Ohinga mar Jarito LAIBRARI E INTANET
ohinga mar jarito
LAIBRARI E INTANET
Dholuo
  • MUMA
  • BUGE
  • MIKUTANO
  • w15 5/15 ite mar 29-ite mar 30 par. 5
  • Penjo Moa Kuom Josombwa

Hakuna video yoyote kwa sasa.

Samahani, haikuwezekana kupakia video.

  • Penjo Moa Kuom Josombwa
  • Ohinga mar Jarito Malando Pinyruoth Jehova—2015
  • Habari Zinazolingana
  • ‘Asin Kodi In Gog’
    Jehova Oseduoko Lamo Madier!
  • Ibiro Keth Gog mar Magog Machiegnini
    Ngimawa kod Tijwa Kaka Jokristo—Chenro mar Chokruok—2017
Ohinga mar Jarito Malando Pinyruoth Jehova—2015
w15 5/15 ite mar 29-ite mar 30 par. 5

PENJO MOA KUOM JOSOMBWA

Gog mar Magog miwuoyo kuome e bug Ezekiel en ng’a?

Kuom higni mang’eny, bugewa osebedo ka lero ni Gog mar Magog en nying ma ne omi Satan Jachien kosegole e polo. Wachni ne ilero kamano kaluwore gi weche ma yudore e bug Fweny ma nyiso ni Satan Jachien e ma biro telo ne piny ngima e monjo jo Nyasaye. (Fwe. 12:1-17) Omiyo ne iparo ni nyaka bed ni Gog en nying machielo ma nokor mar Satan.

Kata kamano, lero wachno e yo ma kamano ne miyo penjo moko madongo sieko. Ang’o momiyo mano bedoe? Par ane wachni: Sama Jehova wuoyo e wi kinde ma ibiro lo Gog, owacho kama e wi Gog: “Anachiwi ni winy mowor mag ngeche duto, kod gi buya me i piny, mondo gichami.” (Eze. 39:4) Kae to Jehova medo wacho kama: “Kendo nobedi e ndalono, anami Gog kar yiko e Israel . . . giniyik Gog kanyo kod ogandane duto.” (Eze. 39:11) To ere kaka chuech mar roho inyalo cham gi “winy mowor mag ngeche duto, kod gi buya me i piny”? Ere kaka inyalo mi Satan “kar yiko” e piny? Muma wacho ni Satan ibiro witi e abiso kuom higni 1,000 to ok ni ibiro chame kata yike.—Fwe. 20:1, 2.

Inyisowa ni bang’ higni 1,000 ibiro gol Satan e abiso, kendo “enowuog mondo odhi owuond ogendni manie tunge ang’wen mag piny, Gog kod Magog, mondo ochokgi kanyachiel ne lweny.” (Fwe. 20:8) To kare ere kaka Satan nyalo wuondo Gog ka en owuon en e Gog? Omiyo, nenore maler ni “Gog” miwuoyoe e weche ma nokor e bug Ezekiel kod bug Fweny ok en Satan.

Gog mar Magog kara en ng’a? Mondo wayud dwoko mar penjono, nyaka wanon Ndiko mondo wang’e ni ng’a gini ma biro monjo jo Nyasaye. Muma ok wuo mana e wi ‘Gog mar Magog’ kende ni e ma biro monjo jo Nyasaye, to bende owuoyo e wi monj ma biro a kuom “ruoth manie masawa” kod “ruodhi mag piny.” (Eze. 38:2, 10-13; Dan. 11:40, 44, 45; Fwe. 17:14; 19:19) Be mano nyiso ni koro mago gin monj mopogore opogore? Nyalo bedo ni ok en kamano. Onge kiawa ni Muma wuoyo e wi monj achiel koluonge gi nyinge mopogore opogore. Ang’o momiyo wawacho kamano? Nikech Muma nyiso ni ogendni duto manie piny ne dhi riwore e monj mogikno kae to mano tugo lweny mar Har–Magedon.—Fwe. 16:14, 16.

