj mage mabeyo ma pod wabiro yudo e bug Tim Jo-Lawini? Ang’o kendo mwanyalo puonjore e bugni motudore gi tich maler ma watiyo ne Jehova? Wabiro nono wechego e sula maluwo.