Gik ma Gog mar Magog biro timo kochakore kinde ma masira maduong’ chakoree

Ka wapimo Ndiko duto ma wuoyo e wi monj mibiro tim ne jotich Nyasaye, nenore maler ni Gog mar Magog ok ochung’ ne Satan, to ochung’ ne pinje mang’eny monywako kanyachiel. Be pinjego ibiro telnegi gi “ruoth manie masawa”? Ok wanyal wacho gadier ni en kamano. Kata kamano paroni chalo gi gima Jehova wacho e wi Gog niya: ‘Inibi kia e kari manie kor masawa mabor ahinya, in, kod ji mang’eny, giduto ka giidho ambuoche, oganda maduong’, oganda mar lueny man gi teko.’—Eze. 38:6, 15.

E yo ma chalo kamano, Daniel ma bende notiyo kaka janabi e kinde Ezekiel, nowuoyo e wi ruoth ma masawa. Nowacho kama: “Weche mokowone moa kor wuok chieng’ kod masawa nochand chunye: mi nowuogi gi mirima mang’eny ni mondo oneg ji mang’eny, otiekgi chuth. Kendo enogur hembe molosogo dalane mar ruoth kind bahari kod got malerni man gi duong’: to kata kamano enochop ka ma ndalone ogik, ka onge ng’at ma nokonye.” (Dan. 11:44, 45) Mano bende e gima bug Ezekiel wacho e wi tije ma Gog ne dhi timo.—Eze. 38:8-12, 16.

Ang’o kendo ma biro timore bang’ monj mogikni? Daniel nyisowa niya: “E ndalogo Mikael [Yesu Kristo] nochungi [e kinde Har–Magedon], ruoth maduong’ni mobedoe [chakre 1914] mondo orit jogi: kendo masich piny [masira maduong’] nobedie, ma kite yore, ma ne ok obedoe ngang’ nyaka oganda nobedo e piny nyaka ndalo nogono; ndalogo nogol jogi e chandruok, mana ji duto ma nyingegi noyudre kondik ei kitabu.” (Dan. 12:1) Okang’ mogik ma jal ma tiyo e lo Nyasaye ma en Yesu biro kawoni bende ilero e bug Fweny 19:11-21.

To kara en ng’ano miluongo ni “Gog kod Magog” e bug Fweny 20:8? E kinde tem mogik ma biro bedoe bang’ higni 1,000 jogo duto ma biro ng’anyo ne Jehova biro nyiso chuny marach mar nek ma chalo gi mar ‘Gog mar Magog,’ tiende ni pinje ma biro nywako kanyachiel mondo gimonj jo Nyasaye e giko masira maduong’. Kum mibiro migi giduto en achiel, to kumno en kethruok mosiko! (Fwe. 19:20, 21; 20:9) Kuom mano, nenore ni ji duto ma biro ng’anyo ne Nyasaye e giko Higni Aluf Achiel owinjore oluong ni “Gog kod Magog.”

Gik ma Gog kod Magog biro timo e giko mar higni 1,000

Kaka jopuonjre ma nono Wach Nyasaye adimba, warito gi siso neno kinde mokayo machiegnini ni en ng’awa ma biro bedo “ruoth manie masawa.” To kata bed ni en ng’ano ma biro telo ne pinje monywako kanyachielgo, wan gadier kuom weche moko ariyo: (1) Ibiro lo Gog mar Magog kod joge duto kendo ibiro kethgi chuth; kod (2) Yesu Kristo kaka Ruodhwa ma locho, biro reso jotich Nyasaye kendo rwakogi e piny manyien ma nigi kuwe kod rit madier.—Fwe. 7:14-17.

    Buge mag Dholuo (1993-2025)
    Toka
    Ingia
    • Dholuo
    • Shiriki
    • Kaka Daher
    • Copyright © 2025 Watch Tower Bible and Tract Society of Pennsylvania
    • Chikewa
    • Rito Weche
    • Mpangilio wa Faragha
    • JW.ORG
    • Ingia
    Shiriki